Ngakchia hna a hmaanmi thil tuah hi a har maw?— Mi tam deuh nih cun a har tiah an ti. Baibal ah aa telmi ngakchiapa Josiah ca zongah a hmaanmi thil tuah cu a har ve. Asinain Josiah nih hawikom ṭha a ngeih hna. A hmaanmi thil tuah khawh awkah an rak bawmh. Josiah le a hawikom ṭha pawl kong kha zoh hna u sih.

Josiah a pa cu Judah siangpahrang Amon a si. Amon cu a ṭhalo tukmi a si lengah siasal zong a biami a si. Amon a thih tikah Josiah cu siangpahrang a hung si. Josiah cu siangpahrang a si ah kum riat lawng a si rih. Josiah tah a pa bantukin ṭhatlonak a tuah ve maw?— A tuah lo, amah cu chimh ngaimi a si.

Josiah cu a ngakchiat lio tein Jehovah Pathian bia kha a ngaih. Cucaah Jehovah Pathian a dawmi hna lawng kha hawikom ah aa thim hna. A hawile pawl nih Josiah cu a hmaanmi thil tuah khawh awkah an rak bawmh. Josiah a hawile pawl cu ahote dah an si ti kha hngalh nan duh maw?

A hawi pakhat cu Zefaniah a si. Amah cu hmailei ah zei thil dah a cang lai ti a chimchungtu  a si. Judah mi pawl kha siasal nan biak ahcun harnak nan tong lai tiah ralrin a pek hna. Zefaniah nih a chimmi bia kha Josiah nih a ngaih i siasal a bia lo. Jehovah Pathian lawnglawng a biak.

Josiah i a hawi dang pakhat cu Jeremiah a si. Annih cu an kum zong aa khat deng. An pahnih in aa daw tukmi hawikom an si. Zeitlukin dah an i dawt ti ah cun Josiah a thih tikah Jeremiah nih a ngaihnak kong kha ṭah hla in a lawh. Jeremiah le Josiah cu a hmaanmi thil tuah awk le Jehovah bia ngaih awkah pakhat le pakhat an i bawm.

Josiah sinin zeidah kan i cawn khawh?— Josiah cu a ngakchiat lio tein a hmaanmi thil kha tuah a duh. Jehovah Pathian a dawmi hna he lawng i komh ding a si ti zong kha a hngalh. Nannih zong Jehovah Pathian a daw i a hmaanmi thil tuah awkah aan bawm kho hna hngami lawng kha kom ve hna u.