A hmasa Khrihfa hna cu an i pumh tikah, a bik in hla an sa, thla an cam, Baibal an rel i an i ruahṭi. (1 Korin 14:26) Kannih zong cutin kan i pum ve.

Cawnpiaknak cu Baibal ah hram aa bunh i zulhawktlak a si. Khrihfabu kip zarhpi ni ah kan i pumh tikah minit 30 chung Baibal Phungchimnak a um, mah phungchimnak ah kan nunnak le kan chan he aa tlaiin Baibal nih zeidah a chim timi kong kan theih. Kan zapi in kan Baibal zoh ve awkah forh kan si. Mah phungchimnak a dih hnuah suimilam pakhat chung “Vennak Innsang” Cawnnak a um. Mah cawnnak ah Vennak Innsang cawn awk cauk i capar pakhat kha i ruahṭi a si i aa pummi kha a phi pek awkah sawm kan si. Mah i ruahṭinak nih kan nunnak ah Baibal lamhruainak zulh awkah a kan bawmh. Kan cawnmi kha vawleicung Khrihfabu 110,000 leng nih an rak cawn cio ve.

Phungchim thiam awkah bawmh kan si. Zarhlai ah Khrihfa Nunning le Rianṭuannak pumhnak kan ngei i mah pumhnak cu ṭhenthum ah ṭhen a si. Mah pumhnak ah thla fatin chuahmi Nunning le Rianṭuannak Tuahchunhnak Cauk kha kan hman. Mah pumhnak i ṭhenkhatnak cu Baibal Ah Thuhmi Ro Hna timi a si i a hlankan in relciami Baibal ṭhen pakhat kha ṭha deuh in hngalhthiam awkah a kan bawmh. Ṭhenhnihnak cu Phungchim Rianṭuannak Ah Hmang timi a si i midang he Baibal i ruahṭi ning hmuhsaknak hna aa tel. Aa telmi hna i an carel ning le an phungchim ning a ṭhancho nakhnga bawmh awkah rianngeitu nih ṭha tein a zohpiak hna. (1 Timote 4:13) Ṭhenthumnak cu Khrihfa Nunning In Nunnak timi a si i nifa kan nunnak ah zulh dingmi Baibal phunglam hna i ruahceihṭinak a si. Mah ah Baibal kan hngalhthiamnak a ṭhanchoter hngami biahalnak le phitnak hna aa tel.

Kan sin naa pumh tikah Baibal cawnpiak ning na theihmi nih na lung aan suk tuk ko lai.—Isaiah 54:13.

• Jehovah Tehte Hna sin naa pumh tikah zei kong dah na theih lai?

• Zarh fatinte kan tuahmi zei pumhnak ah dah i pumh na duh?