ṬHEN 3
Lungfahnak—Lungsilonak Ruangah Lung A Fah Tikah
Unaunu pakhat nih ka tangka na fir tiah sual a ka puh. Mah kong kha unau dang nih an theih tikah amahlei keimahlei tiah ṭangin bia an hun chim. A hnuah ka fir lo kha a hngalh. Ngaihthiam a ka hal nain mifir tiah sual a ka puhmi cu zeitikhmanh ah ka ngaithiam kho lai lo.—Linda.
NANGTAH unau pakhatkhat ruangah Linda bantukin na lung a fak bal maw? Cheukhat cu midang an tuahsernak ruangah an lung a fak tuk i thlaraulei ah an tha a der. Nangtah cutin na si ve maw?
Ahonihdah “Pathian Dawtnak HeA Kan Ṭhen” Khawh Lai?
Kan lung a fahtertu unau kha ngaihthiam ding timi cu a fawi lo. Asinain Khrihfa hna cu pakhat le pakhat kan i dawt awk a si. (Johan 13:34, 35) Zumtu hawi pakhat nih a hmaan loin sual a kan puh ahcun lungfak in kan ngaih a chia kho.—Salm 55:12.
Khrihfa pakhat le pakhat kar ah “lungsilonak” a um kho ti kha Baibal ah a langhter. (Kolose 3:13) Mah bantuk lungsilonak hna kha mah theng nih ton hnu lawngah tawnghtham awkah a fawi lo kha kan hngalh khawh men. A kan bawm khotu thil pakhatkhat a um hnga maw? Baibal phunglam pathum in zoh hna u sih:
Vancung kan Pa nih zei zong vialte kha a hngalh dih. Kan tonmi dinlonak, mah ruangah a chuakmi thil hna i tel in a cangmi vialte kha Jehovah nih a hmuh dih. (Hebru 4:13) Mah lengah kan lung a fah tikah Pathian zong a ngaih a chia ve. (Isaiah 63:9) “Harnak nih maw, temhinnak nih maw” zumtu khat i tel in a dang thil pakhatkhat ruangah “Pathian dawtnak he” kan i hlat nakhnga Pathian nih zeitikhmanh ah nawl a pe lai lo. (Rom 8:35, 38, 39) Cucaah kannih zong aho ruang, zei ruang hmanhah Jehovah Pathian he i hlat kha kan duh awk a si lo.
Ngaihthiamnak cu sualnak hmuhpiak loin um kha a si lo. Kan cungah sualnak a tuahtu ngaihthiam cu a sualnak dinhdorh, hmuhpiak loin um le a sual ti langhter kha a si lo. Sualnak tuah kha Jehovah nih a ngaithiam kho lo. Asinain lungtak in aa ngaichihmi cu a ngaihthiam ti kha philhhlah. (Salm 103:12, 13; Habakkuk 1:13) Midang kha ngaithiam hna u tiah Jehovah nih a kan forhmi cu amah kha ka zohchunh u tiah a timi a si. Pathian cu zeitikhmanh ah “thinhung zungzal in a um lo.”—Salm 103:9; Matthai 6:14.
Midang cungah thinhun lo cu kan caah a ṭhahnem. Zeiti lam in dah? Mah tahchunhnak hi ruathmanh. A rit tuk lomi lung pakhat kha char in na cawi hei ti u sih. Chikkhat cu fawi tein na cawi khawh ko lai. Asinain mah lung kha saupi tiang na cawi ah tah? Zei caan tiang dah na cawi khawh lai? Minit tlawm pal maw? Nazi pakhat maw? Asiloah mahnak sau deuh in na cawi kho lai maw? Saupi na cawi ahcun na ban tha a thi lai. Lung a rihzan cu aa thleng lo. Asinain sau deuh cawi ah a rit deuhdeuh ve. Thinhunnak he aa tlai zongin cutin a si ve. Zei a si lomi thil hmete hmanhah kan thin a hun ahcun kanmahtu kan lung a fak lai. Cucaah midang ngaihthiam dingin Jehovah nih a kan halmi cu khuaruahhar awk a si lo. Kan ngaihthiam hna ahcun kan caah a ṭhahnem.—Phungthlukbia 11:17.
Midang cungah thinhun lo cu kan caah a ṭhahnem
“Jehovah nih Bia a Ka Ruahmi Bantuk a Si”
Unaunu pakhat i a tuahsernak kha lung chungah i cinken peng lo awkah Linda kha zeinihdah a bawmh? Pakhatnak ah, ngaihthiam ding timi Baibal kong kha a ruah caah a si. (Salm 130:3, 4) Pahnihnak ah, midang an sualnak kha kan ngaihthiam hna ahcun kan sualnak zong Jehovah Pathian nih a kan ngaihthiam ve lai ti kha Linda nih a hngalh caah a si. (Efesa 4:32–5:2) Mah kong hna nih Linda cungah zei ṭhatnak dah a chuahter ti kha hitin a chim: “Jehovah nih bia a ka ruahmi bantuk a si.”
A caan a zat tikah a lungfaknak kha Linda nih a tei khawh. Fir a puhtu unaunu kha Linda nih lungtak in a ngaihthiam caah atu cu hawikom ṭha an si cang. Linda nih Jehovah Pathian kha a biak ṭhan i a rian a ṭuan cang. Nang zong cu bantukin Jehovah Pathian nih bawmh aan duh ve ti kha zum.
Mah Kong Hna Zong Hi Na Duh Khawh Men
VENNAK INNSANG (CAWN AWK CAUK)
Zei Ruang Hmanhah Jehovah He I Hlat Hlah
Rian, nuamhsaihnak le chungkhar kong he aa tlaiin a ṭhami thimnak tuah khawh ning kha hlathlai.
