Jesuh nih Khrihfa pawl cu tipil an in awk a si tiah a ti. (Matthai 28:19, 20 rel.) Asinain tipil in timi cu zeidah a si? Mi pakhat nih mah hmuitinh phanh awkah zeidah a tuah awk a si?

1. Tipil in timi cu zeidah a si?

“Tipil in” timi biafang cu ti chungah “pil” tiah sullam a ngeimi Greek biafang in a rami a si. Jesuh cu tipil a in lioah Jordan Tiva chungah pil lakin aa hnim i mah hnuah “ti chungin a hung” tho. (Marka 1:9, 10) Cu bantukin a hmaanmi Khrihfa hna zong tipil an in tikah ti chungah an pum dihlak a pil asiloah an i hnim.

2. Tipil innak nih zeidah a langhter?

Mi pakhat nih tipil a innak thawngin amahle amah Jehovah Pathian sinah a pum aa pek kha a langhter. Mi pakhat nih zeitindah pumpeknak a tuah? Tipil a in hlanah pumpak a thlacamnak ah a zungzal in a rianṭuan a duhnak kong kha Jehovah sinah a chim. Jehovah lawng ka biak lai i ka nunnak ah a biapi bikmi thil cu Pathian duhnak tuah kha a si lai tiah bia aa kam. Cun ‘amahle amah i philh in’ Jesuh cawnpiaknak le nunning kha ‘zulh peng’ awkah bia a khiah. (Matthai 16:24) Aa pumpekmi le tipil a inmi nih Jehovah le a dang zumtukhat unau pawl he a ṭhami pehtlaihnak a ngeihter.

3. Mi pakhat nih tipil a in hlanah zeidah a tuah a hau?

Tipil na in hlanah Jehovah kong hlathlai le a cungah a fekmi zumhnak ngeih cu a biapi tukmi a si. (Hebru 11:6 rel.) Na hngalhnak le na zumhnak a ṭhancho tikah Jehovah kha na hun dawt lai. Cun a kong midang sinah chim le a phunglam ningin nun zong kha na duh lai. (2 Timote 4:2; 1 Johan 5:3) Mi pakhat nih ‘Bawipa duhning in a nun’ tikah Pathian sinah i pumpek awk le tipil in awkah biakhiahnak a tuah men lai.—Kolose 1:9, 10. a

 TAM DEUH IN HLATHLAI

4. Jesuh tipil innak in kan cawn khawhmi

Jesuh tipil innak kong a dikthliar hngalh awkah Matthai 3:13-17 rel. Cun mah biahalnak hna hi i ruah u:

• Jesuh cu tipil a in lioah bawhkeuhte a si maw?

• Zeitindah tipil a in? Ti in an theh sawhsawh maw?

Jesuh nih tipil a in hnuah vawleicung ah Pathian nih a pekmi a ṭha tukmi rian kha ṭuan hram a hun thawk. Luka 3:21-23 le Johan 6:38 rel law mah biahalnak hi i ruah u:

• Tipil a in hnuah Jesuh nih a nunnak ah pakhatnak ah a chiahmi rian cu zeidah a si?

5. Tipil innak cu na phanh khawhmi hmuitinh a si

Pumpeknak le tipil innak cu a si kho hnga maw tiah na ruah khawh men. Asinain Jehovah kong kha na cawn peng i amah kha ṭha deuh in na hngalh ahcun mah a biapimi biakhiahnak kha tuah awkah zumhnak na ngei deuh lai. Cutin a rak tuahmi mi cheukhat kong hngalh awkah, VIDEO kha piah.

Johan 17:3 le Jeim 1:5 rel law mah biahalnak hi i ruah u:

• Mi pakhat kha tipil in awkah timhcia a si nakhnga zeinihdah a bawmh khawh?

1. Jehovah sinah a zungzal in na rianṭuan kan duh tiah kan chimhnak thawngin pumpeknak kan tuah

2. Tipil kan in lioah Pathian sinah pumpeknak kan tuahmi kha mi hmaiah kan langhter

 6. Tipil kan in tikah Jehovah chungkhar kan hung si

Tipil kan in tikah a lung aa rualmi vawleicung pumpi chungkhar ah kan hun i tel. Aa lo lomi hmun le hnulei sining in a rami kan si ko nain aa khatmi zumhnak kong kha kan chim i aa khatmi ziazalei phunglam ningin kan nung. Salm 25:14 le 1 Peter 2:17 rel law mah biahalnak hi i ruah u:

• Mah Baibal caang ningin mi pakhat cu tipil innak in zeitindah ṭhathnemhnak a hmuh khawh?

 A TAWINAK

Jesuh nih Khrihfa pawl cu tipil an in a hau tiah a kan cawnpiak. Mi pakhat nih tipil a in hlanah Jehovah cungah a fekmi zumhnak a ngeih a hau, cun a phunglam ningin nun le a sinah amahle amah zong aa pumpek a hau.

I Ruahṭi Ṭhannak

• Tipil in timi cu zeidah a si, mah cu zeicah a biapit?

• Tipil innak nih zeidah a langhter?

• Mi pakhat nih a pum aa pek hlan le tipil a in hlanah zeidah a tuah a hau?