PATHIAN sinah na kir ṭhan tikah Pathian nih aan don lai ti kha zum. Lungretheihnak tlau awk, lungfahnak dam awk le chiaṭha thleidannak lungthin thiang in hmuhmi lungdaihnak kha hmuh awkah Pathian nih aan bawmh lai. Mah hnuah Jehovah Pathian i a rian kha zumtu khat hna he ṭuanṭi ṭhan khawh awkah thazaang na ngei lai. ‘Tuu a tlaumi bantukin nan tlau cang, atu cu nanmah aan zohkhenhtu tuukhal sinah kir ṭhan u’ tiah lamkaltu Piter nih a timi hna kum zabu pakhatnak i Khrihfa hna he na sining cu aa lo lai.​​—⁠1 Piter 2:​25, NW.

Na tuah khawhmi lakah a ṭha bikmi cu Jehovah sinah kir ṭhan kha a si. Zeicah? Jehovah Pathian lung na lawmhter lai caah a si. (Phungthlukbia 27:11) Jehovah Pathian cu intuarnak a ngeimi a si caah kan tuahsernak nih a hnorsuan khawh. Asinain Pathian nih amah kha daw in biak awkah hramhram in a kan hne lo. (Deuteronomi 30:​19, 20) Pathian kha lungthin dihlak in dawtnak he biak awkah mah tein i thim a herh. Cutin kan tuah tikah Pathian cungah zumhfek tein kan um ti kha kan langhtermi a si. Mah cu Pathian caah a sunglawimi laksawng a si caah Pathian kha a lung a lawmhter tuk. Jehovah Pathian pakhat lawng nih a hmuh awk a simi biaknak kha kan pek caah kan hmuhmi lunglawmhnak cu zei he hmanh tahchunh khawh a si lo.​​—⁠Lamkaltu 20:35; Biathlam 4:⁠11.

Mah lengah Pathian na biak ṭhan tikah Pathian he nan i pehtlaihnak zong a ṭha ṭhan lai. (Matthai 5:⁠3) Zeiti lam in dah? ‘Zeicah kan nun hnga?’ tiah vawlei pumpi ah a ummi mi tampi nih an ruah. Nun hnawhchanmi kong he aa tlaimi biahalnak hna i a phi kha hngalh an duh tuk. A ruang cu mah bantuk hngalh duhnak lungthin he Jehovah Pathian nih a kan ser caah a si. Amah biaknak thawngin lunglawmhnak hmuh awkah a kan ser. Pathian kha lungthin dihlak in dawtnak he ka biak timi hngalhnak in hmuhmi lunglawmhnak nakin a ṭha deuhmi thil zeihmanh a um lo.​​—⁠Salm 63:​1-5.

Jehovah Pathian nih kirter ṭhan aan duh ti kha zaangfahnak in philhhlah. Mah cu zeitindah na zumh khawh? Mah kong hi ruathmanh. Mah brochure hi atu le atu thlacam in ruah hnuah ṭha tein timhpiakmi a si. Khrihfa upa asiloah unau pakhat nih mah brochure hi na caah aan put khawh. Mah tikah brochure kha rel in na hngalhmi ningin tuah awkah aan forh lai. Mah vialte cu Jehovah nih aan philh lo ti a langhtermi tehte a si. Phun dang in chim ahcun Pathian nih a sinah kir ṭhan awkah nem tein aan sawmmi a si.​​—⁠Johan 6:​44.

Jehovah Pathian nih a tlaumi tuu hna kha zeitikhmanh ah a philh hna lo timi cu thazaang petu a si. Unaunu Donna nih cutin a ruah caah lunglawmhnak he hitin a chim: “Biatak he duhsah duhsah in kaa hlat. Asinain ‘Maw Pathian, ka pur cikcek law ka lungthin hi hngal ko. Ka hneksak law ka ruahnak hi hmu ko. Ka chungah hlenthawinak a um sual hnga maw? a um sual ahcun ka hmuhpiak law zungzal hmunmi lam ah khan ka hruai ko’ timi Salm 139:​23, 24 ah aa ṭialmi bia kha atu le atu ṭha tein ka ruah. Kei cu vawlei he i peh­tlaih khawh a si lo, zeitikhmanh zongah kan i tlak kho lai lo, ka umnak ding hmun cu Jehovah Pa­thian i a bupi a si ti kha ka hngalh cang. Jehovah Pathian nih zeitikhmanh ah a ka hlaw lo, amah sinah kir ṭhan ding a si ti kha ka hun hngalh­thiam. Ka kir ṭhan khawh caah kaa lawm tuk!”

‘Jehovah Pathian pekmi lunglawmhnak’ kha nang zong na hmuh ṭhan khawh nakhnga lungtho tein thla kan in campiak. (Nehemiah 8:​10, NW) Jehovah Pathian sinah kir ṭhan. Zeitikhmanh ah naa ngaichih lai lo.