Kannih cu nawncek le leidip lakah lam hlatpi kal a hauh le nikhua a chiat hmanh ah hmaan tein kan i pum. Harnak kan ton bu le chun nitlak rian kan ṭuan i kan tha a baat buin Jehovah Tehte Hna cu zumtu khat pawl he i pumhṭi awkah zeicah kan i zuam?

Harnak tei awkah a kan bawmh. Pumhnak i unau pawl he kan i hawikomhnak he aa tlai in Paul nih ‘pakhat le pakhat nan zawn i ruat u’ tiah a ti. (Hebru 10:24) A chimduhmi cu pakhat le pakhat i theihhngalh awkah i zuam u tinak a si. Cucaah Paul chimmi bia nih unau pawl cungah siaherhnak ngeih awkah a kan forhmi a si. Unau pawl he kan i theihhngalhnak thawng in unau cheukhat nih kan tonmi harnak bantuk an tei khawhmi kha kan hmuh lai i kannih zong kan tonmi harnak tei khawh awkah a kan bawmh ve lai.

Kan i hawikomhnak a fehter. Kan i pumh tikah aa theihngal sawhsawhmi hna he si loin hawikom ṭha pawl he kan i pumṭi. A caan ah cun, hrimhnak a kan pemi nuamhsaihnak zong kan tuahṭi. Cutin kan i hawikomhnak in zei ṭhatnak dah kan hmuh? Pakhat le pakhat kan i sunsak deuh i kan i dawtnak a fehter chin. Mah nih harnak a tongmi unau pawl bawmh awkah timhcia a kan siter. (Phungthlukbia 17:17) Khrihfabu i a ummi unau dihlak he kan i hawikomhnak thawng in ‘pakhat le pakhat kan zawn kan i ruat.’—1 Korin 12:25, 26.

Nang zong Pathian duhnak a tuahmi hna he i hawikomh awkah kan in forh. Cu bantuk hawikom cu Jehovah Tehte Hna lakah na hmuh hna lai. Kanmah he i hawikomh kha zei thil hmanh i dawnhter hlah.

• Pumhnak i kan i hawikomhnak in zeitindah ṭhatnak kan hmuh khawh?

• Zeitik ah dah kan sinah naa pumh khawh lai?