Vawleicung paradis ah a zungzal in nuam te le dai tein um hna seh ti a kan duh!

‘Mah cu zeitikhmanh ah a si kho lai lo?’ tiah na ruah men lai. Baibal nih mah kha Pathian Pennak nih a kan tuahpiak khawh lai tiah a ti. Pathian nih mah Pennak kong le kan ca i aa tinhmi thil kong kha mi vialte nih hngal hna seh ti a duh.—Salm 37:11, 29; Isaiah 9:7.

Ṭhatnak hmu hna seh ti a kan duh.

Dawtnak a ngeimi pa nih a fale caah a ṭha bikmi thil a duhpiak hna bantukin vancung kan Pa nih i nuam zungzal hna seh ti a kan duhpiak ve. (Isaiah 48:17, 18) “Pathian duhnak a tuahmi cu zungzal in an nung” lai tiah bia a kan kamh.—1 Johan 2:17.

A lam kha zul hna seh ti a kan duh.

Sertu nih “a kan thimpiakmi lam” kha kan zulh khawh nakhnga mah lam kha cawnpiak a kan duh tiah Baibal nih a ti. (Isaiah 2:2, 3) Pathian nih vawleicung pumpi ah a duhnak kha mi sin chim awkah “a min putu dingah” miphun phunkhat kha a dirh.—Lamkaltu 15:14.

Amah biaknak ah an lung i rual hna seh ti a kan duh.

Jehovah biaknak nih mi kha ṭhencheuter loin dawtnak taktak a ngeihter hna i an lung a rualter hna. (Johan 13:35) Tuchan ah ahote nih dah hmunkip ah a ummi ahopaoh kha lungrual tein Pathian biak khawh ning kong kha an cawnpiak hna? Mah kong kha hi brochure in kawl awkah kan in sawm.