ZULTU SITERNAK
CAWN DINGMI 10
Zultu An Si Nakhnga Midang Bawmh Ding In Biakhiak
Baibal Phunglam: “Pathian sinin a rami thawngṭha lawng hmanh kha si loin kan nunnak tiang hmanh kha hrawm kan in duh hna. Kan dawt ngaingaimi nan si cang.”—1 Thes. 2:8.
Jesuh Nih Zeidah A Tuah?
1. VIDEO kha zoh asiloah Johan 3:1, 2 rel. Cun a tanglei biahalnak hna hi i ruah u:
-
Nikodemu nih zeicah Jesuh kha zan ah a len tiah na ruah?—Johan 12:42, 43 zoh.
-
Nikodemu he zan ah an i tonmi nih zultu siter awkah bawmh ding in bia a khiah ti kha Jesuh nih zeitindah a langhter?
Jesuh Sinin Zeidah Kan Cawn Khawh?
2. Mi pawl kha kan dawt hna caah zultu an si nakhnga bawmh hna ding in bia kan khiah.
Jesuh Kha I Zohchunh
3. Baibal na cawnpiakmi caah aa remmi a caan le a hmun ah Baibal cawnpiaknak tuah. Zarhkhat ah mah ni asiloah mah caan ti bantuk in rikhiah kha a duh deuh men lai. A rianṭuannak, a inn asiloah zapi lak ah Baibal cawnpiaknak tuah kha a sia a rem deuh maw? A si khawh ahcun amah caah a ṭha bikmi caan le hmun ah Baibal cawnpiaknak na tuah khawh nakhnga na caan kha thleng.
4. Baibal cawnpiaknak kha hmaan tein tuah. Lamhlat na kal ding a si zong ah Baibal cawnpiaknak kha tuah loin um hlah. Mah hi ruat:
-
Baibal cawnpiaknak kha mah zarh chung i a dang caan ah na tuah kho lai maw?
-
Baibal cawnpiaknak kha phone asiloah video call in na tuah kho lai maw?
-
Baibal cawnpiaknak tuahpiak ding in a dang thawngthanhtu pawl kha bawmhnak na hal kho hna lai maw?
5. A hmaanmi lungput ngeih awkah thlacam. Baibal hmaan tein a cawn lo asiloah a cawnmi ning in a zulh lo hmanh ah Baibal na cawnpiakmi cung ah lungdongh lo ding in Jehovah sinah bawmhnak hal. (Fil. 2:13) Baibal na cawnpiakmi cu sining ṭha tampi a ngei men lai. Cucaah mah a sining hna cung ah lungthin pek ding in thlacam.
MAH BAIBAL CAANG ZONG HI ZOH
Ptb. 3:27; Lam. 20:35; 2 Kor. 12:15
