Hmanthlak chungah a ummi hi ahote dah an si?— Annih cu Matthai, Marka, Luka, Johan, Piter, Jeim, Judas le Paul an si. Annih cu Jesuh chan lioah a nungmi an si i amah kong a ṭialtu an si. An kong kha hngalh nan duh lo maw?

Anmah lak i pathum cu Jesuh hnu zulh in thawngṭha a chimmi lamkaltu an si. Mah pathum cu ahote dah an si?— Matthai, Johan le Piter an si. Lamkaltu Matthai  le Johan cu Jesuh kong ṭha tein a hngalmi an si. An ṭialmi Baibal cauk hna ah Jesuh kong kha an ṭial. Lamkaltu Johan nih Biathlam cauk le Johan cakuat pathum kha a rak ṭial. Lamkaltu Piter nih cakuat pahnih a ṭial. Mah cu Piter cakuat pakhatnak le pahnihnak tiah auh a si. A cakuat pahnihnak ah Jehovah Pathian nih vancung in Jesuh kha “ka dawtmi ka Fapa a si, ka lung a ka tongtu a si” tiah a timi kong kha a ṭial.

Hmanthlak chungah a ummi a dang pawl zong nih Jesuh kong kha an ṭial ve. Pakhat cu Marka a si. Jesuh an tlaih lioah Marka cu a um ve i thil a cangmi vialte kha hmuh dih dawh a si. A dang pakhat cu Luka a si. Amah cu siibawi a si. Jesuh a thih hnu lawngah Khrihfa si dawh a si.

Hmanthlak chungah na hmuhmi, Baibal a ṭialtu a dang pahnih cu Jesuh naule an si. An min nan hngal hna maw?— Jeim le Judas an si. A hmasa ahcun an upa Jesuh kha an rak zum lo. A hrut cang ti hmanh in an rak ruah. Asinain a hnuah Jesuh kha an zumh i Khrihfa an hung si.

Hmanthlak chungah a ummi a donghnak Baibal ṭialtu cu Paul a si. Khrihfa a si hlanah Saul tiah auh a rak si. Khrihfa pawl kha a huat hna i harnak a pek hna. Paul cu zeitindah Khrihfa a hung si?— Ni khat cu, khual a tlawn lioah vancung in bia an chawnhmi kha ruahlopi in a theih. Bia a chawntu cu Jesuh a si. Jesuh nih hitin a hal: ‘Zeicah a ka zummi pawl kha na hrem hna?’ Mah hnuah Paul cu a lung aa thleng i Khrihfa a hung si. Rom in Hebru tiang, Baibal kha uk 14 a ṭial.

Kannih tah nifatinte Baibal kan rel maw?— Baibal kan rel tikah Jesuh kong kha tam deuh kan hngalh. Jesuh kong tam deuh in hngalh nan duh lo maw?—