CAWN DINGMI 16
Jesuh Nih Vawleicung A Um Lioah Zeidah A Rak Tuah?
Mi tampi nih Jesuh kong kha an hngalh ko nain mi cheukhat nih cun a chuah lioah a cangmi kong, a fimmi profet pakhat a sinak kong le a thihnak kong lawng kha an hngalh. Asinain vawleicung a nunnak kong hlathlainak in a kong kha tam deuh in hngalh khawh a si. Hi cawn dingmi chungah Jesuh nih a rak tuahmi a biapi bikmi thil cheukhat kong le mah nih zeitindah aan bawmh khawh timi kong kha kan i ruah hna lai.
1. Jesuh i a biapi bikmi a rian cu zeidah a si?
Jesuh i a biapi bikmi a rian cu “Pathian Pennak kong thawngṭha” chim kha a si. (Luka 4:43 rel.) Pathian nih minung buaibainak vialte a tawngtham dih khotu uknak pakhat asiloah cozah pakhat a dirh lai timi kong thawngṭha kha Jesuh nih a rak chim. a Jesuh nih mah thazaang a pemi thawngṭha kong kha kum thum le a cheu chung fakpi in a rak thanh.—Matthai 9:35.
2. Jesuh nih khuaruahhar thil a tuahnak a ruang cu zeidah a si?
Baibal ah “Pathian nih amah [Jesuh] thawngin a tuahmi khuaruahharnak te hna, hmelchunhnak te hna le thil lianngan hna nih khan an langhter ko” tiah a ti. (Lamkaltu 2:22) Jesuh nih Pathian pekmi ṭhawnnak thawngin khuacaan kha a uk khawh, mi thong tampi kha rawl a dangh hna, a zawmi kha a damter hna i a thimi hmanh kha a rak thawhter ṭhan hna. (Matthai 8:23-27; 14:15-21; Marka 6:56; Luka 7:11-17) Jesuh tuahmi khuaruahhar thil nih anih cu Pathian nih a thlahmi a si ti kha fiang tein a langhter. Cun mah nih kan buaibainak vialte tawnghthampiak awkah Jehovah cu ṭhawnnak a ngei ti zong kha a langhter.
3. Jesuh nunning in zeidah kan cawn khawh?
Jesuh nih zei bantuk thil sining paohah Jehovah nawl kha a ngaih. (Johan 8:29 rel.) Ralchanhnak lakah a thih tiang a Pa nih a fialmi rian kha zumhfek tein a rak ṭuan. A harmi thil sining hmanhah minung nih Pathian rian ṭuan khawh a si ko ti kha a rak langhter. Cucaah Jesuh nih “ka keneh ka zul hna seh tiah i zohchun awk [a kan] chiahpiak.”—1 Peter 2:21.
TAM DEUH IN HLATHLAI
Jesuh nih zeitindah thawngṭha a chim i khuaruahhar thil a tuah timi kong kha hlathlai.
4. Jesuh nih thawngṭha a rak chim
Mi tam khawh chung tam sinah thawngṭha a chim khawh nakhnga Jesuh cu leidip a tammi lam ah a ke in meng za leng a rak kal. Luka 8:1 rel law mah biahalnak hna hi i ruah u:
-
Jesuh nih a bia ngaih awkah aa pummi hna sin lawngah maw phung a chim?
-
Mi pawl hmuh awkah Jesuh cu zeitlukin dah a rak i zuam?
Messiah nih thawngṭha a chim lai tiah Pathian nih a chimchung. Isaiah 61:1, 2 rel law mah biahalnak hna hi i ruah u:
-
Mah chimchungbia hi Jesuh nih zeitindah a tlinter?
-
Tuchan ah mi nih mah thawngṭha hi an theih a hau tiah na ruat maw?
5. Jesuh nih a sunglawi tukmi biatak kong kha a cawnpiak hna
Jesuh nih Pathian Pennak kong thawngṭha a chimh hna lengah zulhawktlakmi kong hna zong kha a rak cawnpiak hna. A min a thangmi Tlangcung Cawnpiaknak chung in tahchunhnak cheukhat kha i ruah hna u sih. Matthai 6:14, 34 le 7:12 rel law mah biahalnak hna hi i ruah u:
-
Mah Baibal caang chungah Jesuh nih zei a ṭha tukmi ruahnak dah a kan cheuh?
-
Mah ruahnak cheuhnak cu bawmtu a si rih tiah na ruat maw?
6. Jesuh nih khuaruahhar thil a rak tuah
Jehovah nih Jesuh kha khuaruahhar thil tampi tuah awkah ṭhawnnak a pek. Tahchunhnak pakhat zoh awkah, Marka 5:25-34 rel asiloah VIDEO kha piah. Cun a tanglei biahalnak hna hi i ruah u.
-
Mah video chungah a zawmi nu nih zeidah a zumh?
-
Mah khuaruahhar thil kong he aa tlaiin zeinihdah na lung aan suk?
Johan 5:36 rel law mah biahalnak hi i ruah u:
-
Jesuh tuahmi khuaruahhar thil nih a kong he aa tlaiin zeidah “tehte a khaan” asiloah zeidah a langhter?
Na hngal maw?
Jesuh kong tam deuh kha Thawngṭha cauk tiah auhmi Matthai, Marka, Luka le Johan Baibal in kan hngalh khawh. Thawngṭha cauk a ṭialtu pakhat cio nih Jesuh kong he aa tlaiin aa lo lomi a kong a dikthliar kha an ṭial. Mah Baibal cauk pali kan rel tikah hngalh duh awk ngai a simi Jesuh nunnak kong kha kan hngalh.
-
MATTHAI
nih a hmasa bik Thawngṭha cauk kha a ṭial. Mah cauk nih Jesuh cawnpiaknak kong, a hleiin Pathian Pennak kong he aa tlaiin Jesuh cawnpiakmi kong kha tampi a kan chimh.
-
MARKA
nih a tawi bikmi Thawngṭha cauk kha a ṭial. Mah cauk nih lung cawlcangh awk ngai a simi thil sining kong kha tampi a kan chimh.
-
LUKA
nih Jesuh caah thlacam cu zeitlukin dah a biapit timi kong le Jesuh nih nu pawl kha zaangfahnak he zeitindah a pehtlaih hna timi kong hna kha a kan chimh.
-
JOHAN
nih a hawile le midang he Jesuh bia an i ruahmi kong kha tampi a kan chimh. Mah nih Jesuh cu zei bantuk minung dah a si ti kha hngalh awkah a kan bawmh.
MI CHEUKHAT CHIMMI: “Jesuh cu miṭha pakhat a si ko nain Messiah cu a si lo.”
-
Nangtah zeitindah na ruah?
A TAWINAK
Jesuh nih Pathian Pennak kong thawngṭha kha a chim, khuaruahhar thil kha a tuah i zei bantuk thil sining paohah Jehovah nawl kha a ngaih.
I Ruahṭi Ṭhannak
-
Jesuh vawleicung a um lioah a biapi bikmi a rian cu zeidah a si?
-
Jesuh tuahmi khuaruahhar thil nih zeidah a langhter?
-
Jesuh nih zei bantuk zulhawktlakmi kong hna dah a cawnpiak hna?
HLATHLAI CHAP
Jesuh nih a bik in zei kong dah a chim?
“Pathian Pennak Cu Jesuh Caah Zeicah A Biapit?” (Vennak Innsang capar)
Jesuh nih khuaruahhar thil a tuah taktak ti kha zeicah kan zumh timi kong kha hlathlai.
“Jesuh Tuahmi Khuaruahhar Thil Hna—Zeidah Na Cawn Khawh?” (Vennak Innsang capar)
Jesuh nih midang cungah zeitlukin dah zawnruahnak a ngeih timi kong a hlathlai tikah pa pakhat nih a nunnak a thlen ning kong kha rel.
“Ka Nunnak Ah Keimah Kong Lawng Kha Biapi Ah Ka Rak Chiah” (Vennak Innsang capar)
Jesuh nih a rak tuahmi a biapimi thil kong a langhtermi cazin kha zoh.
“Jesuh Phungchimnak Rian Hramthawknak” (Baibal Hlathlainak Ca Lamhruainak, Khuaram Hmanthlak 2)
a Cawn Dingmi 31-33 ah Pathian Pennak kong kha a dikthliar in a fianter lai.
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
