Mah thil sining hi na mitthlam ah cuanter hmanh: A hawile he bawlung an chuih lioah Aa Bawi a chuihmi bawlung nih inn pawng hna i thlalang kha a khen i a kuai.

Aa Bawi hei si law zeidah na tuah lai?

TAWNGHTHAM NING PATHUM NA NGEI:

1. Na tli lai.

2. Midang kha sual na puh hna lai.

3. Inn pawng hna kha a hmaanning tein na chimh hna lai i na liam lai.

Tawnghtham ning A kha i thim na duh ko lai. Asinain thlalang a kuaimi a si ah, a dang thil pakhatkhat a cangmi a si ah na palhnak phuan cu a ṭha bikmi tawnghtham ning a si.

1. Palhnak phuan cu tuah a herhmi a si.

   Baibal nih hitin a ti: “A hmaanmi thil kha tuah kan duhmi a si zungzal.”​​​—⁠​Hebru 13:​18.

2. Palhnak phuan ahcun mi nih an ngaihthiam tawn hna.

   Baibal nih hitin a ti: “A palhnak kha a thupmi cu khua-awng

   a tong lai lo, sihmanhsehlaw a phuang i a hlawmi nih cun zaangfahnak a hmuh lai.”​​​—⁠​Phungthlukbia 28:​13.

3. A biapi bikmi cu palhnak phuan kha Jehovah Pathian nih a duh.

   Baibal nih hitin a ti: “Mi lungthin ṭhalo cu BAWIPA caah fihnung an si i miding mi cu Pathian nih a zumhmi an si.”​—Phungthlukbia 3:32.

Kum 20 a simi Karina nih mawṭaw rang tukin a mawngh caah dan an tatmi kha a pa a chim lo. Asinain a zungzal in cun a thup kho lo. “Kum khat hrawng a rauh hnuah ka pa nih ka min in dantat ka simi kha a hmuh. Cucaah buaibainak ka tong” tiah Karina nih a ti.

Zeidah kan i cawn khawh? Karina nih hitin a chim: “Palhnak thuhnak nih thil sining a chiatter chin. A hnuah kan in ṭhan.”

Baibal nih hitin a ti: ‘Kan dihlak hin atu le atu palhnak kan tuah cio tawn.’ (Jeim 3:2) Palhnak phuan cu toidornak ngeih le nutling patling si a langhtermi hmelchunhnak a si. Tuah colh dingmi zong a si.

Cun palhnak tuah sualmi in i cawn awk a si. Vera timi nu nih hitin a chim: “Ka tuah sualmi palhnak hna in ka cawn. Mah palh­nak hna kha a hnuah tuah sual ti lo dingin kaa zuam.” Na tuah ­khawhmi kha zoh hna u sih.

Na pa cycle kha naa cit i a rawk. Zeidah na tuah lai?

• Zeihmanh chim loin na um. Ka pa nih a hngal lai lo tiah na ruah.

• A hmaanning tein na pa kha na chimh.

• Thil sining kha na pa na chimh ko nain midang kha sual na puh hna.

Ca na zoh lo caah camipuai na sung. Zeidah na tuah lai?

• Camipuai kha sual na puh.

• Naa zuam lo ruangah camipuai na sunghmi a si kha na cohlan.

• aya nih hramhram in a ka sunghtermi a si tiah na ti.

 Atu nangmah le nangmah kha (1) na pa in le (2) na saya in i ruat. Na palhnak kha fawi tein na phuan ahcun na pa le na saya nih zeitindah an in hmuh lai? Na palhnak kha na thuh ahcun zeitindah an in hmuh lai?

A luanciami kum chungah na tuahmi palhnak pakhat kha ruat law a tanglei i biahalnak hna hi phi chunhmanh.

Zei palhnak dah ka tuah? Mah kha zeitindah ka tawnghtham?

• Ka thuh.

• Midang pakhat kha sual ka puh.

• Ka palhnak ka phuan colh.

Palhnak na phuan lo ruangah a hnuah zeitindah na um?

• A ṭhatning​—Ahohmanh nih an hngal lo!

• Sualnak ka ngei​—A hmaanning tein ka chim awk a si.

Thil sining a ṭhat deuh nakhnga zeitindah na tuah khawh?

Palhnak in zeidah naa cawn?

Mi cheukhat nih zeicah an palhnak kha an phuan duh lo?

Palhnak thuh aa zuam pengmi kha mi nih zeitindah an hmuh hna? Palhnak a phuangmi kha mi nih zeitindah an hmuh?​​​—Luka 16:10.