Rebekah cu Jehovah Pathian a dawmi nu a si. A vapa min cu Isak a si. Isak zong Jehovah Pathian a dawmi a si ve. Rebekah le Isak cu zeitindah an i tonning a si? Rebekah nih Jehovah Pathian aa lawmh nakhnga zeidah a tuah? Amah kong kha tam deuh in hlathlai hna u sih.

Isak i a pa cu Abraham a si i a nu cu Sarah a si. Kanaan ram ah an um. Cuka rammi hna cu Jehovah Pathian a bia lomi an si. Abraham nih a fapa kha Jehovah Pathian a biami nu lawng ṭhi seh ti a duhpiak. Cucaah a rualchan an umnak Haran khua ah a sal pakhat kha a thlah i Isak caah nupi a kawlter. Mah a salpa cu Eliezer a si kho men.

Cucaah Eliezer cu a dang sal hna he khual an tlawng. An tlawnnak khual lam cu a hla tuk. Ei awk le laksawng hna kha Kalauk pahra in an phawrh. Isak caah Eliezer nih zeitindah nupi cu a kawlpiak lai? Haran khua an phanh tikah tikhor pakhat pawngah an i din. Zeicahtiah Eliezer nih mahka hmun ah nu pawl cu ti than ah an ra lai ti kha a hngalh caah a si. Eliezer nih Jehovah Pathian sinah hitin thla a cam, ‘nu pakhat kha din awk ti ka hal tikah keimah le kalauk hna caah ti a kan thanpiak ahcun mah minu cu na thimmi a si ti kha ka hngalh lai.’

Mah lioah Rebekah cu tikhor pawngah a rak phan. Baibal nih amah cu aa dawh  ngaingaimi nu a si tiah a ti. Eliezer nih din awk ti a hal tikah Rebekah nih ‘a ngah ko, ding ko. Na kalauk hna ca zongah kan thanpiak lai’ tiah a ti. Ruat hmanh! A ti a haalmi kalauk hna cu ti tampi an din khawh. Cucaah Rebekah cu tikhor ah atu le atu ti a than caah a ba ngai ko lai. Rian aa zuammi Rebekah kha hmanthlak ah nan hmu maw?— A thlacam ningin Jehovah Pathian nih a leh caah Eliezer cu a khuaruah a har tuk.

Eliezer nih Rebekah kha laksawng tampi a pek. Rebekah nih an inn i tlun awkah a sawm hna. Eliezer nih inn an phanh tikah Abraham nih a thlahnak kong le Jehovah Pathian nih zeitindah a thlacamnak a leh ti kha a chimh hna. Cucaah a innchungkhar pawl zong nih Rebekah cu Isak he i um awkah an hna a tla.

Asinain Rebekah nih Isak he i um cu a duh lai maw?— Eliezer cu Jehovah Pathian nih a thlahmi a si ti kha Rebekah nih a hngalh. Cucaah a innchungkhar nih Kanaan ram ah kal in Isak he i um cu na duh maw tiah an hal tikah, ‘ka duh ko, ka kal lai’ tiah Rebekah nih a leh hna. Cun Eliezer kha a zulh colh. Kanaan ram an phanh tikah Isak he an i um.

Jehovah Pathian nih tuah seh ti a duhmi ningin a tuah caah Rebakah cu thluachuah a hmu. Kum tampi a rauh hnuah a tefa chungin Jesuh cu hrin a si. Nannih zong Rebekah bantukin Jehovah Pathian aa lawmh nakhnga nan tuah ahcun thluachuah nan hmu ve lai.