Jehovah Tehte pa zeizat dah na hngalh hna? Cheukhat cu na innpa, na rianṭuanṭi hawi asiloah na sianginn kaiṭi hawi an si men lai. Asiloah nangmah he Baibal aa ruahṭimi an si men lai. Kannih cu zei bantuk minung dah kan si, zeicah kan zumhnak kha mi sinah kan chim?

Kannih cu mi sawhsawh kan si. Hnulei sining le nunning phunphun a ngeimi kan si. Kan lak i cheukhat cu hlan ah biaknak dang an rak si i a cheu cu Pathian a zum lomi an rak si. Asinain Jehovah Tehte kan si hlan ah, kan zapi in Baibal cawnpiakmi kha caan pe in ṭha tein kan rak cawng. (Lamkaltu 17:11) Kan cawnmi kha kan cohlan i kanmah tein Jehovah Pathian biak kha kan i thim.

Baibal cawnnak in ṭhatnak kan hmu. Kannih zong midang bantukin chambaunak a ngeimi le harnak a tongmi kan si. Asinain nifa kan nunnak ah Baibal phunglam zulh kan i zuamnak thawng in kan i nuam. (Salm 128:1, 2) Cucaah Baibal in kan hngalhmi kha midang zong hngal ve hna seh tiin kan chimh hna.

Pathian phunglam ningin kan nung. Baibal phunglam hna nih i nuamh deuh awk le midang upat awkah a kan bawmh, dinfelnak le zaangfahnak ti bantuk sining hna zong ngeih awkah a kan bawmh. Cun kan ngandamnak a ṭhatter lengah mi caah a ṭhahnemmi zong a kan siter, chungkhar ah lungrualnak a chuahter, ziaza zong a ṭhatter. “Pathian nih mi vialte kha aa ruang tein a zoh hna” ti kha kan zumh caah kannih cu lungrual tein Pathian a biami vawlei pumpi unaurual in kan i hmu. Miphun le ram thleidannak a um lo. Kannih cu mi sawhsawh kan si nain aa phundang ngaimi miphun phunkhat in dirh kan si.—Lamkaltu 4:13; 10:34, 35.

• Jehovah Tehte Hna cu midang bantukin zeidah an ton ve?

• Jehvoah Tehte Hna nih Baibal an hlathlainak in zei phunglam dah an hngalh?