Mah thil sining hi na mitthlam ah cuanter hmanh: Julia nih thlalang aa zoh tikah a thau tukmi in aa hmuh. A nulepa le a hawile nih “funghreu” bantuk na si tiah an ti bu hmanhin “i derter deuh ka hau” tiah a ti.

Julia nih “pound nga” hrawng ṭum deuh awkah fakpi in kaa zuam a herh tiah a ruah. Cucaah nithum, nili chung hrawng rawl ei loin a um.

Nangtah Julia bantukin na ruah ve ahcun zeidah na tuah khawh?

Muisam kong ah lungretheih cu a palh lo. Baibal zongah Sarah, Rachel, Josef, David le Abigail tibantuk nupa hna i an i dawhnak kong kha a langhter. Baibal ah Abishag timi nu cu “aa dawh ngaingaimi a si” tiah a ti.​—1 Siangpahrang 1:4.

Asinain mino tam deuh cu an muisam kha biapi tuk ah an chiah. Mah tikah buaibainak nganpi a chuak kho. A tanglei kong hna

hi ruathmanh:

• Hlathlainak pakhat ningin, nu zatuak ah 17 lawng a thau tukmi an si nain zatuak ah 58 nih kan thau tuk tiah an ruah.

• A dang hlathlainak ningin, rihzan amah ning peng a simi nu zatuak ah 45 nih anmahle anmah kan thau tuk tiah an ruah.

• Mino cheukhat cu i derter deuh an duh caah an nunnak caah

  ṭihnung a si tiangin rawl ei loin an um i rawl ei loin umnak zawtnak hmanh an hun ngei.

Rawl ei loin umnak zawtnak ngeih asiloah rawl eimi a hmaan ti lo ahcun bawmhnak hal hna. Nulepa asiloah zumhawktlakmi upa pakhatkhat kha theihter hna. Baibal nih hitin a ti: “Hawikom nih cun zeitik paohah dawt zungzal a si, u le nau cu harnak i hrawm awkah hrin kan si.”​—Phungthlukbia 17:17.

A taktak ti ahcun midang lungthin a la khomi cu chunglei minung a si. Hlanlio Isreal Siangpahrang David fapa Absalom kong kha ruathmanh. Baibal ah a kong kha hitin a ti:

Israel mi vialte lakah dawhlei ah Absalom tluk in thangṭhat awk ahohmanh an um lo; . . . soisel awk pakhat hmanh a um lo.”​—2 Samuel 14:25.

Asinain Absalom cu aa porhlaw, a hmuitinh a sang i zumhawktlak lomi a si. Cucaah Baibal ah Abasalom i a ṭhatnak kong kha langhter loin zumhawktlak lomi le ralchanh a hmangmi lainawng pakhat in a langhter.

Baibal nih hitin ruahnak a kan cheuh:

‘Mi thar kha i hruk u.’​—Kolose 3:10.

“Lenglei i ṭamhnak . . . ah khan nan i dawhnak cu a um awk a si lo, nan i dawhnak cu nan chung muru ah a um awk tu a si”​—1 Peter 3:3, 4.

Dawh duh cu a palh lo nain muisam nakin a biapi deuhmi cu lungput a si. Caan sau caah cun na sining ṭha hna nih zoh remmi pumrua, muisam dawhnak nakin minung lungthin a lak khawh deuh. “Aa dawhmi cu mi nih zoh an duh deuh hna. Asinain mi nih an i cinkenmi cu sining ṭha hna kha a si” tiah Phylicia timi nu nih a ti.

Na muisam ruangah a caancaan ah na lung a rawk bal maw?

Khuaihlai awk le i derter awkah na ruat bal maw?

A si khawh ahcun zei hna dah i remh na duh? (Na duhmi dihlak kha kulh.)

• HEIGHT

• NA RIHZAN

• NA SAM

• NA PUMRUA

• NA HMAI

• NA TAKSA RONG

A hmasa biahalnak pahnih kha rawk, ruat tiah na ti i a pathumnak biahalnak ah pathum naktam na kulh ahcun na muisam kha na duh lo nain midang nih cutin an hmu lo ti kha philhhlah. Muisam kong ah lungretheih tuk cu a phung a si kho. Lungretheihnak hna kha tawnghtham khawh a si ko.​—1 Samuel 16:7.