CAWN DINGMI 18
A Hmaanmi Khrihfa Hna Thleidan Khawh Ning
Mi nuai thong tampi nih anmahle anmah kha Khrihfa kan si tiah an i ti. Asinain pakhat le pakhat an zumhnak aa khat lo i an phunglam zong aa khat lo. Cu a si ah a hmaanmi Khrihfa hna kha zeitindah kan thleidan khawh hna lai?
1. Khrihfa timi cu zeidah a si?
Khrihfa hna cu Jesuh Khrih zultu kha an si. (Lamkaltu 11:26 rel.) Annih nih Jesuh zultu an si kha zeitindah an langhter? Jesuh nih hitin a ti: “Ka cawnpiaknak kha nan zulh ahcun a ka zultu taktak cu nan si.” (Johan 8:31) A sullam cu a hmaanmi Khrihfa hna nih cun Jesuh cawnpiaknak kha an zulh a hau tinak a si. Jesuh nih Baibal chimmi kha a cawnpiak peng hna. Cu bantukin a zultu taktak a simi hna zong nih cutin an tuah ve.—Luka 24:27 rel.
2. A hmaanmi Khrihfa hna nih dawtnak kha zeitindah an langhter?
Jesuh nih a zultu pawl kha hitin a ti hna: “Keimah nih kan dawt hna bantukte hin pakhat le pakhat i daw u.” (Johan 15:12) Jesuh nih a zultu pawl a dawt hna kha zeitindah a langhter? Anmah he caan a hmangṭi, tha a pek hna i a bawmh hnanak thawngin a langhter. Mah lengah a nunnak hmanh kha an caah a rak pek. (1 Johan 3:16) Jesuh bantukin a hmaanmi Khrihfa hna zong nih dawtnak kong kha an kaa lawngin an chim lo. An biachim le an tuahsernak in pakhat le pakhat an i dawt kha an langhter.
3. A hmaanmi Khrihfa hna cu zei rianṭuannak ah dah an rian a tam?
Jesuh nih a zultu pawl kha rian a rak pek hna. “Pathian Pennak kong chim . . . awkah a thlah hna.” (Luka 9:2) Hmasa Khrihfa hna cu an i pumhnak hmun lawngah si loin a dang zapi umnak hmun le inn hna zongah phung an rak chim. (Lamkaltu 5:42; 17:17 rel.) Tuchan zongah a hmaanmi Khrihfa hna nih mi an umnak hmun paohah Baibal biatak kong kha an chim ve. An minung hawi kha an dawt hna caah ruahchannak le hnemhnak a pemi Baibal kong chim awkah an caan le an thazaang kha lungtho tein an hman.—Marka 12:31.
TAM DEUH IN HLATHLAI
A hmaanmi Khrihfa hna cu Jesuh cawnpiaknak le a nunning a zul lomi hna he zeitindah thleidan khawh an si timi kong kha hlathlai.
4. Baibal biatak kha an kawl
A hmasa Khrihfa hna cu Baibal kha an sunsak
Khrihfa kan si tiah aa timi hna paoh nih Baibal biatak kha an sunsak dih lo. VIDEO kha piah, cun mah biahalnak hi i ruah u.
-
Khrihfa kan si tiah aa timi church cheukhat nih Jesuh cawnpiaknak kong an hlathlaimi kha mi nih an ngol nakhnga zeidah an rak tuah?
Jesuh nih Baibal in biatak kha a cawnpiak hna. Johan 18:37 rel law mah biahalnak hi i ruah u:
-
Jesuh nih a chim bantukin “biatak kha a hna a phih kanh lomi” Khrihfa hna kha zeitindah kan thleidan khawh hna?
5. Baibal kong biatak kha an chim
A hmasa Khrihfa hna cu midang sinah phung an chim
Jesuh nih vancung a kai hlanah a zultu pawl kha tuchan tiang ṭuan dingmi rian pakhat a rak pek tak hna. Matthai 28:19, 20 le Lamkaltu 1:8 rel law mah biahalnak hi i ruah u:
-
Zeitik tiang asiloah zeitluk kau in dah an chim lai?
6. An chimmi ningin an tuah
Tom timi pa kha a hmaanmi Khrihfa ka hmuh cang tiah zeinihdah a zumhter? VIDEO kha piah, cun a tanglei biahalnak hna hi i ruah u.
-
Mah video ah Tom kha biaknak cungah zeinihdah a lung a donghter?
-
Biatak ka hmuh cang tiah zeicah a zumh?
Tuahsernak cu bia nakin hmual a ngei deuh. Matthai 7:21 rel law mah biahalnak hi i ruah u:
-
Jesuh caah kan zumhmi kong kan chimmi maw a biapi deuh asiloah tuahsernak in kan langhtermi dah?
7. Pakhat le pakhat an i daw
A hmasa Khrihfa hna cu pakhat le pakhat an i daw
Khrihfa hna nih zumtukhat unau pawl caah an nunnak pek kha an ngamh taktak maw? VIDEO kha piah, cun mah biahalnak hna hi i ruah u.
-
Mah video ah Lloyd kha Unaupa Johansson caah a nunnak pek dingin zeinihdah a forh?
-
A hmaanmi Khrihfa pakhat bantukin thil a tuah tiah na ruat maw?
Johan 13:34, 35 rel law mah biahalnak hna hi i ruah u:
-
Jesuh zultu (a hmaanmi Khrihfa hna) nih miphun dang asiloah ramdang mi kha zeitindah an pehtlaih hna?
-
Raltuknak a um lioah cutin zeitindah an rak tuah?
MI CHEUKHAT CHIMMI: “Pathian nih biaknak vialte hi a cohlan dih ko.”
-
Mi pakhat sinah a hmaanmi Khrihfa hna thleidan khawh ning kong he aa tlaiin zei Baibal caang dah na relpiak khawh?
A TAWINAK
A hmaanmi Khrihfa hna nih Baibal cawnpiakmi kha an zulh, mahzawn ruat lo dawtnak kha an langhter i Baibal kong biatak kha an chim.
I Ruahṭi Ṭhannak
-
A hmaanmi Khrihfa hna nih an zumhnak kha zei cungah dah hram an bunh?
-
Zei sining nih dah a hmaanmi Khrihfa hna kha a thleidanter hna?
-
A hmaanmi Khrihfa hna nih zei rian dah an ṭuan?
HLATHLAI CHAP
An si khawh chung in Jesuh Khrih nunning le cawnpiaknak ningin zulh awkah aa zuammi phu pakhat kong kha tam deuh in hlathlai.
Sister a rak simi nu pakhat kha “a hmaanmi thlaraulei chungkhar” hmuh awkah zeinihdah lam a hruai timi kong kha hlathlai.
“Ka Biahalnak Paoh Kha Baibal In An Ka Leh” (Vennak Innsang capar)
A hmaanmi Khrihfa hna nih bawmhnak a herhmi zumtukhat unau pawl cungah dawtnak an langhter ning kong kha hlathlai.
Jesuh nih a zultu pawl cu nan thleidan khawh hna lai tiah a timi bia ningin a hmasa Khrihfa hna le tuchan a hmaanmi Khrihfa hna nih zeitindah an nun timi kong kha hlathlai.
“A Hmaanmi Khrihfa I An Hmelchunh Cu Zeidah A Si?” (Vennak Innsang capar)
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
