Kumzabu pakhatnak ah, Jerusalem i a ummi “lamkaltu pawl le upa hna” in dirhmi phu hmete cu uktu bu rian an ṭuan, annih nih chiti thuhmi khrihfabu vialte caah a biapimi biakhiahnak an tuah. (Lamkaltu 15:2) Biakhiahnak an tuah fatinte Baibal chimmi kha an i ruahceih i Pathian thlarau lamhruai ning in bia an khiah. (Lamkaltu 15:25) Tuchan zong ah cutin an tuah ve.

Pathian nih a duhnak tuah awkah a hman hna. Uktu Bu rian a ṭuanmi chiti thuhmi unaupa hna cu Baibal hngalh a duh tukmi an si, zeitindah rianṭuan ding a si ti biakhiahnak tuah le biaknak he a tlaimi biahalnak leh a thiam tukmi zong an si. Vawlei pumpi unau pawl herhmi i ruahceih awkah zarh fatinte meeting an tuah. Kumzabu pakhatnak ah, Baibal ah hram aa bunhmi lamhruainak kha cakuat asiloah khualtlawng rianṭuantu le unau dang hmang in an chimh hna. Mah nih Pathian salle kha lungrual tein rianṭuan awkah a bawmh hna. (Lamkaltu 16:4, 5) Uktu Bu nih thlarau rawl timhtuahnak kha lam an hruai, phungchimnak rian kha biapi bik i chiah awkah an forh hna i unaupa pawl rianpeknak kha an tlangtlak hna.

Pathian thlarau lamhruainak kha an cohlan colh. Uktu Bu nih Cungnung Bik Jehovah le Khrihfabu Lu a simi Jesuh lamhruainak kha an i bochan. (1 Korin 11:3; Efesa 5:23) Annih nih Pathian salle hruaitu in an i hmu lo. Chiti thuhmi Khrihfa dihlak he “Tufa [Jesuh] kha a kalnak kip ah an zulh” zungzal. (Biathlam 14:4) Uktu Bu nih anmah ca le an rianṭuannak ca i thla kan cammi kha an sunsak tuk.

• Kumzabu pakhatnak i uktu bu cu ahote dah an si?

• Tuchan ah Uktu Bu nih Pathian lamhruainak kha zeitindah an kawl?