Jehovah nih a sermi thlarau pum a ngeimi vialte cu an ṭha dih. A hnuah vancungmi pakhat cu a hung ṭha lo. Anih cu Satan Khuachia kha a si. Satan nih vawleicung i mi pawl nih Jehovah biak loin keimah ka bia hna seh ti a duh. Hiti hin thil a rak cang:

Eden dum ah a thaw tukmi thingthei tampi a um. Jehovah nih Adam le a nupi Evi kha mah thingthei hna kha nan duh chungin nan ei khawh, asinain thingkung pakhat i a thei bel cu nan ei lai lo, nan ei ahcun nan thi lai tiah a ti hna.​—Genesis 2:​9, 16, 17.

Nikhat cu Evi amah lawngin a um lioah rul nih a rak chawnh. Asinain bia a chimtu taktak cu rul a si lo; Satan Khuachia a si. Satan nih Evi kha thlauhmi thingthei na ei ahcun Pathian bantukin fimnak na ngei lai tiah a ti. Cun na thi lai lo ti zongin a ti. Mah cu lihbia an si. Asinain Evi nih Satan bia kha a zumh i mah thei kha a ei. Cun Adam zong kha a pek ve i a ei ve.​—Genesis 3:​1-6.

Mah kong in Satan cu ralchanhtu le mi lihchim a si ti kha kan hngalh. Pathian nawl na ngaih lo zongah na thi lai lo tiah Evi kha a ti. Mah cu lihbia a si. Evi cu a thi i Adam zong a thi ve. Satan cu a sual ruangah a thi rih lo nain a donghnak ah cun a thi ko lai. Asinain atu ah Satan cu a nung rih i mi kha a hlen rih hna. Mi nih Pathian nawlbia an buar nakhnga aa zuam peng.​—Johan 8:44.

A hnuah a dang vancungmi zong an hun ṭha ve lo. Vawleicung i aa dawhmi nu pawl an hmuh hna tikah anmah he nupa sualnak tuah an duh. Cucaah vawlei ah an rung ṭum i pa pum kha an i lak. Cun nupi an ṭhit. Mah cu Pathian tinhnak an ralchanhmi a si.​—Genesis 6:​1, 2; Judas 6.

Mah ruangah mi nih harnak tampi an tong. Mah vancungmi pawl i an nupile cu fa an ngei i an fale cu hawi bantuk an si lo. An hun ṭhan tikah a puarhrang tukmi, mi nganpipi an hung si. Cuticun vawlei cu ṭhatlonak in a hun khah caah Jehovah nih miṭhalo pawl kha tilian in hrawh awkah bia a khiah. Buanchukcho in a luatmi minung cu miding Noah le a chungkhar lawng an si.​—Genesis 6:​4, 11; 7:23.

Asinain a ṭhalomi vancungmi pawl cu an thi lo i thlarau umnak hmun ah an kir ṭhan. Asinain dantat an si. A dingmi vancungmi hna in dirhmi Pathian chungkhar sinah kirnak nawl awnh an si ti lo. Mah lengah Jehovah nih minung pum i laknak nawl zong a awnh ti hna lo. A donghnak ah, a liannganmi biaceihnak ni ah an thi lai.​—2 Peter 2:4; Judas 6.

Kumzabu 20nak a thawklei ah vancung ah raldohnak a um. A cangmi kong kha Biathlam cauk nih hitin a langhter: “Cun van ah khin raldohnak a um. Mikhael [a tho ṭhanmi Jesuh] le a [ṭhami] vancungmi hna nih khan limkeng [Satan] cu an doh i limkeng nih cun a [ṭhalomi] vancungmi hna he a rak doh ve hna. Sihmanhsehlaw limkeng cu a sung i amah le a vancungmi hna cu van ah umnak nawl an ngei ti lo. Limkeng nganpi cu leng ah an hlonh. Cu limkeng cu rulpi tar, Khuachia asiloah Satan timi, vawleicung mi vialte a hleng dihtu hna kha a si. Amah cu a [ṭhalomi] vancungmi vialte hna he vawlei ah an thlak hna.”

A phichuak cu zeidah a si? Baibal nih hitin a ti rih: “Cucaah cun nannih van hna le khika i a ummi vialte hna, i lawm tuah u.” Satan le a ṭhalomi vancungmi asiloah thlarau pawl cu van ah an um ti lo caah a ṭhami vancungmi pawl cu an i lawm kho cang. Cu a si ah, vawleicung i mi pawl tah zeitin? Baibal nih hitin a ti: “Sihmanhsehlaw vawlei le rili caah cun ṭihnung a va si hringhran dah! Zeicahtiah Khuachia cu nan sinah a rung ṭum cang i cu pin ah caan tawite lawnglawng ka ngei ti kha a hngalh fawn caah a thin a linh in a lin ko.”​—Biathlam 12:​7-9, 12.

Satan le amahlei ah a ṭangmi hna nih vawleicung i mi pawl kha an hlen hna i ṭhatlonak a phunphun an chuahter. Mah a ṭhalomi vancungmi hna kha khuachia tiah auh an si. Annih cu Pathian ral an si i an dihlak in an ṭha lo.