A hmasa cawn dingmi ah kan i ruah cang bantukin Pathian nih biaknak vialte kha a cohlang dih lo. Asinain a kan Sertu lung a lawmhtermi lam in kan biak khawh. Cu a si ah zei bantuk “biaknak” dah Pathian nih a cohlan? (Jeim 1:27) Baibal cawnpiakmi kong kha ruathmanh.

1. Kan biaknak cu zei cungah dah hram aa bunh awk a si?

Kan biaknak cu Baibal cungah hram aa bunh awk a si. Jesuh nih Pathian sinah hitin a ti: “Biatak cu nangmah bia kha a si.” (Johan 17:17) Biaknak cheukhat nih Pathian thawchuah hnawhmi Baibal chung ah a ummi biatak kha zei ah an rel lo. Annih nih Baibal kha minung cawnpiaknak le phunglam tu in an thlen. Asinain Jehovah cu ‘Pathian nawlbia a hlawmi’ hna cungah aa lawm lo. (Marka 7:9 rel.) Phundang in cun kan biaknak kha Baibal cungah hram aa bunh i Baibal ruahnak cheuhnak kha kan zulh ahcun Pathian lung kan lawmhter lai.

2. Jehovah kha zeitindah kan biak awk a si?

Jehovah cu a kan Sertu a si caah amah lawng kha kan biak awk a si. (Biathlam 4:11) A sullam cu zei bantuk siasal, milem asiloah hmanthlak hna hmanh kha hmang loin amah Pathian lawng kha kan dawt awk le kan biak awk a si tinak a si.—Isaiah 42:8 rel.

Kan biaknak cu Jehovah caah a thiangmi le “cohlan awk tlakmi” a si a hau. (Rom 12:1) A sullam cu a phunglam ningin kan nun a hau tinak a si. Tahchunhnak ah, Jehovah a dawmi hna nih ṭhitumnak kong he aa tlaiin Pathian phunglam kha an sunsak i an zulh a hau. Khuhsii le ritnak sii hmannak asiloah zu tam tuk dinnak ti bantuk a ṭha lomi ziaza hna kha an hrial a hau. a

3. Zumtukhat pawl he zeicah Jehovah kha kan biakṭi awk a si?

Zarh fatin i pumhnak nih ‘Jehovah kha . . . pumhnak ah thangṭhatnak’ caanṭha a kan hmuhter. (Salm 111:1, 2) Cutin kan tuah khawhnak lamkhat cu Pathian thangṭhatnak hla kan saknak thawngin a si. (Salm 104:33 rel.) Jehovah nih a kan dawt ca le pumhnak nih nunnak kha zungzal in i nuamhpi awkah a bawmh hna lai ti kha a hngalh caah i pumh dingin a kan fial. Pumhnak ah pakhat le pakhat thazaang i peknak caanṭha kan hmu.

 TAM DEUH IN HLATHLAI

4. Kan biaknak ah milem kha kan hman awk a si lo

5. Jehovah lawng biaknak nih a hmaan lomi ruahnak in a kan luatter

 6. Khrihfabu pumhnak ah Pathian kha kan biak

Khrihfabu pumhnak ah hla kan saknak thawngin le a phi kan peknak thawngin Jehovah kha kan thangṭhat i midang kha tha kan pek hna. Salm 22:22 rel law mah biahalnak hna hi i ruah u:

• Pumhnak ah a phi an pekmi na theih tikah naa nuam maw?

• A phi pek awkah i timhtuah kha na duh maw?

7. Kan hngalhmi kong midang sin kan chim tikah Jehovah cu aa lawm

Midang sinah Baibal biatak kong chim khawh ning lam tampi a um. Salm 9:1 le 34:1 rel law mah biahalnak hi i ruah u:

• Baibal in na hngalhmi kong kha mi pakhatkhat sinah chim na duhmi a um maw?

 A TAWINAK

Jehovah lawng kha kan biak, Khrihfabu pumhnak ah kan thangṭhat i kan hngalhmi kong kha midang sinah kan chim tikah a kan Sertu kha a lung kan lawmhter.

I Ruahṭi Ṭhannak

• Pathian cohlanmi lam in biak awkah zeitindah kan cawn khawh?

• Zeicah Jehovah lawng kha kan biak awk a si?

• Pathian lunglawmhter a duhmi midang he zeicah kan biakṭi awk a si?