CAWN DINGMI 01
Baibal Nih Na Nunnak Kha A Ṭhatter Kho Deuh Maw?
Kan dihlak in nunnak he aa tlaiin biahalnak kan ngei cio. Zeicah kan nun, zeicah sifah harnak kan ton, kan thih tikah zei ah dah kan can timi kong le hmailei ah zeidah a cang lai timi kong kha mi kip nih hngalh an duh. Eidin kong asiloah a nuammi chungkhar ngeih khawh ning kong he aa tlai zongin an lungre a thei. Mi tampi nih mah a biapimi biahalnak hna i a phi lawng si loin nifatin an nunnak ah zulh awk a tlakmi ruahnak cheuhnak zong kha Baibal ah an hmuh cang. Baibal in ṭhathnemhnak hmuh khawh a si lai tiah na ruat maw?
1. Baibal ah zei biahalnak hna i a phi dah a um?
Mah a biapimi biahalnak hna i a phi hi Baibal ah hmuh khawh a si: Nunnak hi zeitindah aa thawk? Nunnak sullam cu zeidah a si? Zeicah sifah harnak kan ton? Kan thih tikah zei ah dah kan can? Mi kip nih daihnak an duh ko nain zeicah hi tlukin raltuknak a tam? Hmailei ah vawlei ah zeidah a cang lai? Baibal nih mah biahalnak hna kha kawl dingin a kan forh. Mah lungsi hnangamnak a pemi a phi kha mi nuai tampi nih Baibal ah an hmuh.
2. Nifatin kan nunnak ah kan i nuamh nakhnga Baibal nih zeitindah a kan bawmh khawh?
Baibal nih a ṭhami ruahnak a kan cheuh. Tahchunhnak ah, Baibal nih a nuammi chungkhar ngeih khawh ning, lungretheihnak tawnghtham khawh ning le kan rian ah i nuamh khawh ning kong he aa tlaiin ruahnak a kan cheuh. Mah kong he aa tlaimi Baibal a phi kha na hngalh lai. Cun mah cauk kan i ruahṭi tikah a dang kong zong kha na hngalh lai. “Cathiang hi a dihlak [Baibal ah a ummi dihlak] in . . . a ṭhahnemmi a si” ti cu na hna a tla ve ko lai.—2 Timote 3:16.
Mah cauk hi Baibal airolhmi cauk cu a si lo. Asinain mah cauk nih Baibal kha nangmah tein hlathlai awkah aan forh. Cucaah mah cawn dingmi hna ah langhtermi Baibal caang hna kha rel dingin le mah kha na cawnmi kong he tahchunh dingin kan in forh.
TAM DEUH IN HLATHLAI
Baibal nih nunnak a ṭhatter khawh ning, Baibal relnak ah i nuamh khawh ning le Baibal hngalhthiam awkah bawmhnak hal khawh ning kong hna kha hlathlai.
3. Baibal nih lam a kan hruai khawh
Baibal cu dahmei bantuk a si. Baibal nih a ṭhami biakhiahnak tuah khawh awk le hmailei ah a cang dingmi kong hngalh awkah a kan bawmh khawh.
Salm 119:105 rel law mah biahalnak hna hi i ruah u:
-
Salm caṭialtu pa nih Baibal kha zeitindah a hmuh?
-
Nangtah Baibal kha zeitindah na hmuh?
4. Kan biahalnak hna i a phi kha Baibal ah hmuh khawh a si
Nu pakhat nih kum tampi chung lungawṭawm in a umtermi biahalnak hna i a phi kha Baibal ah a hmuh. VIDEO kha piah, cun a tanglei biahalnak hna hi i ruah u.
-
Mah video ah nu pakhat nih zei biahalnak dah a tuah?
-
Baibal hlathlainak nih zeitindah a bawmh?
Baibal nih biahalnak tuah dingin a kan forh. Matthai 7:7 rel law a tanglei biahalnak hi i ruah u:
-
Baibal ah a phi kawl na duhmi zei biahalnak hna dah na ngeih?
5. Baibal relnak ah naa nuam kho
Mi tampi cu Baibal relnak in nuamhnak le ṭhathnemhnak an hmu. VIDEO kha piah, cun a tanglei biahalnak hna hi i ruah u.
-
Mah video ah mino hna nih ca relnak kong he aa tlaiin zeitindah an ruah?
-
Carel cu an huam lo nain Baibal rel kha zeicah an duh?
Baibal nih kan caah hnemhnak a kan pe khomi lamhruainak a kan pek i ruahchannak zong a kan ngeihter. Rom 15:4 rel law mah biahalnak hi i ruah u:
-
Hnemhnak le ruahchannak a pemi Baibal biakam kong kha hngalh na duh maw?
6. Baibal kong hngalhthiam awkah midang nih an kan bawmh khawh
Mi tampi nih Baibal kha rel lawng si loin midang he i ruahṭi cu bawmtu taktak a si ti kha an hngalh. Lamkaltu 8:26-31 rel law mah biahalnak hi i ruah u:
-
Baibal kha zeitindah kan hngalhthiam khawh?—Caang 30 le 31 zoh.
Ethiopia mipa pakhat cu Baibal kong hngalhthiam awkah bawmhnak a herh. Tuchan ah mi tampi nih midang he Baibal kong i ruahṭi cu bawmtu a si ti kha an hngalh
MI CHEUKHAT CHIMMI: “Baibal hlathlai cu a caan sawksam a si.”
-
Nangtah zeitindah na ruah? Zeicah?
A TAWINAK
Baibal ah nifatin kan nunnak caah ruahnak cheuhnak le a biapimi biahalnak hna i a phi kha hmuh khawh a si. Mah nih hnemhnak le ruahchannak a kan ngeihter.
I Ruahṭi Ṭhannak
-
Baibal ah zei bantuk ruahnak cheuhnak phun dah kan hmuh khawh?
-
Baibal ah zei biahalnak hna i a phi dah a um?
-
Baibal chung i zei kong kha dah cawn na duh?
HLATHLAI CHAP
Baibal ruahnak cheuhnak cu tuchan ah zeicah zulh awkah aa tlak ti kha hlathlai.
“Baibal Cawnpiaknak Nih—Zungzal In Ṭhatnak A Chuahter” (2018,Vennak Innsang, No. 1)
A ngakchiat lio tein a lungthin uk awkah aa harhmi pa pakhat Baibal nih a bawmh ning kong kha zoh.
Chungkhar nunnak caah zulh awkah a tlakmi Baibal ruahnak cheuhnak kong kha hlathlai.
Vawlei uktu taktak kong he aa tlaiin mi pawl i a hmaan lomi an ruahnak Baibal nih a remh ning kong kha hlathlai.