“Kan ram chaklei i khuate hmete pakhat ah a ṭhangmi ka si” tiah Sierra Leone ram i Dauda nih a chim. “Ka ngakchiat lioah ka chungkhar le chungkhar pakhat cu hmun kong ah bia an i al. Kanmah ta a si an ti veve. Mah kong tawnghtham awkah sii saya pakhat kha an auh. Mah sii sayapa nih a dang pa pakhat kha thlalang a putter i puan raang in a khuh dih. Tlawmpal ah mah pa cu a ther thluahmah i a thlan hrapi nih a paih dih. Aa putmi thlalang kha a zoh i ‘tarpa pakhat ka hmuh. Thil raang aa hruk. Anih cu a sang, a tar i a sam zong a par dih. Kun nawn tein lam a kal’ tiah tiah a ti.

“Ka pu kong a chimmi a si! Cun ‘ka chimmi nan zumh lo ahcun nanmah tein rak zoh u’ tiah a au chih. Asinain ahohmanh nih an zoh ngam lo. Sii saya nih a romi um thawl chung i camhmi ti kha a lak i thing hnah in thlalang aa putmi pa kha a theh.

“Thlalang aa putmi pa sinin ‘Ka Pu’ nih mah hmun cu kanmah chung ta a si tiah a ti. Zeihmanh phang loin mah hmun ah rian ṭuan ko tiah ka pi kha a ti. Mah biakhiahnak kha khatlei chungkhar nih an cohlan i buaibainak cu an tawnghtham khawh.”

Cu bantuk hmuhtonnak cu Nitlaklei Africa ah a um lengmangmi a si. Vawlei i khatlei ṭhen ahcun mithi pawl nih thlarau ram in vawleicung i a nungmi hna kha an zoh hna, huham an iap hna tiah mi nuai tampi nih an zumh. Mah zumhnak cu a hmaan maw? Mithi pawl cu an nung rih taktak maw? Cutin a si lo ahcun mithi thlarau an si tiah a timi hna cu ahote dah an si? Mah biahalnak hna i a phi hmaan hngalh cu a biapi tukmi a si. Thihnak le nunnak he aa pehtlaimi a si.