Kan dihlak in thim awk pakhat kan ngei. Jehovah rian maw kan ṭuan lai asiloah Satan le a khuachia rian dah ti kha kan i thim a hau. A pahnih in i thim khawh a si lo. Jehovah rian ṭuan cu fimnak taktak a si!

Kan hmuh cang bantukin khuachia nih mi kha harnak an pek hna i an hlen hna. Jehovah cu cutin a si lo. Pa nih a fale a dawt hna bantukin minung kha a kan dawt. Anih cu “laksawng ṭha le laksawng tlamtling paohpaoh” Petu a si. (Jeim 1:17) Mahca ṭhatnak nganpi a hlawt cang bu hmanhin zeihmanh ngaan loin mi kha thilṭha a pek hna.​—Efesa 2:​4-7.

Pathian Fapa, Jesuh nih vawleicung a um lio i a tuahmi thil kha ruat. A holh kho lomi kha holh khawh dingin a tuah hna i a mit a cawmi kha khua a hmuhter hna. A ke a beimi le thinghmui mi kha a damter hna. Khuachia kha a ṭhawl hna i zawtnak a phunphun kha a damter hna. Pathian pekmi ṭhawnnak in Jesuh nih mithi hmanh a nunter ṭhan hna.​—Matthai 9:​32-35; 15:​30, 31; Luka 7:​11-15.

Pathian cu lihbia chim a thiam lo, a zungzal in biatak kha a chim. Ahohmanh a hleng bal hna lo.​—Nambar 23:19.

Maimomh bu nih tho kha cawl kho lo dingin a ṭemṭawn bantukin pupa zumhnak hrut le a hmaan lomi ruahnak hna nih mi nuai tampi kha a ṭemṭawn ve hna. Mithi kha an ṭih hna. Khuachia zong an ṭih hna. Chiatserhnak, camh, hupphengtu in hmanmi hmelchunhnak le khuachia thiamnak he aa tlaimi thilri hna kong zongah an thin a phang. Satan Khuachia hlennak cungah hram aa bunhmi zumhnak le phungphai nih a ṭemṭawn hna. Pathian salle cu zei bantuk rap hmanhah an i foih lo.

Jehovah cu Satan nakin a ṭhawng deuh tukmi a si. Jehovah rian na ṭuan ahcun khuachia hna sinin aan huhphenh lai. (Jeim 4:7) Khuachia nih an in camh kho lai lo. Tahchunhnak ah, Nigeria ram ah Jehovah Tehte pakhat cu khua in an ṭhawl i a chuah duh lo caah camhthiammi pathum nih thi dingin an camh. An camh khawh lo caah an lak i pakhat cu a thin a phang tuk i Jehovah Tehte a simi mah pa sinah a va kal i ngaihthiam a va hal.

Khuachia nih hna an in hnawh tikah Jehovah kha a min na auh ahcun aan huhphenh lai. (Phungthlukbia 18:10) Asinain Pathian huhphenhnak hmuh awkah khuachia thiamnak le khuachia biaknak he aa pehtlaimi thil vialte kha hrial a hau. Hlanlio Efesa khua i Pathian a biami hna nih cutin an rak tuah. Camhthiamnak he aa tlaimi an cauk vialte kha an khawmh dih in an rak khangh. (Lamkaltu 19:​19, 20) Tuchan Pathian salle zong nih cutin tuah a hau. Hmelchunhnak, “huhphenhnak” hri, camhthiamnak cauk le khuachia thiamnak he aa tlaimi thilri vialte kha hrawh dih a hau.

Pathian mithmai ṭha hmuh na duh ahcun a hmaan lomi biaknak kaltak le thilṭhalo tuah ti lo lawngin a za lo. A thiangmi biaknak ah lungtho tein i tel a hau. Zeidah tuah ding ti kha Baibal nih a langhter:

Satan le khuachia nih vawleicung ah a hmaan lomi thil a tuahmi le a cawnpiakmi, minung an i ngeih hna. Asinain Jehovah zong nih mi aa ngeih ve hna. Annih cu Jehovah Tehte an si. (Isaiah 43:10) Vawleicung pumpi ah Jehovah Tehte nuai riat leng an um. An dihlak in thilṭha tuah an i zuam i mi kha biatak an cawnpiak hna. Ram tampi ahcun Biakinn ah na ton khawh hna i lunglawm tein an in conglawmh lai.

An rian cu midang nih Pathian an biak nakhnga bawmh kha a si. Jehovah kha a hmaanmi lam in biak khawh awkah bawmh dingin na inn ah Baibal an in cawnpiak lai. Mah caah a man pek a hau lo. Jehovah Tehte Hna nih mi kha lunglawm tein biatak an cawnpiak hna, mah cu an minung hawi le Jehovah Pathian kha an dawt caah a si.