Mah thil sining hi na mitthlam ah cuanter hmanh: David cu a phanh bal lonak hmun ah mawṭaw a mawng. Signboard an taarmi kha a zoh tikah a kal duhnak hmun a si lo ti kha a hngalh. Lam ka tlau cang ti kha a hun hngalh. Lamṭe pakhat kha a zulh sual caah a si lai.

David hmun ah hei um law zeidah na tuah lai?

Tawnghtham khawhning a um ko.

1. Bawmhnak na hal khawh.

2. Khuaram hmanthlak asiloah GPS in na kawl khawh.

3. Lam hmaan ka hmu hnga maw tiah na mawngh peng khawh.

A donghnak ningin na tuah ahcun ṭhathnemhnak a um lai lo.

Pahnihnak cu pakhatnak nakin a ṭha deuh. Khuaram hmanthlak asi­loah GPS na ngeih ahcun na kal duhnak hmun kha phanh khawh awkah lam aan hruai lai.

Baibal nih cu bantuk bawmhnak aan pek khawh!

Vawleicung ah an manh bikmi cauk a si i

• nunnak ah tonmi buaibainak hna caah lamhruainak a um

• na kong kha ṭha tein aan hngalhter khawh i miṭha pakhat si awkah aan bawmh khawh

• a ṭha bikmi nunnak ngeih awkah lam aan hruai khawh

Holh kan thiamle cangka in biahalnak hna kan tuah.

• Zeicah van khi a dum?

• Arfi khi zei in dah ser an si?

A hnuah vawlei thil sining kong he aa tlaiin biahalnak kan tuah.

• Zeicah ṭhatlonak hi a um?

• Zeicah kan thih?

Mah biahalnak hna i a phi cu hlanliopi in Baibal ah a um cang.

Baibal cu tuanbia cauk a si, chan he aa tlak ti lo, hngalhthiam awkah a har tuk tiah an ti. A poi taktakmi cu Baibal maw a si asiloah mi nih Baibal an hngalhthiamning dah? Annih cu hlen an si caah maw?

Tahchunhnak ah, Pathian nih vawlei a uk tiah Baibal nih a ti tiin an ruah. Asinain zeitindah a si khawh lai? Vawleicung pumpi ah harnak le ngaihchiatnak in a khat, zawtnak le thihnak a um, sifahnak le leiser ral a um. Mah vialte cu dawtnak a ngeimi pathian ruangah zeitindah a si khawh lai?

A phi hngalh na duh maw? Baibal nih vawlei uktu kong a chimmi na hngalh tikah na khuaruah a har ko lai!

Mah brochure ah aa telmi ruahnak cheuhnak hna cu Baibal cungah hram aa bunhmi a si ti kha na hngalh ko lai. Baibal nih a ṭha bik in lam a kan hruai khawh ti kha Jehovah Tehte Hna nih fek tein an zumh. Baibal cu “Pathian thaw chuah hnawhmi a si i biatak cawnpiaknak caah le palhnak cawnpiaknak alnak caah le palhmi remhnak caah . . .a ṭhahnemmi a si.” (2 Timote 3:16, 17) A hlun cang ko nain chan he aa tlakmi Baibal cauk kha nangmah theng nih hlathlai hmanh.