Mi pakhat nih a ṭha lo tukmi thil a ton tikah “zeicah?” tiah biahalnak a tuahmi cu a phung a si ko. Mah biahalnak he aa tlaiin Baibal ah a phi a um caah kan i lawm tuk.

1. Satan nih vawlei ah zeitindah thil ṭhalo a umter?

Satan Khuachia nih Pathian kha a ralchanh. Satan nih midang kha uk a duh hna caah a hmasa bik minung, Adam le Evi nih Jehovah kha an ralchanh nakhnga a rak tuah. Satan nih Evi sinah lihbia a chimnak thawngin cutin a rak tuah. (Genesis 3:1-5) Evi kha Jehovah nih a ṭhami thil cheukhat a ka pe duh lo timi ruahnak a rak ngeihter. Cun minung nih Pathian nawl an ngaih lo ahcun an i nuam deuh lai ti phun zong in a chim. Satan nih Evi kha na thi lai lo tiah a rak tinak thawngin a hmasa bik lihbia a rak chim. Cucaah Baibal nih Satan kha “lih vialte pa” tiah a ti.—Johan 8:44.

2. Adam le Evi nih zei tuah awkah dah an rak i thim?

Jehovah cu Adam le Evi cungah a siang tuk. Adam le Evi kha Eden dum chung i thingkung pakhat a thei dah ti lo cu nan ei khawh dih tiah a ti hna. (Genesis 2:15-17) Asinain annih nih mah thlauhmi thingthei kha ei dingin biakhiahnak an rak tuah. Evi nih “a thei cu a lawh hna i a ei.” A hnuah, Adam zong nih “a ei ve.” (Genesis 3:6) An pahnih in Pathian nawl kha an rak ngai lo. Adam le Evi cu mitling an si caah a hmaanmi thil tuah cu an caah aa tlakmi a si. Asinain Pathian nawlngaih lo awkah biakhiahnak an tuah. Pathian nawl kha hramhram in an ngai lo, sualnak an tuah i Pathian uknak kha an ralchanh. Mah an biakhiahnak ruangah sifah harnak tampi an rak tong.—Genesis 3:16-19.

3. Adam le Evi biakhiahnak nih zeitindah a kan hnorsuan?

Adam le Evi cu sualnak an tuah tikah mitling lo an hung si. Cucaah an tefa dihlak zong mitling lo an hung si ve. Adam kong he aa tlaiin Baibal nih hitin a ti: “Sualnak cu mipa pakhat thawngin vawleicung ah hin a tlung i cu a sualnak nih cun thihnak kha a ratpi.”—Rom 5:12.

A kong a phunphun ruang ah sifah harnak kan tong. A caan ah a ṭhalomi biakhiahnak kan tuah ca le midang nih a ṭhalomi biakhiahnak an tuah caah sifah harnak kan tong. A caan ahcun um lo dingmi hmun ah le um lo dingmi caan ah kan um ca zongah sifah harnak kan tong.—Phungchimtu 9:11 rel.

 TAM DEUH IN HLATHLAI

4. Sifah harnak kan tonmi ruang ah ahodah rian a ngei?

Mi tampi nih vawlei pumpi hi Pathian nih a uk tiah an zumh. Mah cu a hmaan maw? VIDEO kha piah.

Jeim 1:13 le 1 Johan 5:19 rel law mah biahalnak hi i ruah u:

• Sifah harnak le ṭhatlonak caah Pathian cu rian a ngei maw?

5. Satan uknak ruangah a chuakmi kong kha ruat

1. Adam le Evi cu mitling an si i Paradis ah an rak um. Asinain Satan bia kha an ngaih i Jehovah kha an ralchanh

2.   Ralchanhnak a um hnuah vawlei cu sualnak, sifah harnak le thihnak in a hung khat

3. Jehovah nih sualnak, sifah harnak le thihnak cu a donghter cang lai. Minung cu mitling an si ṭhan lai i Paradis ah an um ṭhan cang lai

6. Sifah harnak kan tonmi cungah Jehovah cu zawnruahnak a ngei

Sifah harnak kan ton tikah Pathian cu kan cungah zawnruahnak a ngei maw? Siangpahrang David le lamkaltu Peter nih an ṭialmi kong hi ruathmanh. Salm 31:7 le 1 Peter 5:7 rel law mah biahalnak hi i ruah u:

• Jehovah nih sifah harnak kan tonmi kha a hngalh i kan cungah zawnruahnak a ngei ti na hngalhmi nih zeitindah aan umter?

 A TAWINAK

Satan Khuachia le a hmasa bik minu le mipa cu vawleicung ah a ummi ṭhatlonak cungah a bik in rian a ngeimi an si. Sifah harnak kan tonmi cungah Jehovah cu zawnruahnak a ngei i a rauhhlan ah a hrawh dih cang lai.

I Ruahṭi Ṭhannak

• Satan Khuachia nih Evi sinah zei lihbia dah a rak chim?

• Adam le Evi ralchanhnak nih kan dihlakin zeitindah a kan hnorsuan?

• Sifah harnak kan tonmi cungah Jehovah cu zawnruahnak a ngei ti kha zeitindah kan hngalh?