Kan bu ah man phalh in Pathian rian a ṭuanmi an um lo. Khrihfabu a rak i thawkka i an rak tuah bantukin, sining a tlinhmi bu zohkhenhtu pawl cu “Khrihfabu tuukhal” rian pek an si. (Lamkaltu 20:28) Khrihfa upa pawl cu thlaraulei ah a ṭhawngmi an si, Khrihfabu kha an zohkhenh tikah ‘Pathian nih zohkhenh hna seh ti a duh hna bantukin lungtho lo si loin lungtho tein an zohkhenh hna. Ṭuan man hmuh ding men ah si lo in ṭuan an duh taktak ruang tu ah an rian kha an ṭuan.’ (1 Piter 5:1-3) Kan caah zei rian dah an ṭuan?

An kan zohkhenh i an kan kilven. Khrihfa upa hna nih Baibal lamhruainak kha a kan cawnpiak i Jehovah he pehtlaihnak ṭha ngeih awkah an kan bawmh. Pathian nih a biapimi rian a kan pek ti kha an hngalh i Pathian salle kha a uk in an kan uk lo, kan ca ṭhatnak le kan i lawmh nakhnga tu kha an tuah. (2 Korin 1:24) Tuukhal nih a tuu pakhat cio kha ṭha tein a zohkhenh hna bantukin, Khrihfa upa hna nih Khrihfabu i a ummi pakhat cio kan kong kha ṭha tein hngalh an i zuam.—Phungthlukbia 27:23.

Pathian duhnak zeitindah tuah awk a si kha a kan cawnpiak. Zarh fatinte, Khrihfa upa hna nih kan zumhnak a fehtermi pumhnak hna kha ṭha tein an kan tuahpiak. (Lamkaltu 15:32) Mah aa pumpemi Khrihfa upa hna nih phungchimnak zong ah lam an kan hruai, phungchim ah kan kalṭi hna i phungchim ning phunphun kha an kan cawnpiak.

Pumpak in tha a kan pek. Pakhat cio thlaraulei kan herhmi bawmh awkah Khrihfa upa pawl cu biakinn asiloah kan inn ah an ra i Baibal in thazaag a kan pek. —Jeim 5:14, 15.

Khrihfa upa tampi cu Khrihfabu i an rian leng ah an pawcawmnak rian, an caan le an lungthin pek a haumi chungkhar rian dangdang zong an ngei. An rian ah aa zuammi mah unaupa pawl cu upatnak hmuh awkah an i tlak.—1 Thesalon 5:12, 13.

• Khrihfa upa pawl i an rian cu zeidah a si?

• Khrihfa upa hna nih pakhat cio kan zawn an kan ruah kha zeitindah an langhter?