Mah thil sining hi na mitthlam ah cuanter hmanh: Nithum zan ah, kum 17 a simi Geoff cu inn rian a ṭuan dih hnuah dai tein kaa din cang lai tiah a ruah. Cucaah TV kha a piah i a ṭhut tawnnak ṭhutdan ah siarem ngai tein a ṭhu.

Mah lioah a pa a rak ṭin, a pa cu a lung a buai ngaimi a lo.

Nangtah Geoff hei si law mah bantukin bia i alnak tiang a chuah nakhnga lo zeitindah na tuah khawh?

Leah nih hitin a ti: “Ka pa he i chawnhbiak cu a har. A caancaan ah cun ka chawnhmi kha a ka ngiahpiak lo. Sau nawn a rauh hnuah ‘aw keimah ma na ka chawnh’ tiah a ka ti tawn.”

 RUAT ṬHAN

Nulepa he i chawnhbiak cu mawṭaw mawngh he aa lo. Lam a pih hmanhah lam dang kha kawl in na kal kho ko. Lam a pih hmanhah lam dang in na kal khawh bantukin nulepa he i chawnhbiak awkah lam na kawl khawh ko

LEAH NIH A TLAWM BIK­AH THIL PATHUM AA THIM KHAWH.

1. A pa kha a au hnawh.

   “A biapimi bia kaan chimh, ngaita rih!” tiah Leah nih a pa kha a au hnawh.

2. A pa kha a chawn ti lo.

   Leah nih a tonmi buaibainak kong kha a pa chimh dingin aa tim ko nain a chim ti lo.

3. Thil sining a ṭhat caan kha hngak in a kong­lam kha a ruah ṭhan.

   Leah nih a hnutu ah a tonmi buaibainak kong kha a pa he hmaitonh in i ruah asiloah caṭial in a theihter.

Leah nih zeidah aa thim ding a si tiah na ruah?

RUATCHUNH: Leah a pa cu a lung a buai caah a fanu nih buaibainak a tonmi kha a theihpiak lo. Leah nih Thim Khawhmi A kha aa thim hei ti u sih. A au hnawhnak kong kha a pa nih a theithiam lai lo. Mah lengah a chimmi bia kha a pa nih a ngai duh lai lo i a pa a upat lo zong a si lai. (Efesa 6:2) Cutin a si ahcun Leah nih a herhmi bawmhnak zong kha a hmu ti lai lo.

Thim Khawhmi B cu a fawi bikmi a si ko nain a ṭha bikmi cu a si lo. Zeicah? Leah nih buaibainak kong kha hlawhtling tein tawnghtham a duh ahcun a pa he bia an i ruah a hau. A pa zong nih a fanu kha bawmh a duh ahcun a fanu nih a tonmi kong kha a hngalh a hau. Chawnh loin a um ahcun zeihmanh a ṭhahnem lai lo.

Thim Khawhmi C ah cun Leah cu lam khamnak a tong ko nain a lung a dong lo. Mah canah a tonmi buaibainak kong kha caan dangah chimh dingin aa zuam. A pa kha caṭial in chimh awkah aa thim ahcun lungdaihnak a hmuh colh khawh.

Caṭial in a chimh caah a chim duhmi kong zong kha a dikthliar in a chimh khawh. A pa nih mah ca kha a rel tikah zeidah a chim duhmi a si ti kha a hngalh lai i a theihthiam deuh lai. Cucaah Thim Khawhmi C cu an pahnih caah a ṭhahnem. Hmaitonh in chimmi a si ah, caṭial in chimmi a si ah ‘daihnak a chuahtertu thil kha i tinh u’ timi Baibal forhfialnak zulh zong a si.​​​—⁠​Rom 14:​19.

Leah nih a dang zei thim awk dah a ngeih rih?

Na ruahmi a um ahcun a tanglei ah ṭial. Zei ṭhathnemhnak dah a um lai ti zong kha ṭial.

Na chim duhmi cu phundang, nulepa nih an theihthiammi cu phundang

a si kho ti kha i cinken.

TAHCHUNHNAK AH:

Nulepa nih ‘zeicah na mithmai a chiat’ tiah an in hal hei ti u sih. Mah tikah “Mah kong cu chim ka huam lo” tiah na leh hna.

Asinain nulepa nih cun “a hawile tu cu a chimh hna. Nulepa tu cu a kan zumh lo caah a kan chim duh lo” tiin an theihthiam.

Buaibainak pakhat na tong i nulepa nih ‘zeidah kan in bawmh lai’ tiah an in hal hei ti u sih. “Nan thinphang hlah u. Keimah tein ka tawnghtham khawh ko” tiah na leh hna.

• Nulepa nih hitin an theihthiam khawh men:

• A ṭhat deuh nakhnga hitin na chim khawh: