MIKIP nih lungretheihnak an ngei cio. Pathian salle zong an ngei ve. Salm caṭialtupa zong nih ‘lung­retheihnak a tam tuk’ tiah a rak ṭial. (Salm 94:​19, NW) A hleiin donghnak caan ah “khuasak tintuk harnak” ruangah Jehovah Pathian biak awk a har kho tiah Jesuh nih a chim. (Luka 21:34) Nangtah tangka, chungkhar le ngandamnak tibantuk buaibainak kong he aa tlaiin na lungre naa theihpimi a um maw? Mah hna kha tawnghtham khawh awkah Jehovah Pathian nih zeitindah aan bawmh khawh?

Lungretheihnak hna a tlau nakhnga kanmah ṭhawnnak in kan tuah kho lo. ‘Khatlei khatlei in an kan rial dip lengmang, lung aw ṭawm in kan um tawn, cei tein an kan ṭhuat tawn’ tiah Lamkaltu Paul nih a ṭial. Asinain ‘kan kek ngaingai bal lo, kan hnabei a dong bal lo, kan thi taktak bal lo’ ti zongin a chim. A si ahcun inkhawhnak ngeih awkah zeinihdah a kan bawmh lai? A lianngan bikmi Jehovah Pathian sinin a rami “thil ti khawhnak ṭhawnnak” nih a kan bawmh lai.​​—⁠2 Korin 4:​7-9.

Hlan ah “thil ti khawhnak ṭhawnnak” zeitindah na rak hmuh timi kong kha ruat ṭhan. Thazaang a pemi phungchimnak ruangah Jehovah i a fekmi a dawtnak cungah lungtak in naa lawmh tuk lio caan kha naa cinken ti maw? Paradis ruahchannak kong midang na chimh hna tikah Pathian biakam hna kha na hun zumh deuh a si ko lo maw? Kan i pumh tik le kan zumhnak kong midang kan chimh hna tik­ah khuasak tintuk harnak hna kha kan hun inkhawh lai i lungdaihnak he Jehovah Pathian kha lunglawm tein kan biak khawh lai.

Hneknak hna cu caan khatte ah khatlei khatlei in an ra tiah na ruah khawh men. Tahchunhnak ah, Pathian Pennak kha hmasa bik ah chiah awk le Pathian rianṭuannak ah hmaan tein i tel awkah Jehovah nih a kan hal. (Matthai 6:​33; Luka 13:24) Ralchanhnak, ngandamnak le chungkhar buaibainak hna ruangah na duh ningin na tuah khawh ti lo ah tah? Asiloah na rian ruangah Pathian rianṭuannak caah hman hngami a caan le thazaang na ngeih lo ah tah? Harnak a phunphun ton ruangah le mah hna kha tawnghtham awkah a caan le thazaang ngeih lo ruangah na lung a dong kho. Jehovah Pathian nih a ka halmi hi a tam tuk cang rua ti hmanh in lunghrinhnak na ngei kho.

Jehovah Pathian cu hngalhthiamnak a ngeimi a si. Kan pek khawh lo leng tiang in zeitikhmanh ah a kan hal lo. Cun lungthin he, taksa he tuarmi fahnak hna a tlau khawh nakhnga a caan pek a herh ti zong a hngalh.​​—⁠Salm 103:​13, 14.

Tahchunhnak ah, Jehovah Pathian nih profet Elijah zeitindah a zohkhenh ti kha ruathmanh. Elijah cu a lung a dong tuk i a thin a phan caah ramlak i a zaam tikah Jehovah nih chimhhrinh in a rian kha a ṭuanter ṭhan maw? A ṭuanter ṭhan lo. Elijah sinah a vancungmi kha Jehovah nih voihnih a rak thlah. Mah tik­ah vancungmi nih nem tein a thawh i rawl a pek. Mah bu hmanhah ni 40 tiang Elijah cu a thin a phang rih. Cucaah Jehovah nih amah bawmh awkah zeidah a tuah ṭhan? Pakhatnak ah, Jehovah nih a bawmh khawh kha a hmuhsak. Pahnihnak ah, “aw ṭhia aw dinte” in a hnemh. A donghnak ah, Pathian cungah zumhfek tein a ummi a thong in an um rih kha a chimh. Cucaah Elijah cu thazaang a hun ngei ṭhan i profet rian kha lungtho tein a ṭuan ṭhan. (1 Siangpahrang 19:​1-​19) Mah in zeidah hngalh khawh a si? Elijah nih lungretheihnak a ton lioah Jehovah nih lungsaunak le zawnruahnak he a peh­tlaih. Jehovah cu atu tiang aa thleng lo. Kannih zong cu bantukin a kan zohkhenh lai i a kan bawmh ve lai.

Jehovah Pathian caah zeidah ka tuah khawh lai tiah ruah tikah a sining taktak in ruah thiam a hau. Atu ah na tuah khawhmi thil hna kha hlan ah na tuahmi thil hna he tahchunh ṭhan hlah. Mah tahchunhnak hi ruathmanh: Thla tampi, kum tampi chung eksasai a tuah ti lomi tlik aa zuammi pakhat cu hlan ah a tuah tawnmi eksasai hna kha a tuah ṭhan colh kho lai lo. Inkhawhnak le thazaang a ngeih nakhnga eksasai pakhat kha hmuitinh ngei in duhsah tein a tuah a hau. Khrihfa hna zong tlik aa zuammi hna he kan i lo. An lungthin ah a fiangmi hmuitinh ngeih bu in eksasai kha an tuah. (1 Korin 9:​24-​27) Nang zong atu caan thawk in na tuah khawh hngami hmuitinh pakhat kha chia in na tuahchunh ahcun a ṭha lai lo maw? Tahchunhnak ah, i pumh awkah hmuitinh na ngei kho. Na hmuitinh phanh khawh awkah ka bawm tiah Jehovah sinah thla na cam khawh. Thlaraulei ah thazaang na hun ngeih ṭhan tik­ah ‘Jehovah a ṭhatnak kha na hngalh’ lai. (Salm 34:​8, NW) Jehovah na dawt na langhtermi zeibantuk tuahsernak paoh cu a hmemi thil a lawh hmanh­ah Pathian nih a sunsak ti kha philhhlah.​​—⁠Luka 21:​1-4.

Jehovah sinah kir ṭhan awkah June kha Pathian nih zeitindah thazaang a pek? Hitin a chim: “Ka bawm ko tiah Jehovah Pathian sinah thla ka cam peng. Kan khua ah peng civui a um lai tiah ka monu nih a ka chimh. Mah tikah nikhat tal cu kaa pum ve lai tiah bia ka khiah. Jehovah i a miphun he ton ṭhannak caanṭha hmuh cu zeitlukin dah a nuamh. Mah civui cu ka herhmi thapeknak pakhat a si. Atu cu Pathian kha bia in a rianṭuannak ah lunglawm tein kaa tel ṭhan cang. Cucaah ka nunnak cu sullam a hun ngei deuh. Unau hna i an bawmhnak ka herh ti kha atu cu ka theihthiam cang. Jehovah Pathian sinah kir ṭhan awkah a caan ka ngeih rih caah kaa lawm tuk.