Kan bupi nih kum fatinte Baibal le a dang cauk nuai tampi kha an chuah i man loin mi kan pek hna. Biakinn le bethel zung hna kha kan sak i kan remh. Bethel i a ummi le missionary thong tampi kha kan zohkhenh hna i leiser ral a tongmi hna kha kan bawmh hna. Cucaah ‘mah ca i a dihmi tangka hi khoika in dah an hmuh?’ tiah na ruah men ko lai.

Cheuhra cheukhat pek le thawhlawm kholh a um lo. Phungchimnak rian caah a dihmi cu a tam tuk nain tangka kholh a um lo. A luancia kumzabu pakhat leng ah, Vennak Innsang mekazin uk hnihnak ah Jehovah cu a kan bawmtu a si tiah kan zumh caah “mi kha bawmhnak kan hal bal hna lo” tiah aa ṭial. A hal zong kan hal taktak bal hna lo.—Matthai 10:8.

Kan rian cu lungtho tein pekmi thawhlawm in ṭuanmi a si. Mi tampi nih Biabal cawnpiaknak kan rian kha an sunsak caah thawhlawm an pek. Kanmah Jehovah Tehte theng hna zong nih vawlei pumpi Pathian rian ṭuannak caah kan caan, kan thazaang, kan tangka le kan chawva kha lunglawm tein kan pek ve. (1 Chanrelnak 29:9) Biakinn, pumhnak le civui ah thawhlawm pek a duhmi hna caah thawhlawm kuang chiah a si. Asiloah kan website, jw.org in thawhlawm pek khawh a si. Tangka tamdeuh cu mi sawhsawh sin in hmuhmi a si, annih cu Jesuh nih a thangṭhatmi, biakinn tangka chiahnak ah phaisa sen pahnihte a thlami, a si a fakmi nuhmeinu bantuk an si. (Luka 21:1-4) Cucaah ahopaoh nih ‘kanmahle kan lungthin kan i thleh ning cio in’ pek awkah ‘kan hmuhmi a tlawm a tam ning cio khan’ hmaan tein kan “khon” khawh.—1 Korin 16:2; 2 Korin 9:7.

Jehovah nih a duhnak a tlin khawh nakhnga a Pennak rian bawmh awkah ‘an chawva in amah upat’ a duhmi hna kha an lung a thawhter zungzal hna lai ti kha kan zumh.—Phungthlukbia 3:9.

• Kan bu le biaknak dang aa thleidannak cu zeidah a si?

• Lungtho tein pekmi thawhlawm cu zeitindah hman a si?