CAWN DINGMI 34
Jehovah Kan Dawt Kha Zeitindah Kan Langhter Khawh?
Baibal na hun cawn tikah Pathian he kan i naih deuh tiah na ruat maw? Amah he nan i pehtlaihnak tah fehter peng na duh maw? Na duh ahcun Jehovah nih amah na dawt deuhmi a hmuh tikah aan dawt deuh lai i aan zohkhenh deuh ve lai ti kha philhhlah. Amah na dawt kha zeitindah na langhter khawh?
1. Jehovah kan dawt kha zeitindah kan langhter khawh?
Jehovah kan dawt kha a nawl kan ngaihnak thawngin kan langhter khawh. (1 Johan 5:3 rel.) Jehovah nih a nawlngaih awkah ahohmanh a hne hna lo. Mah canah a nawl kan ngai lai maw, ngai lai lo ti kha kanmah tein i thim awkah caanṭha a kan pek. Zeicah? Jehovah nih a bia kha “lungthin dihlak in” ngai hna seh ti a kan duh caah a si. (Rom 6:17) A sullam cu a nawl kha na ngaih a herh caah si loin amah na dawt caah na ngaihmi a si kha a duh tinak a si. Mah cauk i ṭhen 3 le 4 cu Jehovah na dawt kha amah lung a lawmhtermi thil na tuahnak thawngin le a lung a lawmhter lomi thil na hrialnak thawngin langhter awkah aan bawm khotu phun in timhtuahmi a si.
2. Jehovah kan dawt langhter cu zeicah a har khawh men?
“Miṭha nih harnak tampi an in tawn.” (Salm 34:19) Kan dihlak in pumpak tlinlonak kha kan doh cio. Cun chawlehnak ah buaibainak, dinlonak le a dang harnak hna zong kan tong men lai. Harnak kan ton tikah Jehovah nih a kan halmi thil tuah cu a fawi men lai lo. Zeicahtiah a hmaan lomi lam zulh cu a fawi deuh caah a si. Asinain Jehovah nih aan chimhmi kha zumhfek tein na tuah ahcun zeidang vialte nakin amah na dawt deuh kha na langhtermi a si. Cun a cungah zumhfek tein na um ti na langhtermi zong a si. Cutin na tuah ahcun amah zong na cungah zumhfek tein a um ve lai i aan kaltak bal lai lo.—Salm 4:3 rel.
TAM DEUH IN HLATHLAI
A nawl na ngaihmi cu Jehovah caah zeicah a biapit timi kong le a cungah zumhfek tein um peng awkah zeinihdah aan bawmh khawh timi kong kha hlathlai.
3. Satan nih sual aan phawt
Job Baibal ningin Satan nih Job lawng si loin Jehovah biak a duhmi ahopaoh kha sual a phawt dih hna. Job 1:1, 6–2:10 rel law mah biahalnak hna hi i ruah u:
-
Satan chimmi ningin cun Job nih Jehovah nawl a ngaihmi cu zeicah a si?—Job 1:9-11 ah zoh.
-
Nangmah i telin Satan nih mi vialte kha zeitindah sual aan phawt hna?—Job 2:4 ah zoh.
Job 27:5b rel law mah biahalnak hi i ruah u:
-
Job nih Jehovah a dawt taktak kha zeitindah a langhter?
Job nih Jehovah a dawt kha a cungah zumhfek tein a um pengnak thawngin a langhter
Jehovah kan dawt kha a cungah zumhfek tein kan um pengnak thawngin kan langhter
4. Jehovah lunglawmhter
Phungthlukbia 27:11 rel law mah biahalnak hna hi i ruah u:
-
A nawl na ngaih i fimkhur tein na um tikah Jehovah cu zeitindah a um? Zeicah?
5. Jehovah cungah zumhfek tein na um kho
Jehovah kan dawtnak nih a kong kha midang sinah chim dingin a kan forh. A cungah zumhfek tein kan ummi nih a har caan hmanhah cutin tuah dingin a kan forh. VIDEO kha piah, cun a tanglei biahalnak hna hi i ruah u.
-
Midang sinah Jehovah kong chim cu a har tiah na ruat maw?
-
Mah video ah Grayson kha ṭihnak tei awkah zeinihdah a bawmh?
A duhmi thil kha kan duh i a huatmi thil kha kan huat tikah Jehovah cungah zumhfek tein um cu a fawi. Salm 97:10 rel law mah biahalnak hna hi i ruah u:
-
Na cawnmi ningin Jehovah nih a duhmi thil cheukhat cu zei hna dah an si? A huatmi thil cheukhat tah zei hna dah an si?
-
A ṭhami thil duh awk le a ṭhalomi thil huat awkah zeitindah na cawn khawh?
6. Jehovah nawl kan ngaih tikah ṭhathnemhnak kan hmu
Jehovah nawlngaih cu a ṭha bikmi a si zungzal. Isaiah 48:17, 18 rel law mah biahalnak hna hi i ruah u:
-
Jehovah nih kan caah a ṭha bikmi thil a hngalh zungzal ti kha zumh khawh a si tiah na ruat maw? Zeicah?
-
Baibal le a hmaanmi Pathian Jehovah kong hlathlainak nih zeitindah aan ṭhathnemh?
MI CHEUKHAT CHIMMI: “Ka tuahsernak cu Pathian caah a biapi lo.”
-
Kan tuahsernak nih Jehovah lung a lawmhter khawh asiloah a ngaih a chiatter khawh ti langhter awkah zei Baibal caang dah na hman khawh?
A TAWINAK
Jehovah kan dawt kha a kan fialmi thil tuah awkah a har tik caan hmanhah a nawl kan ngaihnak thawngin le zumhfek tein kan um pengnak thawngin kan langhter khawh.
I Ruahṭi Ṭhannak
-
Job kong in zeidah na cawn khawh?
-
Jehovah na dawt kha zeitindah na langhter lai?
-
Jehovah cungah zumhfek tein um peng awkah zeinihdah aan bawmh lai?
HLATHLAI CHAP
Jehovah le Khrihfabu cungah zeitindah zumhfek tein na um khawh timi kong kha hlathlai.
Satan nih minung sual a phawtmi hna kong kha tam deuh in hlathlai.
“Job Nih A Zumhfehnak Kha Aa Tlaih Peng” (Baibal—A Chungah Zei Thawngpang Hna Dah A Um? ṭhen 6)
Mino an si hmanhah Jehovah an dawtnak zeitindah an langhter khawh timi kong kha hlathlai.
A dang mino pawl hneknak a tongmi mino pakhat nih Pathian cungah zeitindah zumhfek tein a um peng khawh?
Mah Kong Hna Zong Hi Na Duh Khawh Men
ATU LE ATU AN HALMI BIAHALNAK
Jehovah Tehte Hna Tuahmi Baibal Cawnnak Program Cu Zeidah A Si?
Jehovah Tehte Hna nih man loin an tuahmi Baibal kong i ruahceihṭinak program ah zei bantuk Baibal lehnak paoh kha na hman khawh. Na chungkhar dihlak asiloah na hawile ahopaoh nangmah he cawn dingin na sawm khawh hna.
