Jehovah Tehte Hna pumhnak ah naa pum bal maw? Naa pumh bal lo ahcun a hmasa bik i pumh awkah na ṭih men lai. Hitin na ruah men lai: ‘Pumhnak ah zei hna dah an tuah? Pumhnak cu zeicah a biapit? Zeicah kaa pumh awk a si?’ Mah cawn dingmi ah midang he i pumhṭinak nih Pathian he aan naihter khawh ning le nangmah pumpak aan bawmh khawh ning kong kha na hngalh lai.

1. I pumhṭi awk a sinak a ruang a biapi bikmi cu zeidah a si?

Baibal ṭialtu pakhat nih midang he i pumhṭinak a biapitnak a ruang kha hitin a langhter: “Zapi pumhnak ah BAWIPA cu ka thangṭhat.” (Salm 26:12) Cu bantukin Jehovah Tehte Hna cu i pumhṭinak in lunglawmhnak an hmu. Vawleicung pumpi ah Pathian thangṭhat awk, hlasak awk le thlacam awkah zarh fatinte an i pumṭi hna. Cun i pumhṭi awkah civui pi zong kum fatin an ngei.

2. Kan i pumhnak ah zei kong dah na hngalh lai?

Pumhnak ah Baibal in an cawnpiak hna i “a sullam kha an chimh hna.” (Nehemiah 8:8 rel.) Naa pumh ahcun Jehovah kong le a ṭha tukmi a sining kong hna kha na hngalh lai. Na cungah a langhtermi Pathian dawtnak kong kha na hngalh tikah amah he nan i naih deuh lai. Cun lungsi hnangamnak a pemi nunnak hmuh awkah aan bawmh ning kong zong kha na hngalh lai.—Isaiah 48:17, 18.

3. Pumhnak ah midang he i hawikomhnak nih zeitindah aan bawmh khawh?

Jehovah nih ‘pakhat le pakhat kan i dawt khawh nakhnga le thil ṭha kan i tuahpiak khawh nakhnga i pumh lengmang kha ngol hlah u’ tiah a kan ti. (Hebru 10:24, 25) Kan i pumhnak ah pakhat le pakhat aa daw taktakmi hna le nangmah bantukin Pathian kong tam deuh in hngalh a duhmi hna kha na hmuh hna lai. Baibal hmangin thazaang an i pekmi zong kha na theih lai. (Rom 1:11, 12 rel.) Cun an tonmi buaibainak hlawhtling tein a tawngtham khomi nungak, tlangval le aa ṭhiummi nuva hna he biaruahnak caan zong na hmu lai. Mah cu Jehovah nih midang he hmaan tein i pumṭi hna seh ti a kan duhnak a ruang cheukhat lawng an si rih.

 TAM DEUH IN HLATHLAI

4. Jehovah Tehte Hna Pumhnak

Kumzabu pakhatnak i Khrihfa hna cu Jehovah biak awkah hmaan tein an rak i pumṭi hna. (Rom 16:3-5) Kolose 3:16 rel law mah biahalnak hi i ruah u:

• A hmasa Khrihfa hna nih Jehovah kha zeitindah an biak?

1. Kan i pumhnak ah phungchimnak, hmuhsaknak le video hna aa tel. Pumh hramthawknak le donghnak ah hlasaknak le thlacamnak a um

2. Pumhnak i ṭhen cheukhat ah aa pummi hna kha a phi pek dingin sawm an si

3.   Chungkhar a ngeimi, nungak, tlangval, kum upa le ngakchia an dihlak in conglawmh an si

4. Man loin i pumh khawh a si. Jehovah Tehte Hna nih thawhlawm an kholh hna lo

5. I pumh khawh awkah zuamnak ngeih a hau

• Zeicah hmaan tein kan i pumh awk a si?

 A TAWINAK

Pumhnak nih Jehovah kong tam deuh in hngalh awk, nan i hawikomhnak fehter awk le midang he amah biakṭi awkah aan bawmh lai.

I Ruahṭi Ṭhannak

• Jehovah nih hmunkhat ah i pumhṭi dingin zeicah tha a kan pek?

• Jehovah Tehte Hna pumhnak ah zei kong dah na hngalh lai?

• Pumhnak in a dang zei ṭhatnak dah ka hmuh khawh rih tiah na ruah?