Mi tampi cu pumhnak in thlaraulei lamhruainak le thazaang peknak an hmuh lo caah an i pum ti lo. Cu a si ah, zeicah Jehovah Tehte Hna sinah naa pumh awk a si? Naa pumh ahcun zeidah na hmuh lai?

Dawtnak le zawnruahnak a ngeimi hna lakah nuamhnak a um kha na hmuh lai. Kumzabu pakhatnak i Khrihfa hna cu Khrihfabu in dirh an si, annih cu Pathian biak awk, Baibal cawn awk le pakhat le pakhat tha i pek awkah an rak i pum. (Hebru 10:24, 25) An i pumhnak ah dawtnak a um caah Khrihfa unau a simi hawikom ṭha hna lakah kan phan tiah an ruah. (2 Thesalon 1:3; 3 Johan 14) Kannih zong anmah bantuk in kan tuah ve caah kan i nuam ve.

Baibal phunglam zulh ning an cawnmi in ṭhatnak an hmuh kha na hmuh lai. Baibal ah aa ṭial bantukin nu he pa he ngakchia he kan zapi in kan i pumṭi. Sining a tlinhmi cawnpiaktu pawl nih kan nunnak ah Baibal phunglam zeitindah hman ding a si ti hngalh awkah Baibal in a kan bawmh. (Deuteronomi 31:12; Nehemiah 8:8) I ruahṭi ding timi cawn tik le hlasak tikah kan zapi in kan i tel kho i kan zumhnak kong chimnak caanṭha kan hmu.—Salm 35:18.

Pathian kan zumhnak a fehmi kha na hmuh lai. Lamkaltu Paul nih amah chan lio i Khrihfabu pakhat sinah hitin ca a rak ṭial: “Nanmah hmuh cu kaa ngaih hringhran . . . Ka chimduhmi cu, pakhat le pakhat kan i bawm cio hnga, ka zumhnak nih nannih an bomh hna hnga i nan zumhnak nih kei zong a ka bomh ve hnga, ti hi a si.” (Rom 1:11, 12) Pumhnak ah zumtu khat pawl he kan i ton lengmangmi nih kan zumhnak le Baibal phunglam zulh awk kan biakhiahnak kha a fehter.

Kan sinah rak i pum ve law a cunglei i aa ṭialmi ṭhatnak hna kha hmu ve. Kan i pumhnak ah thawhlawm kholh a um lo.

• Ahote an i pumh ning bantuk in dah kan i pumh ve?

• Kan i pumhnak in zei ṭhatnak dah kan hmuh khawh?