Mi tampi nih Jehovah Tehte Hna timi min hi bu thar min ah an ruah. Asinain, a luancia kum 2,700 leng in Pathian nih a salle kha ka “tehte” tiah a rak ti cang hna. (Isaiah 43:10-12) Kannih cu 1931 tiang Baibal Siangngakchia tiah ti kan si. Cu a si ah zeicah Jehovah Tehte timi min hi kan i lak?

Mah kan min nih kan Pathian kha a langhter. Kut in ṭialmi hlanlio Baibal ah Pathian min, Jehovah hi voi 7,000 leng aa tel. Baibal an lehmi tampi ah Jehovah timi min kha Bawipa asiloah Pathian ti bantuk upatnak min in an thlen. Asinain, a hramthawk Baibal ah Pathian nih Moses sinah ka min cu Jehovah a si tiah a rak chimh i “hihi a zungzal in ka min a si” tiah a rak ti. (Exodus 3:15) Cuticun Pathian nih a hmaan lomi pathian dang hna he aa thleidannak kha a langhter. Cucaah a thiangmi Pathian min putu kan simi hi kan i porhlawtpi.

Mah kan min nih kan rian kha a langhter. Hlanlio midingmi Abel chan thawk in mi tampi nih Jehovah an zumhnak kong kha tehte an rak khaan. Kumzabu tampi chung ah, Noah, Abraham, Sarah, Moses, David le a dang zumtu pawl cu “hi tluk in a nganmi tehte bu” ah an i tel ve. (Hebru 11:4–12:1) Biaceihnak zung ah mi pakhat nih a sual lomi pa caah tehte a khaanpiak bantukin kannih zong Pathian kong biatak kha mi sin chim awkah bia kan khiak.

Mah min kan hman cu Jesuh kan i zohchunh caah a si. Baibal nih Jesuh kha “zumhawktlak le a hmaan taktakmi tehte” tiah a auh. (Biathlam 3:14) Jesuh nih Pathian sinah “na min cu ka langhter cang” tiah a ti bantukin Pathian kong “biatak” kha a rak chim taktak. (Johan 17:6; 18:37) Cucaah Khrih zultu taktak hna nih cun Jehovah min kha i lak in mi hngalhter a hau ve. Jehovah Tehte Hna nih cutin tuah an i zuam.

• Baibal Siangngakchia hna nih zeicah Jehovah Tehte timi min kha an i lak?

• Vawleicung ah zeitik in dah Jehovah tehte an rak um?

• A ngan bikmi Jehovah Tehte cu ahodah a si?