CAWN DINGMI 17
Jesuh Cu Zei Bantuk Minung Dah A Si?
Vawleicung a um lio i Jesuh nih a chimmi le a tuahmi kong hna kan hlathlai tikah amah le a Pa, Jehovah he a kan naihtermi sining hna kha kan hmuh. Mah duh a nung tukmi sining cheukhat cu zei hna dah an si? Kan nunnak ah Jesuh kha zeitindah kan i zohchunh khawh?
1. Zeiti lam in dah Jesuh cu a Pa he an i lawh?
Jesuh nih vancung ah dawtnak a ngeimi a Pa nih thil a tuahmi kha a zoh i kum nuai thong tampi chung a sinin a rak cawn. Cucaah a Pa bantukin khua a ruah, a intuar i thil a tuah ve. (Johan 5:19 rel.) Jesuh nih a Pa sining kha tling tein aa zohchunh caah hitin a ti: “Keimah a ka hmutu paoh nih cun ka Pa kha an hmuh ve ko.” (Johan 14:9) Jesuh ngeihmi sining kha na hlathlai ahcun Jehovah kong kha ṭha deuh in na hun hngalh lai. Tahchunhnak ah, Jesuh nih mi cungah a langhtermi zaangfahnak nih na kong he aa tlaiin Jehovah nih zeitindah a ruah ti kha a langhter.
2. Jesuh nih Jehovah a dawt kha zeitindah a langhter?
Jesuh nih hitin a ti: “Vawlei nih hin ka Pa ka dawt kha a hngalh khawh nakhnga ka Pa nih a ka fial bantukin ka tuah dih.” (Johan 14:31) Jesuh nih vawleicung a um lioah nawlngaih awk i a har caan hmanhah a nawl a ngaihnak thawngin a Pa a dawt kha a rak langhter. Cun Jesuh nih a Pa kong chim le a Pa he hawikom an si khawh nakhnga midang bawmh zong kha a duh.—Johan 14:23.
3. Jesuh nih mi pawl a dawt hna kha zeitindah a langhter?
Baibal nih Jesuh aa “nuamhnak cu minung hna chungah khan a si” tiah a ti. (Phungthlukbia 8:31) Mah dawtnak kha mi pawl thazaang a pek hnanak thawngin le mahzawn ruat loin a bawmh hnanak thawngin a rak langhter. Cun khuaruahhar thil a tuahmi nih ṭhawnnak lawng si loin zaangfahnak zong a ngei ti kha a langhter. (Marka 1:40-42) Mikip kha zaangfahnak he a pehtlaih hna i aho cung hmanhah duhdanhnak a ngei lo. A bia a ngaimi lungthin ṭha a ngeimi hna kha a bia nih hnemhnak le ruahchannak a pek hna. Jesuh nih minung kha a dawt hna caah lungtho tein sifah harnak le thihnak in kha a duh. Asinain a cawnpiaknak ningin a nungmi kha a hleiin a dawt hna.—Johan 15:13, 14 rel.
TAM DEUH IN HLATHLAI
Jesuh ngeihmi sining kong kha tam deuh in hlathlai. Cun amah bantukin dawtnak le siannak langhter khawh ning kong zong kha hlathlai.
4. Jesuh nih a Pa kha a dawt
Pathian kan dawtnak langhter khawh ning kong kha Jesuh nunning nih a kan cawnpiak. Luka 6:12 le Johan 15:10; 17:26 rel. Baibal caang pakhat cio nan rel dih hnuah mah biahalnak hi i ruah u:
-
Jesuh kha i zohchunh in Jehovah kan dawt kha zeitindah kan langhter khawh?
Jesuh nih vancung a Pa kha a dawt caah a sinah bia a chim i thla a cam lengmang
5. Jesuh cu bawmhnak a herhmi hna cungah zawnruahnak a ngei
Jesuh nih amah herhmi nakin midang herhmi kha biapi deuh ah a chiah. A tha a bat lio hmanhah a caan le a thazaang kha midang bawmhnak caah a rak hman. Marka 6:30-44 rel law mah biahalnak hna hi i ruah u:
-
Mah Baibal caang ah Jesuh nih midang cungah zawnruahnak a langhter ning lam cheukhat cu zei hna dah an si?—Caang 31, 34, 41 le 42 ah zoh.
-
Midang bawmh awkah Jesuh kha zeinihdah a forh?—Caang 34 ah zoh.
-
Jesuh nih Jehovah sining pawl a langhter caah mah nih Jehovah kong he aa tlaiin zeidah aan cawnpiak?
-
Jesuh nih midang cungah a langhtermi zawnruahnak kan i zohchunh khawh ning lam cheukhat cu zei hna dah an si?
6. Jesuh cu a siangmi a si
Jesuh cu thilri chawva tampi a ngei lo nain a siangmi a si. Cucaah kannih zong a siangmi si ve awkah tha a kan pek. Lamkaltu 20:35 rel law mah biahalnak hi i ruah u:
-
Jesuh chimmi ningin zeitindah kan i nuamh khawh?
VIDEO kha piah, cun a tanglei biahalnak hi i ruah u.
-
Thilri chawva tampi kan ngeih lo hmanhah midang kan pek khawh hnanak lam cheukhat cu zei hna dah an si?
Na hngal maw?
Baibal nih Jesuh min in Jehovah sinah thlacam dingin a kan cawnpiak. (Johan 16:23, 24 rel.) Cutin thla kan cam tikah Jehovah hawikom kan si khawh nakhnga bawmh awkah Jesuh nih a tuahmi thil cungah kan i lawmhnak kan langhtermi a si.
MI CHEUKHAT CHIMMI: “Pathian nih sifah harnak kan tonmi kha zei ah a rel lo.”
-
Jesuh nih a Pa sining a langhter caah a tuahsernak nih Jehovah nih kan zawn a kan ruah ti kha zeitindah a langhter?
A TAWINAK
Jesuh nih Jehovah le mi pawl kha a dawt hna. Jesuh cu a Pa he an i lawh caah a kong kha tam deuh in na hngalh ahcun Jehovah kong zong kha tam deuh in na hngalh lai.
I Ruahṭi Ṭhannak
-
Jesuh bantukin Jehovah kan dawt kha zeitindah kan langhter khawh?
-
Jesuh bantukin mi kan dawt hna kha zeitindah kan langhter khawh?
-
Jesuh ngeihmi zei sining dah na duh bik?
HLATHLAI CHAP
Kan i zohchunh khawhmi Jesuh ngeihmi sining cheukhat kong kha hlathlai.
“Jesuh Kha I Zohchunh” (Jesuh—Lam, Biatak Le Nunnak, cahmai 317)
Jesuh min in zeicah thlacam a herh timi kong kha hlathlai.
Jesuh muisam kong he aa tlaiin Baibal nih zei tal a chim maw?
Jesuh nih nu pawl a pehtlaih hna ningin zeidah kan cawn khawh?
“Pathian Nih Nu Pawl Kha Upat Awk A Tlakmi In A Hmuh Hna” (Vennak Innsang capar)
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
