Mah thil sining hi na mitthlam ah cuanter hmanh: Thang Te cu siang­inn a kaiṭi hawi pahnih an ratmi kha a hmuh tikah a si a vang. Tu zarh chungah a hawile nih kuak zuk an hnekmi hi voihnih a si cang. Voi­thumnak an hnek ti lai maw?

Pakhatnak pa nih:

“Ka hawi” tiah a mitṭheh pah in a ti ko nain a zaal chungin thil pakhat kha a chuah i Thang Te kha a pek.

Thang Te nih a kut i kuak kha a hmuh tikah a si a vang chinchin.

Thang Te hei si law zeitindah na tuah lai?

Thang Te i a ṭhirual pawl nih an tuahsernak kha ṭha tein an ruah hnuah an tuahmi maw a si? Anmah biakhiahnak ningin an tuahmi maw a si? Mah cu a si kho lo. Annih zong midang nih an hnek hna caah a si kho men. Ṭhirual pawl lungton an duh caah an tuahmi a si.

Mah bantuk thil sining ton ahcun zeitindah doh khawh a si?

1. A HLANKAN IN HMU LAW I TIMHTUAH

   Baibal nih hitin a ti: “Mifim nih cun harnak a rat kha a hmuh tikah hrial khawhnak aa zuam, sihmanhsehlaw mihrut nih cun a pahchih thluahmah ko i a hnuah aa ngaichih.”​—Phungthlukbia 22:3.

   Tam deuh cu buaibainak kha a hlankan in hmuh thiam a hau. Tahchunhnak ah, lam hlat nawn ah sianginn na kaiṭi hawi phu, phukhat nih kuak an zuk hei ti u sih. Nang zong kuakzuk dingin an ka hnek lai ti kha a hlankan in hmu law i timhtuahcia.

2. A HLANKAN IN RUAT

   Baibal nih hitin a ti: “Nan chiaṭha thleidannak lungthin kha thiang tein umter u.”​—1 Peter 3:16.

   Nangmah le nangmah hitin i hal: ‘Anmah he ka umṭi peng ahcun a hnuah zeidah a cang kho?’ A hramthawk ahcun an in cohlan ko lai. Asinain a hnuah zeitindah na um lai? Siang­inn kaiṭi hawi hna i an duhnak zulh duh ah na dir hmun kha na ṭhum lai maw?​—Exodus 23:2.

3. BIAKHIAHNAK TUAH

   Baibal nih a hitin a ti: “Mifim cu ralring tein a um.”​—Phungthlukbia 14:16.

   A hnuah cun nangmah tein biakhiahnak na tuah lai i mah na biakhiahnak i a phichuak ningin na nun a hau lai. A hmaanmi thil tuah dingin biakhiahnak a rak tuahmi Josef, Job le Jesuh kong kha Baibal ah aa ṭial. Cun a hmaan lomi thil tuah dingin biakhiahnak a rak tuahmi Kain, Esau le Judas Iskariot kong zong aa ṭial. Nangtah zei bantuk mi dah si na duh?

Baibal nih hitin a ti: “Ṭhatnak kha tuah u.” (Salm 37:3) A phichuak kha a hlankan in ruah in i timhtuah ahcun naa tlaihmi kong kha fawi tein na chim khawh lai lengah ṭhathnemhnak a um zong kha na hmuh lai.

Na thinphang hlah​—ṭhirual pawl kha cawnpiak an hau lo.Ka tuah lai lo tiah hlangfang tein na ti hna ahcun a za ko. An duhnak na zulh hna lai lo kha fiang tein an hngalh nakhnga hitin na ti khawh hna:

• “Keimah cu rak ka ruat duh hlah u!”

• “Ka tuah lai lo!”

• “Ka tuah lai lo ti kha nan hngalh ko cu ta!”

A biapi bikmi cu hlangfang tein al colh kha a si. Cutin na tuah ahcun na ṭhirual pawl nih an in hnek ti lai lo i an in kaltak ko lai.

Ṭhirual pawl nih an in nihsawh ahcun zeidah na tuah lai? “Zeidah a cang, mi ralchia ma na si?” tiah an in ti ah tah. Mah cu mino pawl nih an tonmi hneknak phunkhat a si ti kha philhhlah. Zeitindah na lehrulh lai? Tawnghtham ning phunhnih a um.

• Nihsawhnak na ton tikah inkhawhnak ngei. (“Na chimmi cu

  a hmaan, mah bantuk cu ka ṭih!” tiah ti law a ruang kha a tawi­nak in chim.)

• Amah kha hnek ṭhan. Na alnak a ruang kha chim law a ralṭhatnak kha thangṭhat. (“Nang cu kuakzuk na ṭih lo ti” tiah ti ṭhan.)

Ṭhirual pawl nih an in nihsawh peng rih ahcun kaltak hna. An sinah na um peng ahcun an in hnek peng ko lai. Cutin na kaltakmi hna cu an in hnekmi ningin na tuah lo ti kha na langhtermi a si.

Ṭhirual hneknak cu na hrial kho lai lo. Asinain zeidah ka tuah lai, ka tonmi thil sining hi zeitindah ka tawnghtham lai timi tu cu biakhiahnak na tuah khawh. A bik in cun nangmah tein naa thim dingmi a si.​—Joshua 24:15.