Khrihfa Grik Baibal ah Barnabas le lamkaltu Paul kong voi tampi aa ṭial. Annih cu khualtlawng rianṭuantu an si i hlanlio Khrihfabu hna kha an tlawng hna. Zeiruang ah? Zumtu unau pawl ca ṭhatnak kha lungtak in an ruah caah a si. Paul nih unau pawl zeitindah an um ti kha hngalh awkah ‘va tlawn ṭhan’ a duh hna. Anmah thazaang pek awkah meng a za in a rak kal. (Lamkaltu 15:36) Tuchan khualtlawng rianṭuantu hna zong nih cutin an tuah ve.

Thazaang pek awkah an kan tlawng. Peng zohkhenhtu pakhat cio nih Khrihfabu 20 hrawng kha an tlawn hna i Khrihfabu pakhat ah zarhkhat an cam i kumkhat ah voi hnih a kan tlawng. An hmuhtonnak in ṭhatnak tampi kan hmu, nupi a ngeimi an si ahcun an nupile sin zong in ṭhatnak kan hmu. Unau dihlak he theihhngalh an i zuam i phungchimnak ah kan kalṭi hna, cun Baibal cawnpiaknak zong ah a kan zulh. Khrihfa upa pawl he tuukhal lennak ah an kalṭi, pumhnak le peng civui ah thazaang a pemi phungchimnak an chim.—Lamkaltu 15:35.

Kan dihlak cungah siaherhnak an langhter. Peng Zohkhenhtu hna nih unau pawl thlaraulei sining kha lungtak in hngalh an duh. Khrihfa upa le Khrihfabu bawmtu hna he an i tong i Khrihfabu ṭhanchonak kha an i ruah, cun an rianṭuannak kong ah hmantlakmi ruahnak an cheuh hna. Hmaikal pawl kha an phungchimnak i hlawhtlin awkah an bawmh hna. Unau thar pawl he theihhngalh an i zuam i thlaraulei an ṭhanchonak kong kha an hngalh tikah an i nuam. Mah unaupa hna cu kanmah bawmh awkah aa pumpemi “rian ṭuan hawi” an si. (2 Korin 8:23) An zumhnak le Pathian sin an i pumpeknak kha kan i zohchunh awk a si.—Hebru 13:7.

• Peng Zohkhenhtu hna nih Khrihfabu kha zei tinhnak he dah an kan tlawn?

• An kan tlawnnak in zei ṭhatnak dah na hmuh khawh?