Lamkaltu Paul a nunnak a khamhtu mino pakhat a rak um. Mah mino pa cu lamkaltu Paul i a tupa a si. A min tu cu kan hngal lo. Asinain amah cu a ral a ṭha tukmi a si. Mah kong kha hngalh nan duh maw?—

Paul cu Jesuh kong a chim ruangah an tlaih i Jerusalem khua ah thong an thlak. Paul a huatu zong an um. Mah mi hna nih ‘Paul kha biaceihnak zungah chuahpi awkah ralkapbu haotu kha chim hna u sih. Cun lam in kan bawh lai i Paul cu kan thah lai’ tiah khua an khan.

Mah kong kha Paul tupa nih a theih. Zeidah a tuah ti kha nan hngal maw? Thonginn ah a kal i mah kong kha Paul cu a va chimh. Mah tikah Paul nih ralkapbu haotu kha a va chimhter colh. Ralkapbu haotu sinah mah kong va chimh cu a fawi lai maw, a har lai dah?— A har lai, zeicahtiah ralkapbu haotu cu a dang ralkap pawl nawl a petu a ngan bikmi a si caah a si. Asinain Paul tupa nih mah kong kha ralṭha ngaiin ralkapbu haotu kha a va chimh.

Mah tikah ralkapbu haotu nih zeidah tuah ding a si ti kha a hngalh. Paul huhphenh awkah ralkap 500 hrawng kha a auh hna. Cun Paul kha mah zanah Sisaria lei ah kalpi dingin nawl a pek hna. Paul cu lam ah thah a si maw?— A si lo. Paul thah dingin khua a khangmi hna nih Paul kha zeitihmanh in an tuah kho lo. Cuticun an khua khannak cu tlam a tling lo.

Mah kong in zeidah nan i cawn khawh?— Nannih zong Paul tupa bantukin nan ral a ṭhat ve awk a si. A hleiin Jehovah Pathian kong midang kan chimh hna tikah kan ral a ṭhat a hau. Jehovah Pathian kong kha midang sinah ralṭha tein nan chim lai maw?— Cutin nan chimh hna ahcun midang nunnak kha nan khamh hna bantuk a si.