Satan le khuachia nih mi kha caan saupi an hleng kho ti hna lai lo. Jehovah nih van in a thlak cang hna. (Biathlam 12:9) A rauhhlan ah Pathian nih Satan le khuachia kha dan a tat cang hna lai. Pathian pekmi langhnak pakhat ah lamkaltu Johan nih hitin a ti: “Cun vanmi pakhat vancung in a rung ṭum i dongh hngal lo khor tawh le cikcin nganpi aa put kha ka hmuh. Rulhreu, limkeng kha a tlaih i kum thongkhat a hren—cu limkeng cu Khuachia asiloah Satan kha a si. Vancungmi nih cun dongh hngal lo khor chungah khan a thlak i kum thongkhat kha a dih hlan tiang, mi kha a hlen khawh ti hna nakhnga lo, a hrenh i ca a khenh chih.” (Biathlam 20:​1-3) Mah hnuah Satan le a khuachia pawl cu zungzal in hrawh an si cang lai.​—Biathlam 20:10.

Vawleicung i miṭhalo pawl zong hrawh an si ve lai.​—Salm 37:​9, 10; Luka 13:5.

Satan le a khuachia pawl hrawh an si hnuah Jehovah nih minung kha thluachuah tampi a pek cang hna lai. Mithi cu nunnak an ngei ti lo, an um ti lo ti kha naa cinken ko lai. Jesuh nih thihnak kha i hngilh he, mang manh loin thi thlup in i hngilh he a tahchunh. (Johan 11:​11-14) Jesuh nih thihnak ah aa hngilhmi hna an nun ṭhan lai caan a phan lai ti kha a hngalh caah hitin a ti: “Thlan chung i a ummi mithi vialte [cu] . . . an thlan khan an chuak lai.”​—Johan 5:​28, 29; Lamkaltu 24:15 he tahchunh.

Annih cu vawlei ah an nung ṭhan lai. Thihnak kong thawngpang si ti loin a nung ṭhanmi hna he aa tlaimi, lunglawmh awk thawngpang lawng kan theih cang hna lai! Thlan in a tho ṭhanmi, kan dawtmi pawl va don cu zeitluk lunglawmh awk dah a si lai!