Pathian cu dawtnak a si ahcun biaknak hna nih Pathian min hmangin zeicah thil ṭha lo tampi an tuah? A sawhsawh tein chim ahcun mah biaknak hna cu a hmaan lomi an si i Pathian min kha an chiatter. Zeitindah Pathian min kha an chiatter? Mah kong he aa tlaiin Pathian nih zeitindah a ruah? Mah kong he aa tlaiin zeidah a tuah lai?

1. A hmaan lomi biaknak nih an cawnpiaknak thawngin Pathian min kha zeitindah an chiatter?

A hmaan lomi biaknak nih “Pathian kong i biatak kha lih ah an thlen.” (Rom 1:25) Tahchunhnak ah, biaknak tam deuh nih cun an mi pawl kha Pathian min kong an cawnpiak hna lo. Asinain Baibal nih Pathian min kha kan hman awk a si tiah a ti. (Rom 10:13, 14) Biaknaklei hruaitu cheukhat nih thil ṭha lo a can tikah Pathian duhnak a si tiah an ti. Asinain mah cu lihbia a si. Pathian nih zeitikhmanh ah ṭhatlonak a tuah bal lo. (Jeim 1:13 rel.) Ngaihchiat awk ngai a simi cu biaknak pawl i an chimmi lihbia nih mi kha Pathian he a hlatter hna.

2. A hmaan lomi biaknak nih an tuahsernak thawngin Pathian min kha zeitindah an chiatter?

A hmaan lomi biaknak nih mi pawl kha Jehovah nih a pehtlaih hna ningin an pehtlai hna lo. Baibal ah a hmaan lomi biaknak i an “sualnak cu van tawngin aa pong” tiah a ti. (Biathlam 18:5) Kumzabu tampi chung biaknak hna cu ramkhellei ah an i tel. Cun raltuknak kha an bawmh hna i mah ruangah mi tampi cu an thi. Biaknaklei hruaitu cheukhat nih rum an duh caah an mi pawl kha tangka an hal hna. Mah an tuahsernak nih Pathian an hngal lo ti le Pathian aiawhnak nawl an ngei lo ti kha a langhter.—1 Johan 4:8 rel.

3. A hmaan lomi biaknak kong he aa tlaiin Pathian nih zeitindah a ruah?

A hmaan lomi biaknak tuahsernak nih na thin aan hunter ahcun Jehovah tah zeitindah a um lai tiah na ruah? Pathian nih mi kha a dawt hna nain a min a chiattertu hna le an mi pawl a ding loin a pehtlaitu biaknaklei hruaitu hna cungah cun a thin a hung. Pathian nih a hmaan lomi biaknak cu ka hrawh dih cang lai i “zeitikhmanh ah hmuh ṭhan a si ti lai lo” tiah bia aa kam. (Biathlam 18:21) A rauhhlan ah Pathian nih a hmaan lomi biaknak vialte cu a hrawh dih cang hna lai.—Biathlam 18:8.

 TAM DEUH IN HLATHLAI

4. Pathian nih biaknak vialte hi a cohlang dih lo

Mi tampi nih biaknak hna cu Pathian sinah lam a kan hruai dihtu aa lo lomi lam bantuk a si tiah an ruah. Asinain mah cu a hmaan maw? Matthai 7:13, 14 rel law mah biahalnak hi i ruah u:

• Nunnak ah a kan hruaitu lam kong he aa tlaiin Baibal nih zeitindah a chim?

VIDEO kha piah, cun a tanglei biahalnak hi i ruah u.

• Pathian nih a cohlanmi biaknak tampi a um tiah Baibal nih a chim maw?

 6. Pathian nih mi pawl kha a hmaan lomi biaknak in luat hna seh ti a duh

Biathlam 18:4 rel a law mah biahalnak hi i ruah u:

• Pathian nih a hmaan lomi biaknak ruangah hlen a simi hna kha khamh a duh hna timi kong na hngalhmi nih zeitindah aan umter?

7. A hmaanmi Pathian kong kha hlathlai peng

A hmaan lomi biaknak nih Pathian cung i na hmuhnak kha a hnorsuan awk a si maw? A pa nawl a ngaih lo caah inn in a chuak i thil ṭha lo tampi a tuahmi fapa pakhat kong kha na mitthlam ah cuanter hmanh. A pa cu a fapa tuahsernak cungah a hna a tla lai lo. Cucaah ralchanhtu a fapa nunning ruangah a pa mawhchiat cu aa tlak lai maw?

• A hmaan lomi biaknak tuahsernak ruangah Pathian mawhchiat le a kong hlathlai ti loin um cu aa tlak lai maw?

 A TAWINAK

A hmaan lomi biaknak hna nih an cawnpiaknak le a ṭha lomi an tuahsernak in Pathian min kha an chiatter. Pathian nih a hmaan lomi biaknak kha a hrawh dih cang lai.

I Ruahṭi Ṭhannak

• A hmaan lomi biaknak cawnpiaknak le tuahsernak kong he aa tlaiin zeitindah na ruah?

• A hmaan lomi biaknak kong he aa tlaiin Jehovah nih zeitindah a ruah?

• A hmaan lomi biaknak kong he aa tlaiin Pathian nih zeidah a tuah lai?