Baibal nih Satan cu “vawleicung mi vialte a hleng dihtu” a si tiah a ti. (Biathlam 12:9) Satan le khuachia nih Pathian Bia, Baibal kha zumhter an kan duh lo. Mithi pawl cu thlarau ram i kaakhatkhat ah an nung rih tiah mi nih an zumh nakhnga an i zuam. Zeitindah an i zuam ti kha zohhmanh hna u sih.

Minung nih thlarau asiloah a thi kho lomi thlarau kan ngei i kan pum a thih hnuah thlarau ram ah a phan tiah biaknak tampi nih an cawnpiak hna.

Asinain Baibal nih cutin a kan cawnpiak lo. Mi pakhat a thih tikah a nung rihmi pakhatkhat a um lo tiah a ti. A thih cang caah a nungmi hna kha ṭhatnak siseh, chiatnak siseh a pe kho ti hna lo. Baibal nih hitin a ti:

“An thih tikah leidip ah an kir ko; cu ni ah cun an khuakhannak vialte cu an dong fawn ko.”​—Salm 146:4.

“Na tuahmi cu a ṭhat khawh chungin tuah, zeicahtiah Sheol ah cun rian siseh, ruahnak siseh, hngalhnak siseh, fimnak siseh a um ti lo i cuka cu na kalnak ding hmun cu a si.”​—Phungchimtu 9:10.

A dang Baibal caang zongah thih hnuah saram le minung nih tonmi cu aa khat ko tiah a ti. (Phungchimtu 3:19) Mithi cu zeihmanh an hngal ti lo. Cucaah thih hnuah a nung rihmi zeihmanh a um lo.

Mithi cu kaakhatkhat ah an nung rih timi ruahnak kha Baibal ah kan hmu lo. Mithi thlarau pawl an phanhnak hmun timi zong hi Baibal cawnpiaknak a si lo. Satan le khuachia cawnpiaknak a si. Jehovah nih a hmaan lomi biaknak cawnpiaknak vialte kha a huat.​—Phungthlukbia 6:​16-19; 1 Timote 4:​1, 2.

Satan nih mi a hlen hna ning a dang lamkhat cu thitlawn thiam hna hmangin a si. Thitlawn thiam timi cu thlarau hna sinin direct in bia a hmutu kha a si. Thitlawn thiam hna i telin mi tampi nih mah bia hna cu mithi thlarau hna sinin a rami a si tiah an zumh. Asinain Baibal ah kan hmuh bantukin mah cu a si kho lomi a si.​—Phungchimtu 9:​5, 6, 10.

Cu a si ah, mah bia hna cu aho sinin dah an rat? Khuachia pawl sinin a si. Khuachia nih a nungmi pakhat i a biachim ning, a umtu hoiher, a muisam, a tuahmi le a hngalhmi hna kha an hmuh i an i cawn khawh. Cucaah mithi mi bantukin i umter cu an caah a fawi tuk.​—1 Samuel 28:​3-19.

Satan nih mithi kong he aa tlaiin lihbia a karhternak a dang lamkhat cu a hmaan lomi tuanbia hmangin a si. Cu bantuk tuanbia nih mi pawl kha Baibal biatak in lam a pialter hna.​—2 Timote 4:4.

Africa ah a thi cangmi hna kha a nung in kan hmuh hna ti bantuk tuanbia tampi a um. Cutin an hmuhmi hna cu a thimi pawl an rak umnak hmun in aa hlatnak ah a si tawn. Hitin i hal: ‘Mi pakhat cu thihnak in a kir ṭhan khawh a si ahcun a chungkhar le a hawile he aa hlatnak i kir ṭhan cu zumh awkah aa tlak maw?’

A thimi he an muisam aa lawhmi tah a si kho lo maw? Tahchunhnak ah, ram pakhat ah phungchim a vakmi Khrihfa pahnih nih an hnulei in suimilam tam nawn tarpa nih a dawimi hna kha an hmuh. A ruang an hal tikah an lak i pakhat kha a luanciami kum tlawmpal lioah a thimi a upa ah ka ruah tiah a ti. A tak ti ahcun a upa a si lo, asinain mah kha a cohlang duh lo. Mah tarpa nih a chungkhar le a hawile kha zeitindah a chimh hna lai tiah nan ruah?

Mi nih khuaruahhar a simi thil hna an hmuh, an theih i mang an manhmi kha na hngalh ko lai. Cu bantuk kokek thil a lonhmi thil hna nih a tongmi kha ṭihnak a ngeihter hna. Nitlak Africa ah a ummi Marein nih zanṭim ah a thi cangmi a pi aw kha a theih peng. A ṭih tuk i a ai chih caah an chungkhar ningin an i ṭhang dih. A donghnak ah a lung a molmok.

Mithi cu an nun rih taktak a si ahcun an dawtmi pawl an va ṭhihmi hna cu aa tlak maw? Aa tlak lo. Cu bantuk mi a ṭhihphaihmi le a hnorsuangmi bia hna cu khuachia sinin a rami a si.

Asinain an theihmi bia nih hnemhnak le bawmhnak a pek hna ah tah zeitin? Tahchunhnak ah, Sierra Leone ah a ummi Gbassay cu a zaw. A mang ah a thi cangmi a pa kha a hmuh. A pa nih thingkung pakhat a umnak ah va kal, a hnah kha va ṭo, cun ti he cawh law ding tiah a ti. Cutin na tuah hlanah ahohmanh na chim hna lai lo tiah a pa nih a ti. A tuah tikah a dam taktak.

A dang nu pakhat nih a thi cangmi a va cu zankhat a sinah a rak lang tiah a ti. Thil dawh ngaimi aa hruk i aa tlak tuk ti zongin a ti.

Cu bantuk bia le langhnak hna cu a ṭha i bawmtu a simi a lo. Mah cu Pathian sinin a rami a si maw? A si lo. Jehovah cu “zumh awk tlakmi Pathian a si.” (Salm 31:5) Kanmah hlen awkah zeitikhmanh ah aa zuam lai lo. Cutin a tuahmi cu khuachia lawnglawng an si.

A ṭhami khuachia tah an um maw? An um lo. A caan ah bawmtu a simi an lo ko lai nain an dihlak in a ṭhalomi an si. Satan nih Evi sin bia a chim lioah a ṭha ngaimi hawikom a lo. (Genesis 3:1) Asinain a bia a ngaih i a chim ningin a tuah tikah zeidah a cang? A rak thi.

Miṭhalo mi nih hlen an duhmi hna sinah hawikom bantukin i umter cu an tuah tawnmi a si ko. Hakha ah “Chung thu, leng nal” timi phungthluk a um. “Satan hmanh nih pei ceunak vancungmi bantuk aa siter khawh cu” tiah Baibal nih a ti.​—2 Korin 11:14.

Pathian nih vawleicung i mi pawl kha mang, langhnak asiloah aw hmangin pehtlaihnak a tuah ti hna lo. “Thilṭha phun zakip tuah khawh awkah thilthuam tling tein a ngeimi” an si nakhnga Baibal in lam a hruai hna i a cawnpiak hna.​—2 Timote 3:17.

Cucaah Khuachia hlennak he aa tlaiin Jehovah nih ralrin a kan pekmi cu a kan dawt caah a si. Khuachia cu ṭih a nung tukmi ral an si ti kha Pathian nih a hngalh.