Jehovah nih vancung a chungkhar pawl kong kha hngal hna seh ti a kan duh. Mah a chungkhar ah “Pathian fapa” tiah auhmi vancungmi zong an i tel. (Job 38:7) Baibal ah vancungmi kong he aa tlaiin zeidah a chim? Vancungmi nih zeidah an tuah? Vancungmi cu an dihlak in Pathian chungkharmi an si maw?

1. Vancungmi cu ahote dah an si?

Jehovah nih vawlei a ser hlanah vancungmi pawl kha a ser hna. Amah bantukin annih cu hmuh khawh lomi thlarau pum an si i vancung ah an um. (Hebru 1:14) Vancungmi cu nuai tampi an si i pakhat cio nih aa thleidangmi sining an ngei. (Biathlam 5:11) Annih nih ‘[Jehovah] nawlbia kha an ngaih i a chimmi’ kha an tuah. (Salm 103:20) Hlanlio chan ah Jehovah nih a bia thanh awk, a mi pawl bawmh awk le khamh awkah vancungmi pawl kha a thlah tawn hna. Tuchan zongah vancungmi nih Khrihfa pawl kha Pathian kong hngalh a duhmi hna sinah lam an hruai hna.

2. Satan le a khuachia pawl cu ahote dah an si?

Vancungmi cheukhat cu Jehovah cungah zumhfek tein an rak um peng lo. A hmasa bik ralchanhtu a simi vancungmi cu “Khuachia asiloah Satan timi vawleicung mi vialte a hleng dihtu hna kha a si.” (Biathlam 12:9) Satan nih midang kha uk a duh hna caah Adam le Evi le a hnuah a dang vancungmi zong nih Jehovah nawl an ngaih nakhnga lo a rak tuah. Mah ralchantu vancungmi pawl cu khuachia tiah auh an si. Jehovah nih annih kha vancung in vawlei ah a thlak hna i a rauhhlan ah a hrawh hna lai.—Biathlam 12:9, 12 rel.

3. Satan le a khuachia pawl cu kanmah lam pialter awkah zeitindah an i zuam?

Satan le a khuachia pawl nih khuachia thiamnak hna kha hmangin mi tampi kha lam an pialter hna. Mah lakah a ṭha lo bikmi cu thlarau ṭha lo he i chawnhbiak awkah an i zuammi kha a si. Tahchunhnak ah, mi cheukhat nih arfi zoh a thiammi hna, hmailei kong a chimchungmi hna, kutṭial zoh a thiammi hna le doih le eih a thiammi hna sinah ruahnak an hal hna. Mi cheukhat nih cun khuachia thiamnak aa telmi siithlop ning phun hna kha an kawl. Cun mi cu a thimi hna he biaruah khawh a si timi zumhnak an ngeih nakhnga zong an hlen hna. Asinain Jehovah nih hitin ralrin a kan pek: “Khuavang le camhthiam kha fukpanh hna hlah u.” (Levitikas 19:31) Mah hi Satan le a khuachia pawl sinin kan i kilven khawh nakhnga a kan pekmi ralrinnak a si. Annih cu Pathian ral an si i harnak pek a kan duh.

 TAM DEUH IN HLATHLAI

6. Satan le a khuachia pawl dohnak ah teinak

Khuachia pawl cu Satan nih a ukmi hna an si. Asinain zumhfekmi vancungmi hna cu vancungmi bawi bik Mikhael nih lam a hruai hna. Mikhael timi cu Jesuh i a min dang a si. Mikhael cu zeitlukin dah a ṭhawn? Biathlam 12:7-9 rel law mah biahalnak hna hi i ruah u:

• Ahodah a ṭhawng deuh? Mikhael le a vancungmi maw asiloah Satan le a khuachia pawl dah?

• Jesuh zultu pawl nih Satan le a khuachia pawl kha an ṭih hna awk a si tiah na ruat maw?

Satan le a khuachia pawl dohnak ah teinak na hmu kho. Jeim 4:7 rel law mah biahalnak hi i ruah u:

• Satan le khuachia pawl sinin zeitindah naa huhphenh khawh?

 A TAWINAK

Zumhfekmi vancungmi pawl nih an kan bawmh. Satan le a khuachia pawl cu Jehovah ral an si i annih nih mi pawl lam pialter awkah khuachia thiamnak kha an hman.

I Ruahṭi Ṭhannak

• Jehovah vancungmi hna nih Pathian kong hngalh awkah mi kha zeitindah an bawmh hna?

• Satan le a khuachia pawl cu ahote dah an si?

• Khuachia thiamnak he i pehtlaih kha zeicah na duh lo?