CAWN DINGMI 22
Thawngṭha Kha Zeitindah Na Chim Khawh?
Baibal biatak na cawn tikah ‘mikip nih mah kong hi an theih a hau’ tiah na ruah men lai. Mikip nih mah kong kha an theih a hau ti cu a hmaan ko. Asinain na cawnmi kong midang sinah chim kha na ṭih men lai. Ṭihnak na tei khawh ning kong le nuam tein Baibal kong thawngṭha na chim khawh ning kong kha i ruah u sih.
1. Na cawnmi kong kha na hngalhmi hna sinah zeitindah na chim khawh?
Jesuh zultu pawl nih hitin an ti: “Kanmah hrimhrim nih kan hmuh komi le kan theih komi cu chim lo cun kan um kho bal lai lo.” (Lamkaltu 4:20) Biatak kha an sunsak tuk caah mi tam khawh chung tam sinah chim an duh. Nangtah na duh ve maw? Na duh ahcun na chungkhar le na hawile sinah na cawnmi kong kha upatnak he chim khawh awkah caanṭha kawl.—Kolose 4:6 rel.
Thawk khawh ning lam cheukhat
-
Na chungkhar pawl he bia nan i ruah tikah hitin na chimnak thawngin Baibal kong pakhat kha hngalhternak tuah: “Tu zarh ah hngalh duh awk ngai a simi thil cheukhat kong ka cawn.”
-
A zawmi asiloah a lungre a theimi na hawi pakhat sinah thazaang a pemi Baibal caang pakhat kha chim.
-
Zeidah na lawh tiah aan halmi na rianṭuanṭi hawi pawl sinah Baibal na hlathlaimi asiloah Khrihfabu pumhnak ah na cawnmi kong kha chim hna.
-
Na hawile kha website hmuhsak hna.
-
Baibal cawnpiaknak na tuah tikah midang kha sawm hna asiloah jw.org in Baibal cawnpiaknak zeitindah hal khawh a si ti kha hmuhsak hna.
2. Khrihfabu he phungchim rianṭuanṭi cu zeicah a phumi hmuitinh a si?
Jesuh zultu pawl nih an hngalhmi hna sin lawngah thawngṭha an rak chim lo. Jesuh nih phungchim awkah “khua le hmun paohah khan a hmaiah pahnih pahnih in a thlah hna.” (Luka 10:1) Mah dirhmi phungchim rianṭuannak nih mi tampi kha thawngṭha theih awkah caanṭha a hmuhter hna. Hmunkhat ah phungchimṭinak nih a zultu pawl kha a nuamh zong a nuamhter deuh hna. (Luka 10:17) Nangtah Khrihfabu he phungchimṭi awkah hmuitinh na ngei kho lai maw?
TAM DEUH IN HLATHLAI
Ṭihnak tei khawh ning kong le thawngṭha chimnak in hmuhmi lawmhnak kong kha hlathlai.
3. Jehovah cu na sinah a um lai
Phungchim a duhmi mi cheukhat nih an tuah dingmi kong asiloah mi nih an lehrulh dingmi hna kong he aa tlaiin ṭihnak an ngei men lai.
-
Midang sinah na hngalhmi kong chim kha na ṭih maw? Zeicah na ṭih asiloah zeicah na ṭih lo?
VIDEO kha piah, cun a tanglei biahalnak hi i ruah u.
-
Jehovah Tehte mino hna nih ṭihnak an ngeihmi kha zeitindah an tei khawh?
Isaiah 41:10 rel law mah biahalnak hi i ruah u:
-
Phungchim kha na ṭih ahcun thlacamnak nih zeitindah aan bawmh lai?
Na hngal maw?
Jehovah Tehte tampi zong hlanah midang sinah thawngṭha kan chim kho bal lai lo timi ruahnak an rak ngei. Tahchunhnak ah, Sergey cu mahle mah zumhnak a ngeih lo caah midang he i chawnhbiak kha aa harh. Asinain Baibal a hlathlai hnuah hitin a ti: “Ṭihnak ka ngei ko nain ka hngalhmi kong kha midang sinah ka hun chim. Khuaruahhar ngai a simi cu midang sinah Baibal kong ka chimmi nih mahle mah zumhnak a ka ngeihter. Cun ka zumhnak kong midang sin chimnak nih ka zumhnak zong a fehter chin.”
4. Upatnak he chim
Thawngṭha na chim tikah zeidah na chim timi kong lawng si loin zeitindah na chim timi kong zong kha ruat. 2 Timote 2:24 le 1 Peter 3:15 rel law mah biahalnak hna hi i ruah u:
-
Midang sin i Baibal kong na chim tikah mah Baibal caang ningin zeitindah na zulh khawh?
-
Na chungkharmi asiloah na hawile cheukhat nih na zumhnak kha an cohlang men lai lo. Mah tikah zeidah na tuah khawh? Zeidah na tuah awk a si lo?
-
Mi sinah zeidah an zumh awk a si timi kong chim nakin fimkhur tein biahalnak tuah cu zeicah a ṭhat deuh khawh men?
5. Thawngṭha chimnak nih nuamhnak a hmuhter
Jehovah nih Jesuh kha thawngṭha chim awkah rian a pek. Jesuh nih mah rian kha zeitindah a hmuh? Johan 4:34 rel law mah biahalnak hna hi i ruah u:
-
Rawl thaw kan eimi nih kan thazaang a ṭhawnter i a kan nuamhter. Thawngṭha chimnak i telin Pathian duhnak tuah kha Jesuh nih zeicah rawl ei he a tahchunh?
-
Thawngṭha chimnak in zei bantuk lawmhnak dah hmuh khawh a si tiah na ruah?
Ruahnak cheuhnak
-
Zarhlai pumhnak ah biaruahnak thawk khawh ning lam hna kha kawl.
-
Zarhlai pumhnak ah zeitindah siangngakchia pakhat na si khawh timi kong kha Baibal aan cawnpiaktu sinah hal. Siangngakchia rian peknak nih na cawnmi kong kha midang sinah chim dingin timhcia si awkah aan bawmh khawh.
-
Mi tam deuh halmi biahalnak hna le ralchanhnak hna lehrulh khawh ning kong hngalh awkah “Mi Cheukhat Chimmi” asiloah “Mi Pakhat Halmi” timi ṭhen kha hmang.
MI PAKHAT HALMI: “Thawngpang a ṭha maw?”
-
Baibal na cawnmi kong he aa tlaiin cutin aan halmi mi pakhat sinah mah caanṭha kha zeitindah na hman khawh?
A TAWINAK
Midang sin thawngṭha chimnak nih lawmhnak aan hmuhter i mah cu na ruahnak leng in a fawi deuh men lai.
I Ruahṭi Ṭhannak
-
Zeicah midang sinah thawngṭha kan chim?
-
Upatnak he zeitindah na chim khawh?
-
Phungchimnak he aa tlaiin na ngeihmi ṭihnak paoh kha zeitindah na tei khawh?
HLATHLAI CHAP
JW.ORG pehtlaihnak card hmangin a sawhsawh tein thawngṭha chim khawh ning pali kong kha hlathlai.
Thawngṭha chimnak ah aan bawm khomi sining pali kong kha hlathlai.
“Mi Tlaitu Si Awkah Timhcia Na Si Cang Maw?” (2020, September, Vennak Innsang)
Mino kan si hmanhah Baibal tuanbia pakhat nih thawngṭha chim awkah ralṭhatnak a kan ngeihter khawh ning kong kha zoh.
Jehovah kong a hlathlai lomi na chungkharmi hna sinah Baibal kong zeitindah na chim khawh timi kong kha hlathlai.
“Zumlotu Rualchan Pawl Lungsuk Khawh Ning” (Vennak Innsang capar)
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
