Dawtmi unau hna:

Baibal ah tam deuh cu minung kong aa ṭial ti kha na hngalh ko lai. Tam deuh cu zumhfekmi nu, pa an si i kanmah bantukin harnak an tong ve. Annih cu ‘kanmah bantuk minung an si ve.’ (Jeim 5:​17) Cheukhat cu sifah harnak le lungretheihnak nih a nenh hna. Cheukhat cu chungkharmi le zumtu khat hna ruangah an lungre a thei. Cheukhat tu cu an tuahmi palhnak ruangah sualnak ka ngei tiah an ruah i an ngaih a chia.

Mah bantuk thil sining hna ruangah cheukhat cu Jehovah Pathian he an i hlat. Asinain Pathian kha a zungzal in an kaltak tinak a si maw? A si lo. Tam deuh nih cun Salm caṭialtupa bantukin hitin thla an cam: “Tuu tlau bantukin ka vai; cucaah ra law na sal hi ka kawl tuah, zeicahtiah na phunglam cu zeirel loin ka um hna lo.” (Salm 119:176) Nangtah cutin thla na cam bal maw?

Jehovah Pathian nih bupi he aa hlatmi a salle kha a philh hna lo. Cucaah zumtu khat hna sinin annih kha a bawmh hna. Tahchunhnak ah, Jehovah Pathian nih sifah harnak tampi a tongmi Job zeitindah a bawmh ti kha ruathmanh. Job cu a thilri vialte a sung dih, a fale an thi i hmachia nih a tlunh. A hawile zong nih in awkah a harmi bia in an ti. Job cu ri pakhat tiang a ruahnak a rak palh ko nain Jehovah Pathian kha a kaltak lo. (Job 1:​22; 2:​10) A ruahnak a hmaan nakhnga Jehovah Pa­thian nih zeitindah a bawmh?

Elihu timi zumtu khat kha hmangin Job kha Jehovah Pathian nih a rak bawmh. Elihu nih Job a intuarnak kha a ngaihpiak hnuah bia a chim. Zeidah a chim lai? Job kha sual a phaw lai maw asiloah sualnak ka ngei, ningzak ka si tiah a ruah nakhnga a chim lai maw? Job nakin ka ṭha deuh tiah aa ruat maw? Aa ruat lo. Pathian lamhruainak in Elihu nih hitin a ti: “Pathian mithmuh ahcun, kei zong nangmah bantukte ka si ko. Tlak pei khat ceo ka si ve ko.” Cun hitin zongin a ti chap: “Na ka ṭihnak nih na thin aan phanter awk a herh lai lo.” (Job 33:​6, 7) Elihu nih Job kha a lungre theihter canah dawtnak in a cawnpiak i tha a rak pek.

Kannih zong Elihu bantuk lungput he mah brochure hi kan chuahmi a si ti kha zaangfahnak in cinkenter kan in duh hna. Bupi sinin duhsah duhsah tein aa hlatmi hna i an sining le an intuarnak hna kha kan ngaih hmasa i ṭha tein kan tuaktan. (Phungthlukbia 18:13) Cun anmah bantukin a simi hlanlio zumhfekmi a salle hna kha Jehovah Pathian nih zeitindah a bawmh hna timi Baibal tuanbia hna kha thlacam bu in kan hlathlai. Hmanung bik chanthar ah a cangmi thil hna le Baibal tuanbia hna kha fonh in mah brochure hi kan chuahmi a si. Mah brochure hi hlathlai ve awkah dawtnak he forh kan in duh hna. Lungtak tein kan in dawt ti kha zaangfahnak in zum.

Jehovah Tehte Hna i Uktu Bu