CAWN DINGMI 09
Thlacamnak In Pathian Kha Naih
Na nunnak ah lamhruainak ka herh tiah na ruat bal maw? Zei a biapimi biahalnak a phi dah theih na duh? Hnemhnak asiloah thazaang pek na herh maw? Jehovah he i naih deuh na duh maw? Mah thil vialte kha thlacamnak nih a tlinter khawh. Asinain a hmaanmi thlacam ning cu zeidah a si? Pathian nih thlacamnak vialte kha a ngai dih maw? Na thlacamnak Pathian nih a ngaih nakhnga zeidah na tuah khawh? Mah kong kha hlathlai hna u sih.
1. Aho sinah dah thla kan cam awk a si i zei kong dah kan cam khawh?
Jesuh nih vancung kan pa sin lawngah thla kan cam awk a si tiah a kan cawnpiak. Amah theng zong Jehovah sinah thla a rak cam. Hitin a ti: “Hi bantuk hin thla cu nan cam awk a si: ‘Vancung khua i a um kan Pa . . . ’” (Matthai 6:9) Jehovah sin thla kan cam tikah kan i hawikomhnak cu a fek chin.
Zei bantuk kong paoh kan cam khawh. Pathian nih kan thlacamnak kan let seh ti kan duh ahcun amah duhmi lam in kan cam awk a si. “Amah duh ningin kan hal ahcun, kan halmi paoh kha [Pathian nih] a kan pek hrimhrim lai.” (1 Johan 5:14) Zei caah dah thla kan cam awk a si timi kong he aa tlaiin Jesuh nih a kan cawnpiak. (Matthai 6:9-13 rel.) Kanmah pumpak kong le Pathian nih a kan tuahpiakmi caah kan i lawmhnak kong kha kan cam khawh. Cun midang a bawmh hna nakhnga ca zongah kan cam khawh.
2. Zeitindah thla kan cam awk a si?
Baibal nih “[kan] harnak vialte kha [Pathian sinah] chim dih u” tiah a kan forh. (Salm 62:8) Cucaah thla kan cam tikah lungtak tein kan cam awk a si. Thla kan cam tikah aw thangpi asiloah lungchung in kan cam khawh. Cun Jehovah kan upat kha kan umtu ning zongin kan langhter khawh. Zeitik caan paoh le khoika hmun paohah thlacam khawh a si.
3. Pathian nih kan thlacamnak kha zeitindah a kan leh?
Lam tampi in a kan leh. Jehovah nih Baibal a kan pek, Baibal ah kan biahalnak a phi kha kan hmuh tawn. Baibal relnak nih ‘fimnak a baumi kha fimnak a pek’ khawh hna. (Salm 19:7; Jeim 1:5 rel.) Harnak kan ton tikah lungdaihnak a kan pek khawh. Cun bawmhnak kan herh tikah a salle hmangin a kan bawmh khawh.
TAM DEUH IN HLATHLAI
Pathian lung a lawmhtermi lam in thlacam khawh ning kong le thlacamnak nih ṭhathnemhnak aan hmuhter khawh ning kong kha hlathlai.
4. Pathian ngaihmi thlacamnak
Zeinihdah kan thlacamnak kha Pathian cohlanmi asiloah cohlan lomi a siter? VIDEO kha piah.
Jehovah nih a sinah thlacam hna seh ti a kan duh. Salm 65:1 rel law mah biahalnak hna hi i ruah u:
-
“Thlacamnak a kan Lettu” nih a sinah thlacam seh ti aan duh tiah na ruat maw? Zeicah na ruah asiloah zeicah na ruah lo?
Pathian nih kan thlacamnak kha ngai seh ti kan duh ahcun a phunglam ningin nun awkah kan i zuam a hau. Mikah 3:4 le 1 Peter 3:12 rel law mah biahalnak hi i ruah u:
-
Jehovah nih kan thlacamnak a ngaih lai ti kha zeicah kan zumh khawh?
Ral aa domi hna nih teinak hmuh awkah thla an cam veve men lai. An thlacamnak kha Pathian nih a ngaih lai tiah i ruahchan cu aa tlakmi a si maw?
5. Kan thlacamnak cu kan lungthin chungin a rami a si awk a si
Mi cheukhat cu thla an cam tikah an chimmi bia kha nolh ṭhan lengmang dingin cawnpiak an si. Pathian nih tah cutin camter a kan duh maw? Matthai 6:7 rel law mah biahalnak hi i ruah u:
-
Thla na cam tikah “sullam a ngei set lomi bia tampi” hman kha zeitindah na hrial khawh?
Nifatin lawmhnak bia chim awkah Jehovah nih aan pekmi thil cheukhat kong kha ruat. Zarhkhat chung cutin na ruah ahcun aa khat lomi a kong pasarih kha na hngalh lai i nolh ṭhan lengmang a hau lai lo.
A fapa nih a lungchung i a ummi bia a chimhmi kha a pa nih a duh. Cu bantukin Jehovah zong nih a sinah lungtak tein thla cam hna seh ti a kan duh
6. Thlacamnak cu Pathian sinin kan hmuhmi laksawng a si
A hleiin harnak kan ton caan ah thlacamnak nih zeitindah a kan bawmh khawh? VIDEO kha piah.
Thlacamnak nih lungdaihnak ngeih awkah a kan bawmh khawh tiah Baibal nih bia a kan kamh. Filipi 4:6, 7 rel law mah biahalnak hna hi i ruah u:
-
Thlacamnak nih kan buaibainak vialte kha a tlauter kho lo nain mah nih zeitindah a kan bawmh?
-
Zei kong hna dah cam na duh?
Na hngal maw?
“Amen” timi biafang a sullam cu “cutin si ko seh” asiloah “si hram ko seh” tinak a si. Baibal chan lioah thla an cammi a dih tikah “amen” tiah an rak ti.—1 Chanrelnak 16:36.
7. Thlacamnak caah a caan pe
A caan ah kan rian a tam tuk caah thlacam kan philh men lai. Thlacamnak cu Jesuh caah zeitlukin dah a biapit? Matthai 14:23 le Marka 1:35 rel law mah biahalnak hna hi i ruah u:
-
Jesuh nih thlacamnak caah a caan a pek khawh nakhnga zeidah a rak tuah?
-
Zeitikah dah thla na cam khawh?
MI CHEUKHAT CHIMMI: “Thlacamnak cu lungdamnak ca men ah a si.”
-
Nangtah zeitindah na ruah?
A TAWINAK
Lungtak tein thlacamnak nih Pathian he a kan naihter, lungdaihnak a kan pek i Jehovah lunglawmhter awkah a herhmi thazaang zong a kan pek.
I Ruahṭi Ṭhannak
-
Aho sinah dah thla kan cam awk a si?
-
Zeitindah kan cam awk a si?
-
Thlacamnak in hmuhmi ṭhathnemhnak cheukhat cu zei hna dah an si?
HLATHLAI CHAP
Thlacamnak kong he aa tlaiin mi tampi nih an halmi biahalnak a phi kha hlathlai.
“Thlacamnak Kong He aa Tlaiin Hngalh Dingmi Thil Pasarih” (Vennak Innsang capar)
Zeicah thla kan cam awk a si timi kong le sullam a ngei deuhmi thlacamnak a si khawh nakhnga zeidah kan tuah khawh timi kong kha hlathlai.
Aho sinah dah thla kan cam awk a si timi kong he aa tlaiin Baibal cawnpiakmi kha hlathlai.
“Mithiang Mi Hna Sinah Thla Ka Cam Awk A Si Maw?” (Website capar)
Mah music video nih khoika hmun asiloah zeitik caan paohah thlacam khawh a si timi kong a langhter.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
