Hlanlio Jeriko khua ah kan phan tiah ruat hmanh hna u sih. Mah khua cu Kanaan ram i khuapi a si. Mahka i a ummi hna cu Jehovah Pathian a zum lomi an si. Rahab timi nu zong cuka khua ah cun a um ve.

Moses nih Isreal mi hna Izipt ram in a chuahpi hna le rili sen ṭhen hnih ah a ṭhennak kong hna kha Rahab nih a ngakchiat lio tein a theih bal cang. Israel mi hna nih an ral pawl an tei hna nakhnga Jehovah Pathian nih a bawmh hna timi kong zong a theih bal cang. Atu ah Israel mi hna cu Jeriko khua pawngah riahhmun an khuar ti kha a theih.

Voikhat cu zanlei sangah Israel mi pahnih cu Jeriko khua kha ngiatthlai awkah an kal. Khua dangah kal in ngiatthlaitu hna cu mingiatu tiah auh an si. Israel mi pahnih cu Rahab inn ah an phanh tikah Rahab nih a inn chungah luh dingin a auh hna. An khua ah mingiatu an ra i Rahab inn ah an lut ti kha zan ah Jeriko siangpahrang nih a theih. Cucaah siangpahrang nih mah mingiatu hna kha va tlaih hna awkah mi a thlah hna. Rahab nih mingiatu pahnih kha a inn cungah a thuh hna i siangpahrang nih a thlahmi hna kha hitin a ti hna: ‘Mingiatu hna cu an ra taktak ko, atu bak kha an kal. Khulrang in nan dawi hna ahcun nan phanh ko hna lai!’ Rahab nih mingiatu hna zeicah a khamh hna ti kha nan hngal maw?— Jehovah Pathian a zumh caah a si. Pathian nih Isreal mi hna kha Kanaan ram hi a pek hna lai ti zong a zumh.

Mingiatu hna nih Rahab inn in an chuah hlanah bia pakhat an kamh ta. Jeriko khua hrawh a si tikah nangmah le na innchungkhar cu him tein nan um lai tiah an ti. Asinain Rahab nih zeidah a tuah awk a si?— ‘Mah hrisen hi na thlalangawng ah na hren lai. Cutin na tuah ahcun na innchung i a ummi vialte cu an thi lai lo’ tiah mingiatu hna nih an ti. An chimhning tein Rahab nih a tuah. Mah hnuah zeidah a cang ti kha nan hngal maw?—

Ni tlawmpal a rauh hnuah Israel mi hna cu Jeriko khualei ah an ra. Nikhat ah voikhat in khua kha ni ruk chung an vel. Ni sarihnak ni ah cun khua kha voi sarih an vel. Mah hnuah an zapi tein fakpi in an au. Mah tikah Jehovah Pathian nih ralhau kha a cimhter. Asinain thlalangawng cungah hrisen aa hrengmi inn tu cu a cim lo. Mah inn kha hmanthlak chungah nan hmu kho  maw?— Mah inn chungah a ummi Rahab le a innchungkhar cu khamh an si.

Rahab sinin zeidah kan i cawn khawh?— Jehovah Pathian nih khuaruahhar thil a tuahmi kong tampi kha Rahab nih a theih bal cang. Cucaah Pathian kha a zumhnak a si. Kannih zong Pathian kong kha tampi hngalh dingin kan cawn ve lai. Nannih tah Rahab bantukin Pathian kha nan zum ve maw?— Jehovah Pathian nan zumh ti kha kan hngalh.