Jehovah nih ṭha deuh in ka hngal seh ti aan duh. Zeicah? A sining, a lam le aa tinhnak kong tam deuh in na cawnmi nih amah he hawikom si aan duhter deuh lai tiah aa ruahchan caah a si. Pathian he hawikom nan si kho taktak maw? (Salm 25:14 rel.) A hawikom si awkah zeidah na tuah khawh? Baibal nih mah biahalnak a phi le Jehovah he hawikom si cu zeicah a ṭha bikmi tinvo sung a si timi kong kha a langhter.

1. Jehovah nih zei tuah awkah dah aan sawm?

“Pathian cu naih u law aan naih ve hna lai.” (Jeim 4:8) Mah cu zei sullam dah a si? Jehovah nih a hawikom si awkah aan sawmmi a si. Mi cheukhat nih Pathian kha an hmuh khawh lo caah a hawikom kan si kho ti kha zumh awkah an i harh. Asinain Jehovah nih amah kan naih khawh nakhnga kan hngalh a herhmi thil kong dihlak kha Baibal in a kan chimh. Cucaah Jehovah cu kan hmu bal lo nain Baibal kan rel tikah amah he kan i hawikomhnak cu a fek kho.

2. Jehovah cu zeicah a ṭha bikmi Hawikom a si?

Jehovah tlukin aan dawmi ahohmanh an um lo. Pathian nih i nuam sehlaw bawmhnak a herh tikah ka sinah thlacam seh ti aan duh. “Amah nih aan zohkhenh hna caah nan lungretheihnak vialte kha amah cungah chia dih ko u.” (1 Peter 5:7) Jehovah cu a hawile bawmh awk, hnemh awk le an bia ngaihpiak awkah timhcia a si zungzal.—Salm 94:18, 19 rel.

3. Jehovah nih a hawile sinin zeidah aa ruahchan?

Jehovah nih mi kip kha a dawt ko hna nain “miding mi cu Pathian nih a zumhmi an si.” (Phungthlukbia 3:32) A hawile nih a ṭhami in a hmuhmi thil kha an tuah lai i a ṭhalomi in a hmuhmi thil kha an hrial lai tiah Jehovah nih aa ruahchan. Mi cheukhat nih a ṭha le a ṭhalo kong he aa tlaiin Jehovah phunglam ningin kan nung kho bal lai lo tiah an ruah. Asinain Jehovah cu zaangfahnak in a khatmi Pathian a si. Amah a daw taktakmi hna le a lunglawmhter awkah an si khawh chungin aa zuammi paoh kha a cohlan hna.—Salm 147:11 rel; Lamkaltu 10:34, 35.

 TAM DEUH IN HLATHLAI

4. Abraham cu Jehovah hawikom a si

Baibal ah langhtermi Abraham (Abram ti zongin auhmi) kong nih Pathian hawikom timi a sullam kha hngalhthiam awkah a kan bawmh. Abraham kong kha Genesis 12:1-4 ah rel law mah biahalnak hna hi i ruah u:

• Jehovah nih Abraham kha zeidah tuah dingin a fial?

• Jehovah nih zei bia dah a kamh?

• Abraham nih Jehovah lamhruainak kha zeitindah a rak lehrulh?

5. Jehovah nih a hawile sinin aa ruahchanmi

Kan hawile sinin kan i ruahchanmi thil a um tawn.

• Nangtah na hawile sinin zeidah naa ruahchan?

1 Johan 5:3 rel law mah biahalnak hi i ruah u:

• Jehovah nih a hawile sinin zeidah aa ruahchan?

Jehovah nawlngaih awkah kan tuahsernak asiloah kan ziaza kha kan thlen a hau men lai. Isaiah 48:17, 18 rel law mah biahalnak hi i ruah u:

• Jehovah nih a hawile kha thlennak tuah dingin zeicah a hal hna?

 6. Jehovah nih a hawile caah a tuahmi

 A TAWINAK

Jehovah nih a hawikom siter aan duh i amah he i naih awkah aan bawmh lai.

I Ruahṭi Ṭhannak

• Jehovah nih a hawile kha zeitindah a bawmh hna?

• Jehovah nih a hawile kha thlennak tuah dingin zeicah a hal hna?

• Jehovah nih a hawile sinin tam tuk aa ruahchan tiah na ruat maw? Zeicah na ruah asiloah zeicah na ruah lo?