Satan le a khuachia pawl cu mi hlen awkah zeicah fakpi in an i zuam? Ralchanhnak ah telter an kan duh caah a si. Anmah kha kan bia hna seh ti an duh. An mihlennak kha zum hna sehlaw Jehovah duh lomi thil kha tuah hna seh ti an kan duh. Mah thil hna lak i tampi cu mithi phungphai hna he aa pehtlai.

Dawtmi nih thihtak cu lung a fak tuk hringhran, cucaah cu bantuk caan i ngaihchiatnak langhter cu a phung a si i aa tlakmi zong a si. Jesuh zong a hawi Lazaruh a thih lioah ‘a rak ṭap.’​—Johan 11:35.

Thihnak he aa tlaimi phungphai tampi a um. Mah lak i tampi cu Baibal phunglam he aa ralkah lo. Asinain phungphai cheukhat cu mithi hi an nung rih i a nungmi hi an kan hmuh khawh timi zumhnak cungah aa hngat. Zan khuadei ruak humhnak, fak tuk in ṭahnak le hlunghlai tuk in ruak vuinak hna cu mithi thlarau a thinhung sual lai timi ṭihnak cungah hram aa bunhmi a si. Asinain mithi nih cun ‘zeihmanh an hngalh lo’ caah cu bantuk phungphai hna tuah cu Satan hlennak hlorh bantuk a si lai.​—Phungchimtu 9:5.

A dang phungphai le puai hna cu mithi nih a nungmi sinin bawmhnak an herh ti le an lungton lo ahcun harnak an kan pek lai timi zumhnak in a rami a si. Ram cheukhat ahcun rawldanghnak puai le raithawinak hna kha mi an thih in zarhkhatnak, ni 40nak asiloah kumkhatnak ah an tuah. Mah nih a thimi kha thlarau ram ‘phanh’ awkah a bawmh tiah an ruah. A dang a laar ngaimi phungphai pakhat cu mithi caah rawl le ti pek kha a si.

Mah thil hna cu a palh, zeicatiah mah nih mithi kong he aa tlaiin Satan hlennak kha a hlorh caah a si. Khuachia cawnpiaknak cungah hram aa bunhmi phungphai hna kha kan tuah ahcun Jehovah mithmai ṭha kan hmu lai maw? Zeitikhmanh ah kan hmu lai lo!​—2 Korin 6:​14-18.

A hmaanmi Pathian salle nih cun Satan hlennak tha a pemi zei bantuk phungphai hmanhah an i tel lai lo. Mah canah taantakmi chungkhar kha dawtnak in an bawmh hna i an hnemh hna. A ruang cu mithi a bawm khomi cu Jehovah lawnglawng a si ti kha an hngalh caah a si.​—Job 14:​14, 15.

Mi cheukhat nih khuachia he direct in asiloah thitlawn thiam ti bantuk mi pakhat sinin pehtlaihnak an tuah. Mah kha khuachia thiamnak tiah auh a si. Biaknaklei camh thiamnak, hnam tuahnak, doih le eih thiamnak, hmailei kong chimchungnak le thitlawn thiamnak ti bantuk cu khuachia thiamnak an si.

Mah hna kha Baibal nih sual a phawt, hitin a ti: “Nannih lakah ahohmanh, . . . litin thiam, bong zummi, mang ih thiam, eih thiam, camh thiam, khuavang ngei, hnam ngei, thitlawn thiam, ahohmanh nan um lai lo. Zeicahtiah hi thil a tuahmi hna cu BAWIPA caah fihnung an si.”​—Deuteronomi 18:​10-12.

Khuachia thiamnak he aa tlaiin Jehovah nih zeicah fakpi in ralrin a kan pek?

Khuachia thiamnak vialte he aa tlaiin Jehovah nih ralrin a kan pekmi cu kanmah ṭhatnak caah a si. Pathian nih a kan dawt i a kan zohkhenh. Khuachia he pehtlaihnak a tuahmi cu harnak an tong lai ti kha a hngalh.

Brazil ram i Nilda cu khuachia thiamnak a ngeimi a si. Khuachia nih a nunnak ah harnak tampi an pek. Hitin a ti: “Ka chungah a ummi khuachia nih cutin, khatin tuah tiah nawl an ka pek. Ka lung a hmaan chel, hmaanlo chel tiin ka um i lungthinlei zawtnak ka hun ngei. Khuachia nih an ka hrem tuk caah ka thluak thahri a rawk dih. A fah a daih deuh nakhnga lungdaihnak sii le zu ka ding, kuak ka zu. Cutin kum tampi ka tuar.”

A donghnak ah Jehovah le a Tehte pawl bawmhnak thawngin Nilda cu khuachia hremnak in a luat i a daimi le a nuammi nunnak a hmu. Nilda nih “thlarau [ṭhalo] pawl he zeitikhmanh ah, chikkhat te hmanh pehtlaihnak tuah hlah u“ tiah a ti.