CAWN DINGMI 11
Baibal Ṭha Tein Hngalhthiam Khawh Ning
A nganmi project kha thawk na duh nain a har tuk tiah na ruat bal maw? Mah kha duhsah tein le tlawmpal tete in na thawk ahcun a fawi deuh lai. Baibal rel tik zongah cutin a si ve. ‘Khoika in dah ka thawk lai?’ tiah i hal. Hi cawn dingmi ah Baibal relnak le hlathlainak ah naa nuamh khawh nakhnga na tuah khawhmi thil cheukhat kong kha kan i ruah hna lai.
1. Baibal kha zeicah hmaan tein kan rel awk a si?
Baibal asiloah “BAWIPA nawlbia” kha hmaan tein a relmi cu an i nuam i khua-awng an tong. (Salm 1:1-3 rel.) Cucaah nifatin minit tlawmpal a caan pe in Baibal kha rel. Baibal kong kha tam deuh in na hngalh ahcun Baibal relnak ah naa nuam deuh lai.
2. Baibal relnak in ṭhathnemhnak na hmuh nakhnga zeinihdah aan bawmh lai?
Baibal relnak in ṭhathnemhnak tam deuh hmuh awkah chikkhat i dinh in kan relmi kong kha ruah a hau. Cucaah rel le ‘ruah’ cu a biapimi a si. (Joshua 1:8) Baibal na rel tikah mah biahalnak hna hi i hal: ‘Mah Baibal caang nih Jehovah Pathian kong zeidah a ka cawnpiak? Mah kha ka nunnak ah zeitindah ka hman khawh? Midang bawmhnak ah mah Baibal caang kha zeitindah ka hman khawh?’
3. Baibal relnak ah a caan zeitindah na pek khawh?
Baibal rel awkah a caan pek kha naa harh maw? Kan lakah tam deuh nih cun kan i harh. “Caanṭha nan hmuhmi paohpaoh kha ṭha tein hman” i zuam u. (Efesa 5:16) Nifatin Baibal relnak caah a caan ri na khiahnak thawngin cutin na tuah khawh. Mi cheukhat nih Baibal rel awkah zingka ah a caan an pek. Mi cheukhat nih chun rawl ei caan ti bantuk a dang caan ah an i thim. Asinain mi cheukhat tu nih cun an ih hlanah an rel. Na caah tah zei caan dah a ṭha bik??
TAM DEUH IN HLATHLAI
Baibal relnak ah lungthawhnak na ngeih deuh nakhnga na tuah khawhmi kong kha hlathlai. Cun Baibal hlathlainak in ṭhathnemhnak tam deuh hmuh awkah naa timhtuah khawh ning kong zong kha hlathlai.
Rawl thar kha kan teh hnuah kan hun duh bantukin Baibal relnak zong kha duh awkah kan tuah khawh
4. Baibal relnak ah naa nuamh deuh nakhnga zeidah na tuah khawh?
Baibal rel hramthawk cu a fawi men lai lo. Asinain rawl thar kha na teh hnuah na hun duh bantukin Baibal relnak zong kha “duh” awkah na tuah khawh. 1 Peter 2:2 rel law mah biahalnak hi i ruah u:
-
Baibal kha nifatin na rel tikah kaa nuam deuh i tam deuh rel ka hau tiah na ruat maw?
Baibal relnak ah mi cheukhat cu zeitindah an hun i nuamh timi VIDEO kha piah. Cun a tanglei biahalnak hna hi i ruah u.
-
Mah video ah mino pawl nih zei zuamcawhnak hna dah an ton?
-
Baibal hmaan tein rel ding timi an hmuitinh phanh awkah zeinihdah a bawmh hna?
-
Baibal rel kha an duh deuh nakhnga zei hna dah an tuah?
Baibal rel hramthawk awkah a bawmmi ruahnak cheuhnak:
-
A fiang i chanthar holh in lehmi Baibal kha i thim. Nan holh asiloah ṭha tein na theihthiammi holh in lehmi Vawlei Thar Lehnak Baibal kha rel.
-
Hngalh na duh bikmi Baibal cauk kha rel hmasa. Tahchunhnak ah, “Baibal Rel Hramthawknak” timi cazin kha zoh.
-
Na rel dih cangmi kha i ṭial. Mah capar chung i “Na Relmi Kha I Chingchiah” timi cazin kha hmang.
-
JW Library®app kha hmang. Mah app in Baibal kha na phone asiloah a dang electronic thilri hmangin khoika hmun paohah na ngaih khawh i na rel khawh.
-
Baibal Hlathlainak Ca Lamhruainak timi kha hmang. Mah cauk chungah khuaram hmanthlak le cazin hna aa tel caah mah nih Baibal rel kha aan duhter deuh lai.
5. Baibal cawnpiaknak caah i timtuah
Salm 119:34 rel law mah biahalnak hi i ruah u:
-
Baibal na rel hlan asiloah Baibal cawnpiaknak ca i naa timhtuah hlanah thlacam cu zeicah a ṭhat?
Baibal na cawn tik paohah ṭhathnemhnak tam deuh na hmuh nakhnga zeitindah na tuah khawh? Mah cauk chung i cawn dingmi caah naa timhtuah chung bantukin a tanglei kong hna zong hi tuah awkah i zuam:
-
Cawn dingmi i a hramthawknak catlangbu hna kha rel.
-
Baibal kha kau law rel, cun a konglam he aa pehtlaih ning kha hngalhthiam awkah i zuam.
-
Biahalnak kip i a phi caah a biapimi biafang asiloah biafangrual hna kha i rin; mah nih Baibal aan cawnpiaktu he nan cawn tikah aan bawmh lai.
Na hngal maw?
Jehovah Tehte Hna nih Baibal holhlehmi a phunphun kha an hman. Asinain a hleiin a hmaan i Pathian min aa telmi Vawlei Thar Lehnak Baibal kha an duh deuh.—Website capar, “Jehovah Tehte Hna Nih Anmah Chuahmi Baibal An Ngei Maw?” ah zoh.
MI CHEUKHAT CHIMMI: “Baibal hlathlainak tuah awkah a caan tam tuk pek a hau. Cutin tuah awkah a caan asiloah thazaang ka ngei lo.”
-
Nangtah zeitindah na ruah?
A TAWINAK
Baibal relnak in ṭhathnemhnak tam deuh hmuh awkah a caan rikhiah a hau. Cun relmi kong hngalhthiam awkah thlacam le Baibal cawnpiaknak kip caah i timhtuah chung zong a hau.
I Ruahṭi Ṭhannak
-
Baibal relnak in ṭhathnemhnak na hmuh nakhnga zeinihdah aan bawmh lai?
-
Baibal relnak le hlathlainak caah zeitikah dah a caan na pek khawh?
-
Baibal cawnpiaknak kip caah i timhtuah chung cu zeicah a ṭhat?
HLATHLAI CHAP
Baibal relnak in ṭhathnemhnak tam deuh hmuh awkah aan bawm khomi ruahnak cheuhnak cheukhat kha hlathlai.
“Baibal Nih Na Nunnak A Ṭhatter Deuh Khawh Ning” (Vennak Innsang capar)
Baibal rel awkah lam pathum kong kha hlathlai.
“Baibal Nih Zeitindah A Ka Bawmh Khawh?— Ṭhen 1: Ṭha Tein Baibal Hlathlainak” (Website capar)
Baibal relnak ah i nuamh deuh khawh ning kong kha hlathlai.
“Baibal Nih Zeitindah A Ka Bawmh Khawh?— Ṭhen 2: Baibal Relnak Kha A Nuammi Siter” (Website capar)
Kum tampi chung Baibal a rak rel cangmi hna sinah ruahnak cheuhnak hal hna.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
