Dawtmi pakhatkhat nih thihtaknak na tong bal maw? Cu bantuk a har tukmi caan ah hitin na ruah men lai: ‘Kan thih tikah zei ah dah kan can? Kan dawtmi a thimi hna he kan i tong ṭhan ti lai maw?’ Mah cawn dingmi le a hnu cawn dingmi ah lungsi hnangamnak a pemi Baibal a phi kong kha kan i ruah hna lai.

1. Kan thih tikah zei ah dah kan can?

Jesuh nih thihnak kha i hngilh he a tahchunh. Aa hngilh tukmi pakhat nih cun a pawngkam ah a cangmi thil kha zeihmanh a hngal lo. Thihnak cu i hngilh he zeitindah aa lawh? Mi pakhat cu a thih hnuah fahnak a tuar ti lo i ka li a leng timi ruahnak zong a ngei ti lo. Baibal nih “a thimi nih cun zeihmanh an hngal lo” tiah a ti.—Phungchimtu 9:5 rel.

2. Thihnak kong biatak hngalhnak in zeitindah ṭhathnemhnak kan hmuh?

Mi tampi nih thih kha an ṭih i mithi zong an ṭih hna. Asinain thihnak kong he aa tlaiin Baibal chimmi nih hnemhnak aan pek khawh. Jesuh nih hitin a ti: “Biatak nih cun aan luatter hna lai.” (Johan 8:32) Biaknak cheukhat nih mi pakhat cu a thih hnuah a thlarau a nung rih tiah an cawnpiak hna. Asinain mah cu Baibal cawnpiaknak a si lo. An thih hnuah ahohmanh sifah harnak an tong ti lo. Cun an thih hnuah cun zeihmanh an hngal ti lo i harnak zong an kan pe kho lo. Cucaah mithi pawl caah raithawi, biak asiloah thlacam a hau lo.

Mi cheukhat nih a thimi hna he pehtlaihnak kan tuah khawh tiah an ti. Asinain mah cu a si kho lomi a si. Kan theih cang bantukin a thimi nih cun “zeihmanh an hngal lo.” Kan dawtmi a thimi hna he pehtlaihnak kan tuah tiah a ruatmi hna cu a taktak ti ahcun a thimi hna bantukin aa umtermi khuachia pawl he pehtlaihnak an tuahmi tu a si. Cucaah thihnak kong biatak hngalhnak nih khuachia sinin a kan kilven khawh. Jehovah nih khuachia he pehtlaihnak tuahnak nih harnak a kan pek khawh ti kha a hngalh caah a thimi hna he pehtlaihnak tuah lo awkah ralrin a kan pek.—Deuteronomi 18:10-12 rel.

3. Mithi pawl sining kong taktak kha hlathlai

Vawleicung pumpi ah kan thih tikah zei ah dah kan can timi kong he aa tlaiin mi cu zumhnak a phunphun an ngei. Asinain mah zumhnak cu a hmaan dih tinak a si lo.

• Na umnak hmun ah mithi sining kong he aa tlaiin zeitindah an zumh?

 4. Thihnak kong biatak hngalhnak nih a kan ṭhathnemh

Thihnak kong biatak hngalhnak nih mithi pawl ṭihnak in a kan luatter. Phungchimtu 9:10 rel law mah biahalnak hi i ruah u:

• Mithi pawl nih harnak a kan pe kho maw?

Baibal biatak kan hngalh tikah mithi pawl caah raithawi asiloah biak a hau ti kha kan zum ti lo. Isaiah 8:19 le Biathlam 4:11 rel law mah biahalnak hi i ruah u:

• Jehovah nih mithi pawl biak asiloah a thimi hna sinah bawmh hal kha zeitindah a hmuh?

5. Thihnak kong biatak hngalhnak nih a kan hnemh

Mi tampi cu an thih tikah hlan i an rak tuahmi thil ṭhalo ruangah dantat nan si lai tiah cawnpiak an si. Asinain thil ṭha lo a rak tuahmi an si hmanhah an thih hnuah ahohmanh sifah harnak an tong lo timi kong hngalhnak nih hnemhnak a kan pek. Rom 6:7 rel law mah biahalnak hi i ruah u:

• Mah Baibal caang ningin thihnak nih mi pakhat kha sualnak in a luatter ahcun a thimi hna cu hlanlio i an rak tuahmi sualnak ruangah sifah harnak an tong lai tiah na ruat maw?

Jehovah kong kha na hngalh deuh tikah Pathian nih mithi pawl cu dan a tat hna lo timi kong kha na hun hngalh deuh ve lai. Deuteronomi 32:4 le 1 Johan 4:8 rel law mah biahalnak hna hi i ruah u:

• Mah Baibal caang ah langhtermi sining hna a ngeimi Pathian nih mithi pawl cu a hrem hna lai maw?

• Mithi pawl kong biatak hngalhnak nih aan hnem kho maw? Zeicah?

 A TAWINAK

Mi pakhat cu a thih tikah zeihmanh a hngal ti lo. Mithi pawl cu sifah harnak an tong lo i a nungmi zong kha harnak an pe kho hna lo.

I Ruahṭi Ṭhannak

• Kan thih tikah zei ah dah kan can?

• Mithi kong biatak hngalhnak nih zeitindah a kan ṭhathnemh?

• Mithi kong biatak hngalhnak nih zeitindah a kan hnemh?