Jehovah nih Satan ruangah a chuakmi ṭhatlonak vialte kha a remh ṭhan dih lai. Jehovah nih vawleicung pumpi uk awkah Jesuh kha Siangpahrang ah a ser. A uknak tangah vawlei pumpi cu paradis ah ser a si lai.​—Daniel 7:​13, 14; Luka 23:43.

Jehovah nih mah thil hna hi bia a kan kamh:

• RAWL A TAMPI LAI: “Vawlei nih rawl kha a chuahter cang, Pathian kan Pathian nih thluachuah a kan pek cang.” “Ram chungah rawl tampi in um ko seh; Lebanon tlang i a ummi rawl kung ṭha bantuk nih tlang vialte cu tuam dih hna seh.”​—Salm 67:6; 72:16.

• RALTUKNAK A UM TI LAI LO: “Ra law zohhmanh, BAWIPA i a tuahmi hi. Zohhmanh zeitluk khuaruahhar thil hna dah leicung ah hin a tuah. Hi vawleicung pumpi ah ral cu a daihter dih ko hna.”​—Salm 46:​8, 9.

• MIṬHALO AN UM TI LAI LO: “Miṭhalo cu ṭhawl an si lai. Luklak ah miṭhalo cu an lo ko lai, na kawl hna hmanhah na hmu kho hna lai lo.”​—Salm 37:​9, 10.

• ZAWTNAK, NGAIHCHIATNAK, THIHNAK A UM TI LAI LO: “Mitcaw nih khua an hmuh lai i hnachet nih khua an theih lai. Kebei cu an pet, an laam lai i a holh kho lomi kha lunglawmhnak in a au in an au lai.”​—Isaiah 35:​5, 6.

  “Pathian hrimhrim cu an sinah a um lai i amah cu an Pathian a si lai. An mitthli vialte kha a hnawh dih hna lai. Thihnak a um ti lai lo, ngaihchiatnak le ṭahnak le fahnak zong a um ti lai lo. Thil hlun vialte cu an lo dih cang.”​—Biathlam 21:​3, 4.

Jehovah cu Satan le a khuachia pawl he an i dang tuk. Zeitikhmanh ah lihbia a chim bal lo. A biakam vialte cu a tling dih lai. (Luka 1:​36, 37) Jehovah nih aan dawt i a ser laimi Paradis ah nunter aan duh. Cucaah Pathian Bia ah a ummi, a ṭha tukmi biatak kong tam deuh in hngalh awkah Jehovah Tehte Hna kha pehtlaihnak tuah hna. Na nunnak ah biatak kha na zulh ahcun a hmaan lomi ruahnak, pupa zumhnak hrut, ṭha tein hngalh lomi le i fian lomi hna i ṭemṭawnnak in na luat lai. A donghnak ah sualnak le thihnak i ṭemṭawnnak hmanhin na luat lai. Jesuh nih “biatak cu nan hngalh lai i biatak nih cun aan luatter hna lai” tiah a ti.​—Johan 8:32.