Thlarau pawl cu an um taktak ko! Mit in hmuh khawh lomi thlarau pawl umnak hmun ah a ṭhami thlarau he, a ṭhalomi thlarau he an um. Annih cu vawlei ah a rak nung i a thimi an si maw?

An si lo. Mi pakhat a thih tikah mi tampi nih an ruah bantukin thlarau ram ah a phan lo. Zeitindah kan hngalh khawh? Baibal chimmi ruangah a si. Baibal cu Jehovah ti min a ngeimi, a hmaanmi Pathian sinin a rami biatak cauk a si. Jehovah cu minung a kan sertu a si caah kan thih tikah zei ah dah kan can ti kha ṭha tein a hngalh.​—Salm 83:18, NW; 2 Timote 3:16.

Pathian nih “vawlei khan tlak tlawmpal a lak i” hmasa bik mipa, Adam kha a ser tiah Baibal nih a ti. (Genesis 2:7) Eden dum, Paradis ah Pathian nih a chiah. Adam nih Jehovah nawlbia kha a ngaih ahcun a thi lai lo i atu tiang vawlei ah a nung rih lai. Asinain Adam nih hramhram in Pathian nawlbia a buar tikah Pathian nih hitin a ti: “Vawlei [ah] na kir ṭhan . . . lai; Nangmah cu, cu vawlei cun sermi na si. Leidip na si i leidip ah na kir ṭhan lai.”​—Genesis 3:19.

Mah cu zei sullam dah a si? Jehovah nih leidip in a ser hlanah Adam cu khoika ah dah a rak um? Khoika hmanhah a rak um lo. Hrin a si rih lomi vancung i thlarau pum in a rak ummi zong a si lo. Adam cu a rak um lo. Cucaah Jehovah nih Adam cu ‘vawlei ah na kir ṭhan lai’ a ti tikah na thi lai a ti duhnak a si. Thlarau ram ah a phanhmi a si lo. A thih tikah nunnak a ngei ti lo, khoika hmanhah a um ti lo. Thihnak timi cu nunnak ngeih ti lo kha a si.

A dang mithi pawl tah zeitin? Annih zong an um ve ti lo maw? Baibal nih hitin a ti:

• “[Minung he, saram he] an pahnih tein an fuhmi hmun cu aa khat ko, leidip kha a si ko. An pahnih in cuka cun an chuak i an pahnih in cuka ahcun an kir ṭhan lai.”​—Phungchimtu 3:20.

• “A thimi nih cun zeihmanh an hngal lo.”​—Phungchimtu 9:5.

• “Dawtnak, huatnak, duhnak an ngeihmi vialte kha anmah sinah cun a thi ve.”​—Phungchimtu 9:6.

• “Sheol ah cun rian siseh, ruahnak siseh, hngalhnak siseh, fimnak siseh a um ti lo i cuka cu na kalnak ding hmun cu a si.”​—Phungchimtu 9:10.

• “[Minung cu] an thih tikah leidip ah an kir ko; cu ni ah cun an khuakhannak vialte cu an dong fawn ko.”​—Salm 146:4.

Mah Baibal bia hna hi cohlan awkah naa harh maw? Naa harh ahcun mah hi ruathmanh: Chungkhar tampi ah pale cu chungkhar zohkhenh awkah tangka an kawl. Pa pakhat a thih tikah a chungkhar cu harnak an tong tawn. A caan ahcun taantakmi a nupi le a fale nih rawl cawknak ca tangka hmanh ṭhaṭhi in an ngei lo. Mah pa i a ral pawl zong nih harnak an rak pek men hna lai. Hitin i hal: ‘Mah pa cu thlarau ram ah a nun rih a si ahcun zeicah a innchungkhar kha a zohkhenh rih hna lo? Miṭhalo pawl sinin a chungkhar kha zeicah a huhphenh hna lo?’ A ruang cu Baibal chimmi a hmaan caah a si. Mah pa cu nunnak a ngeih ti lo caah zei thil hmanh a tuah kho ti lo.​—Salm 115:17.

Mithi cu zeitikhmanh ah an nung ṭhan ti lai lo tinak a si maw? A si lo. A hnuah thawhṭhannak kong kan i ruah hna lai. Atu kan chim duhmi cu mithi nih na tuahmi kha an hngal lo tinak a si. An in hmu kho lo, na chimmi an thei kho lo i an in chawn kho lo. Cucaah ṭih an hau lo. An in bawm kho lo i harnak zong an in pe kho lo.​—Phungchimtu 9:4; Isaiah 26:14.