BIAHALNAK 5

Nehsawhnak Ka Ton Ahcun Zeidah Ka Tuah Lai?

AWNG

ZEICAH A BIAPIT?

Na lehrulh ning nih thil sining kha a ṭhatter khawh deuh bantukin a chiatter khawh deuh.

NANGMAH SI LAW ZEITINDAH NA TUAH LAI?

Mah thil sining hi na mitthlam ah cuanter hmanh: Thomas cu tu ni sianginn kai a duh lo. Thaizing zong, ni dang zongah kai a duh ti lo. Mah cu a luanciami thla thum in aa thawk, a khaanhawi pawl nih a kong kha a hmaan loin an chim. Caponak min hna in an auh. A caancaan ah pakhatkhat nih Thomas aa putmi cauk kha a tlak nakhnga a cang sualmi bantukin an benghpiak asiloah pakhatkhat nih a hunlei in an nam i a zoh hna tikah a thei lomi bantukin an i umter. Ni zan cu a zual chin. Thomas kha online in tlerhkhonhnak ca hmanh an rak kuat.

Thomas hmun ah hei um law zeitindah na lehrulh lai?

RUAT ṬHAN

Bawmtu a ngei lomi cu na si lo. A taktak ti ah cun nehsawhtu kha kuttum hmang loin na lehrulh khawh ko. Zeiti lam in dah?

LEHRULH ṬHAN HNA HLAH. Baibal nih hitin a ti: “Mihrut nih cun a thinhunnak kha a langhter, Sihmanhsehlaw mifim nih cun dai tein a um i aa sum.” (Phungthlukbia 29:11) A si khawh chung in dai tein na um ahcun nehsawhtu hna nih an in nehsawh huam ti lai lo.
TEIRUL CHAM HNA HLAH. Baibal nih hitin a ti: ‘Ṭhatlonak kha ṭhatlonak in va lehrul hlah u.’ (Rom 12:17) Teirul chamnak nih thil sining kha a chiatter chin.
BUAIBAINAK AH I TEL HLAH. Baibal nih hitin a ti: “Mifim nih cun harnak a rat kha a hmuh tikah hrial khawhnak aa zuam.” (Phungthlukbia 22:3) Nehsawh a hmangmi hna le nehsawhnak ton khawhnak thil sining hna kha a si khawh chungin hrial.
AN I RUAHCHAN LOMI LAM IN LEHRULH HNA. Baibal nih hitin a ti: “Lehnak nem nih thinhunnak a damter.” (Phungthlukbia 15:1) Capo hmanh na saihpiak khawh hna. Tahchunhnak ah, nehsawhtu nih ‘na thauning cu, vok na si ko’ tiah aan ti ahcun, “Aw ta, tlawmpal i derter deuh ka hau” tiah na leh khawh.
HRIAL HNA. “Holh lo tein na ummi nih hnahnawhnak an petu hna nakin nutling patling deuh na si le na ṭhawn deuh kha a langhter. Nehsawhtu hna nih an ngeih lomi mahle mah i sumnak na langhtermi a si” tiah kum 19 a simi Nora nih a chim.—2 Timote 2:24.
MAHLE MAH ZUMHNAK NGEIH KHAWH DINGIN I ZUAM. Nehsawhtu hna nih mahle mah zumhnak a ngei lomi le ṭihnak a ngeimi hna kha hmuitinh ah an chiah hna. Asinain tlerhkhonh paoh in a ṭihlomi kha cu an hrial hna.
PAKHATKHAT KHA CHIM HNA. “Ahopaoh an si ah nehsawhnak an ton ahcun phuan dingin ka forh hna. Mah cu tuah dingmi a si. Midang kha nehsawh ti hna lo dingin huhphenh zong a si” tiah Sayamah a rak ṭuan balmi nih a chim.

Mahle mah zumhnak na ngeih ahcun nehsawhtu nih a ngeih lomi ṭhawnnak na ngeih a si

NA HNGAL MAW?

Nehsawh timi ah pumsalei fahnak pek lawng a si lo. A tanglei i thil sining hna zong hi aa tel kho men:

Bia in nehsawhnak. “Caponak min in an ka auhmi le an chimmi bia hna kha zeitikhmanh ah ka philh kho lo. San a tlailomi, zei ah rel lomi le zeihmanh a hngal lomi in kaa ruat. Cutin an ka timi cu taksa a fahmi nakin in awkah a har deuh.”—Celine, kum 20.
Komh duh lonak. “Ka sianginn kai hawi pawl nih an ka kom duh lo. Chuncaw ei tikah ṭhutnak hmun an ka pek lo caah anmah he ka ṭhu kho lo. Kum khat chung ka mitthli he keimah lawngin rawl ka ei.”—Haley, 18.
Online hmangin nehsawhnak. “Computer keyboard hmehnak men in mi pakhat kha a min chiat dingin asiloah a nun chung dihlak hmanh hnorsuan dingin tuah khawh a si. Perhmi a si tiah ruah khawh a si nain mah cu a si kho taktakmi a si.”—Daniel, kum 14.

**NEHSAWHNAK KONG HE AA TLAIMI BIAHALNAK HNA**
A HMAAN, A PALH	A PHI
1 A luanciami kum thong tampi lioin nehsawhnak cu a rak um cang.	1 A hmaan. Tahchunhnak ah, ‘Tlukrilh Tertu’ tiah sullam a ngeimi Nefilim phu, phukhat kong kha Baibal nih a chim—Genesis 6:4.
2 Nehsawhnak cu ṭih a nung lomi caponak men a si. Mah cu a poi tuk lem lo.	2 A palh. Nehsawhnak ruangah mino tampi cu mahle mah i thah hmanh an duh.
3 Nehsawhnak kha tawnghtham awkah a ṭha bikmi lam cu lehrulh ṭhan kha a si.	3 A palh. Nehsawhtu hna cu nehsawhmi hna nakin an ṭhawn deuh caah lehrulh ṭhan awkah i zuam cu san a tlai lo.
4 Nehsawhnak tonmi hmuh tikah i theihter lo cu a ṭha bikmi a si.	4 A palh. A thei lo bantukin i umter cu sual a si. Nehsawhnak tonmi kha hmuh ko nain a thei lo bantukin um ahcun anmah kha hnatlakpi bantuk a si kho.
5 Nehsawhtu hna cu i uangthlar ngaiin bia an chim ko nain lungdermi an si.	5 A hmaan. Nehsawhtu cheukhat cu keimah aa timi an si ko nain nehsawhtu tampi cu lung a dermi an si i an intuarnak kha damter awkah nehsawh an hmanmi a si.
6 Nehsawhtu hna cu an i thleng kho.	6 A hmaan. Bawmhnak an hmuh ahcun nehsawhtu hna cu an

Mah Kong Hna Zong Hi Na Duh Khawh Men

MUIṬAWN VIDEO

Nehsawhtu Kha Kuttum Hmang Loin Lehrulh Nin

Nehsawhnak nih zeidah a chuahter khawh i zeitindah tawnghtham ding a si ti kha hlathlai.

Biahalnak 10 A Phi Mino Pawl Biahalnak